ދިވެހިރާއްޖޭގައިވެސް ދީނީކަންކަމާއި ދުރު މީހުން ވަރަށްވެސް ގިނައެވެ. މިއީވެސް ރާއްޖޭގައި ހިނގާފައި އެފަދަ މީހެއްގެ ހަޔާތުގައި ދިމާވި ހަގީގީ ވާހަކައެކެވެ. މިވާހަކަ ހިއްސާމިކޮށްލެވެނީ އެފަރާތުގެ އިޒުނައާއި އެކުގައެވެ.

އެއީ ރާއްޖެތެރޭގެ ރަށެއްގައި އުޅެމުން ދިޔަ ފިރިހެނެކެވެ. އޭނާގެ އަންބަކާއި ދެދަރިން ދުނިޔޭގައި އެބަތިއްބެވެ. އެއީ އަންހެން ދަރިއަކާއި ފިރިހެން ދަރިއެވެ. އެ ފިރިހެން ދަރިފުޅު ބޮޑުވަމުން އައިސް ގުރޭޑް 2 ގައި ކިޔަވަމުން އެބަ ގެންދެއެވެ. އަންހެންކުއްޖާ އަކީ އެއަށްވުރެ ދޮށި ކުއްޖެކެވެ.

އޭނާއަކީ ރަށުގައި ހަރުދަނާ ވަޒީފާއެއް އަދާކުރާ މީހެއް ނޫނެވެ. ކުޑަ ފައިބަރު ދޯނިގަނޑެއްގައި މަހަށް ފުރައެވެ. ރަށުގައި އެހެން މިހެން ހުންނަ ބައެއް އަމިއްލަ މީސްމީހުންގެ މަސައްކަތްތައް ކޮށްދީ އުޅޭ މީހެކެވެ. އޭނާގެ އަންހެނުންނަކީ ރަށުގައި ހަރުދަނާ ވަޒީފާއެއް އަދާ ކުރާ މީހެކެވެ. ކޮންމެއަކަށް އޭނާގެ ދިރިއުޅުމުގައި ދީނީ އެއްވެސްކަމަކަށް ފަރުވާތެރިކަމެއް ނުހުރެއެވެ. އޭނާ ބުނާގޮތުގައި މިސްކިތްތަކަކީ އޭނާ ނުވެސް ދަންނަ ތަންތަނެވެ. ނަމަވެސް އެންމެ ހުކުރެއްވެސް ދޫކޮށްނުލާ ހުކުރު ނަމާދުތަކަށް ދެއެވެ. އެހެން އެއްވެސް ނަމާދެއް ނުކުރެވެއެވެ. ރަށުގެ ގިނަ ބަޔަކަށް އެކަން އެގޮތަށް ހިނގާކަށްވެސް އެނގޭނެއެވެ. ބައެއް މީހުން ހީކުރާގޮތުގައި އޭނާ ގޭގައި ނަމާދުކުރަނީއެވެ. އެހެނަސް އޭނާ ބުނާގޮތުން ގޭގައިވެސް ނުކުރެއެވެ. ރޯދަމަހުގެ ދުވާލުގެ ވަގުތުތަކުގައި ބައެއް އެކުވެރީންނާއި އެކު ފަޅު ގެވަޅުތަކުގައި ދަޅު ބޮއެ ސިނގިރޭޓު ބޮއެ ހަދައެވެ. ބައެއް ދުވަސްދުވަހު ރޯދަ ވީއްލާ ގަޑިއަށް ނިދިފައި އޮވެއެވެ. ހާރުކާކަށް މަދު ދުވަހަކު ނޫނިއްޔަކާ ހޭލައެއް ނޫޅެއެވެ. ނަމަވެސް އޭނާގެ ހީވާގި އަންހެނުން އޭނާގެ ދެ ދަރިންނަށް މިކަންކަން ފުރިހަމައަށް ކޮށްދެއެވެ. އޭނާގެ ކާފަ ގަވައިދުން އޭނާގެ ފިރިހެންދަރި ގޮވައިގެން މިސްކިތަށް ދެއެވެ.

