ދައްކަންވާނީ ދެއްކޭކަހަލަ ވާހަކައެވެ. މިހެން ބުނީމާ ބައެއްމީހުން ފަހަރުގައި ހައިރާންވެދާނެއެވެ. އެހެނީ ހަމަ ކޮންމެ ވާހަކައެއްވެސް ދެއްކޭނެތާއެވެ. އެހެންވިއްޔާ ދައްކާކަށް ވަކި ވާހަކައެއް ނޯންނާނެތާއެވެ. 

އާދޭހެވެ! ދައްކަންވާނީ ދެއްކޭކަހަލަ ވާހަކައޭ މި ބުނަނީ ބައެއްމީހުން ވާހަކަ ދައްކާއިރު، އިއްޔެއަކަށް ނުވިސްނައެވެ. މާދަމައަކަށް ނުވިސްނައެވެ. ވިސްނަނީ ހަމައެކަނި ވަގުތީ ހާލަތަށެވެ. ވަގުތީ މަންފާއަކަށެވެ. ވަގުތީ އުފަލާ އަރާމަށެވެ. ހާސިލްކުރަން ބޭނުންވާ ކަމެއް ހާސިލް ކުރުމަށް ހަމަ ކޮންމެ ވާހަކައެއްވެސް ދައްކަނީއެވެ. އިއްޔެ އެއާއި އިދިކޮޅަށް ވާހަކަ ދައްކާފައި، މާދަމާވެސް އެއާ އިދިކޮޅަށް ވާހަކަ ދައްކަން ޖެހޭނޭކަން އެނގޭ ހާލުގައިވެސް، މިއަދު އެއާ އެއްކޮޅަށް އެބަ ވާހަކަ ދައްކައެވެ. ތިމާގެ ކޮންމެވެސް އަމިއްލަ މަސްލަހަތެއް ހިމާޔަތްކޮށް ރައްކާކުރާށެވެ.

ދައްކަން މިއުޅެނީ މިވާހަކައެވެ. ދައްކަންވާނީ ދެއްކޭކަހަލަ ވާހަކައެވެ. އިއްޔެއާއި މާދަމާ އެ ވާހަކަ އަކަށް ތިމާ އިންކާރު ކޮށްފައިވާ އަދި ކުރާނޭ ވާހަކައެއް މިއަދު ތިމާއަށް، އެ ވާހަކައަށް އިންކާރުނުކޮށް ނުދެއްކޭނެއެވެ. ނަމަވެސް ހިތާމައަކީ މިފަދަ އެތައް ވާހަކައެއް އެތައްބަޔަކު ދައްކާކަމެވެ.

ތިމާމެން ކޮށްފައި ހުންނަ ކަންކަން، ވަކި މަގުސަދެއް ހާސިލް ކުރުމުގެ ބޭނުމުގައި، އެއީ ނުކުރާ ކަންކަން ކަމުގައި ބުނެ ވާހަކަ އެބަ ދައްކައެވެ. މިއީވެސް އެމީހަކަށް ދެއްކޭނެކަހަލަ ވާހަކައެއް ނޫނެވެ. މިފަދަ ވާހަކައެއް އެމީހަކަށް ނުދެއްކޭނެއެވެ. މިއީ ކަނޑައެޅިގެން ދޮގެވެ. އޮޅުވާލުމެވެ. މަކަރު ހެދުމެވެ. އަދި ކިއެއް އަމިއްލަ ނަފްސަށް އަނިޔާވެރިވުންވެސް މެއެވެ.

ތިމަ ތިމާމެންނަށް ނޭނގޭ އެތައްކަމެއް، ލަފަޔާއި ހީގެ މައްޗަށް ބިނާކޮށް އެބަ ދައްކައެވެ. އެވެނި ބަޔަކު އެވެނި ކަމެއް ކުރާމަނަ އެހެން ވާނެއޭ ބުނެ ވާހަކަ ދައްކަނީ މާޒީގައި އެކަމެއް އެހެން ވެފައި އޮތަތީއެއްވެސް ނޫނެވެ. އަދި މުސްތަގުބަލުގައި އެކަމެއް ވެދާނޭ ކަމުގެ އިޝާރާތެއްވެސް އޮތަތީއެއް ނޫނެވެ. ހަމަ ދައްކަނީއެވެ. ތިމާ ހާސިލް ކުރަން ބޭނުންވާ ނަތީޖާއެއް ހާސިލް ކުރުމަށްޓަކައި ހަމަ ދައްކަނީއެވެ. ނަމަވެސް މިއީ އޭނާއަށް ދެއްކޭނޭ ކަހަލަ ވާހަކައެއް ނޫނެވެ.

މިފަދަ ކަންކަން މިހެން ހުރުމާއެކު، ދަންވަނަން މި ޖެހެނީ، ދައްކަންވާނީ ދެއްކޭކަހަަލަ ވާހަކައެވެ. ތިމާއަށް ނުދެއްކޭކަހަލަ ވާހަކަތަކެއް ހުންނާނެއެވެ. ފަހަރުގައި އެވާހަކަތައް އެހެން މީހުނަށް ދެއްކިދާނެއެވެ. ތިމާއަށް އެވާހަކަތައް ނުދެއްކެނީ ތިމާގެ ސަބަބުންނެވެ. ތިމާގެ ކަންކަން ހުރި ގޮތެއްގެ ސަބަބުންނެވެ. އަދި ތިމާގެ ކަންނެތްކަމާ ތިމާގެ އަމިއްލަ އެދުން ބޮޑުކަމުގެ ސަބަބުންނެވެ.