އެއީ ސުކޫލު ކިޔެވުން އޮތް ދުވަހެކެވެ. އެދުވަހު ސުކޫލުގައި، އޭނާގެ ފިރިހެންދަރީގެ ކުލާހުގައި ކިޔަވައިދެނީ ނަމާދުކުރުމާ ގުޅުން ހުރި ފިލާވަޅެކެވެ. މުދައްރިސް ފިލާވަޅު ނަގައިދެމުން ފިރިހެން ކުދިން ކައިރި ބުނެވުނު ވާހަކައެއްގައި މުދައްރިސް ގެނައީ އެކުދިންގެ ބައްޕަގެ ވާހަކައެވެ. އެ ކަމާއި އެ ދަރިފުޅުގެ އަމިއްލަ ނަޒަރަކުން ވިސްނާފައި އެބަހުއްޓެވެ. އެކަން އޭނާއަށް އެނގުނީ މި ހާދިސާއިންނެވެ.

އާއިލާ ވަރަށްގިނަ މީހުންނާއި ވަރަށްގިނަ އެކުވެރިންނާއި އަދި އޭނާގެ އަންހެންދަރިފުޅުގެ ކުލާހު ކުދިންނާއި އެކުދިންގެ ބެލެނިވެރިން އެގެއަށް ގޮސް އުޅުނު ދުވަހެކެވެ. އެއީ އެއަންހެން ކުއްޖާގެ އުފަންދުވަހެކެވެ. އެދުވަހު އެގޭގައި އެންމެން ތިއްބައި، މި ފިރިހެން ކުއްޖާއާއި އެކު އުޅުނު އެހެން ފިރިހެން ކުއްޖެއްގެ ބައްޕަ އައިސް އެ ކުއްޖާ ގޮވައިގެން ދަމުން، ބައްޕަ އާއި އެކު ނަމާދަށް ދާށޭ ބުންޏެވެ. އަދި މިހާރު ގަމަތްދޭން އުޅޭނޭ ވެސް ބުންޏެވެ. އޭރު އެގޭތެރޭގައި ވަރަށް ގިނަ މީހުން ތިއްބެވެ. އޭނާވެސް ހުރީ އެގޭތެރޭގައެވެ. އެ ފިރިހެންމީހާގެ އެއަޑާއި އެކު އޭނާއަށް ޒާތަކަށް ޖެހިލުންވެވުނެވެ. އޭނާގެ ފިރިހެންދަރި އޭނާއާއި ދިމާލަށް ބަލައިލުމަށްފަހު އެންމެންގެ ތެރޭގައި ބުނީ އޭނާގެ ބައްޕަ އެއީ ނަމާދު ނުކުރާ ކުއްޖެއް ކަމަށެވެ.

ހުރި ހިތާމައަކާއި ލަދެއްގެ ބޮޑުކަމާއިއެވެ! ތިމާ ލޯބިވާ ތިމާގެ އެ ކުޑަކުޑަ ދަރިފުޅު، އެންމެންގެ ތެރޭގައި ތިމާ ފަޟީހަތްކޮށްލީއެވެ. އާދޭހެވެ! އޭނާ ބުނާގޮތުންނަމަ އޭގެފަހުން ވަރަށްގިނައިން ދަރިފުޅު ގޮވައިގެން މިސްކިތަށް ދެވެއެވެ. ނަވެސް އަދި ހުރިހާ ނަމާދަކަށް ނުދެވެއެވެ. އޭނާ ބޭނުންވަނީ ކުރިން އުޅުނު އުޅުން އެއްކޮށް ދޫކޮށްލާ އިސްލާހުވާށެވެ. އެކަމަށް ނިޔަތްގަނެ އޭނާގެ ވިޔާނުދާ އެކުވެރިންނާއި އެކު އުޅުންވެސް ވީވަރަކުން މަދުކުރެވޭތޯ އޭނާ ބަލައެވެ.

މާތް ﷲ އޭނާއަށް ތެދުމަގު ދައްކަވާ ސާބިތުކަން މިންވަރު ކުރައްވާށިއެވެ. އަދި ކެތްތެރިކަމާއި ހިތްވަރު ދެއްވާ، އޭނާގެ ފާފަތައް ފުއްސަވާންދޭވެ! އަދި މިފަދަ ހާލަތުގައިވާ ހުރިހާ އެންމެނަށްވެސް އެމީހުން ބޭޒާރުވެ ފަލީހަތްވުމުގެ ކުރިން ހެޔޮވިސްނުން މިންވަރު ކުރައްވާށިއެވެ!