އަންހެނުންނަކީ ޝައްކެއްވެސް ނެތި މުޖުތަމައުގައި ވަރަށް މުހިއްމު ރޯލެއް ކުޅޭ، ހިތްވަރުގަދަ، ކެރޭ ބަޔެކެވެ. ދަރިންނާއި އާއިލާ ބަލަމުން ވަޒީފާ އަދާ ކުރާ ނުވަތަ އަމިއްލަ މަސައްކަތްކުރާ އަންހެނުން މަދެއް ނޫނެވެ. ކޮންމެ ދިމާލަކަށް ލޯ ހިންގާލި ކަމުގައި ވިޔަސްވެސް އަންހެނުންގެ ކުޅަދާނަކަން ފެނެއެވެ. 

އަންހެނުންގެ ދުވަހަކީ ކޮންމެ އަހަރަކުވެސް މާރޗް މަހުގެ 8 ވަނަ ދުވަހު މުޅި ދުނިޔޭގައިވެސް ފާހަގަ ކުރަމުން އަންނަ ދުވަހެކެވެ. މި ދުވަހާއި ގުޅިގެން ގިނަ އޮފީސްތަކުގައި އެކި އެކިހަރަކާތްތައް ބާއްވާ، އަންހެން މުވައްޒިފުންނަށް ހަދިޔާ ދިނުމައި ކޭކު ފެޅުންފަދަ ކަންކަން އޮވެއެވެ. މީގެ އިތުރުން ޓީވީ އަދި މީސްމީޑިއާގައި އަންހެނުންނާއި ބެހޭ އެކި ޕްރޮގްރާމްތަކާއި ޕޯސްޓުތަކުން ފުރާލައެވެ. މިފަދަ ޕްރޮގްރާމާއި ޕޯސްޓްތަކުން ރާއްޖޭގައި ކާމިޔާބު، ކުޅަދާން، ނަން ވިދާލާ އެތައް ކަނބަލުންނެއް ފާހަގަ ކޮއްލައެވެ. 

އަންހެނުންގެ ދުވަސް އަންްނަނީ ހަމަ އެކަނި ވަޒީފާ ތަކުގައި އުޅޭ އަންހެނުންށާއި ކާމީޔާބު އަންހެނުންނަށްތޯ ހިތުގައި ސުވާލު އުފެދެއެވެ. ސަބަބަކީ ގޭގައި ވަޒީފާއަށް ނުގޮސް އާއިލާ އާއި ދަރިންގެ ހިދުމަތުގައި ތިބޭ އަންހެނުންގެ މަތިން ގިނަ މީހުން ހާނދާން ނުހުންނާތީވެއެވެ. އެމީހުން އެކުރާ މަސައްކަތާއި ހިތުމަތަކީ ވަޒީފާއެއްގައި ކުރާ މަސައްކަތާއި އަޅާ ކިޔާއިރު އެއްވެސްއެއްޗެއް ނޫން ކަމަށް ދެކޭ މީހުންވެސް އުޅެއެވެ. ގޭގައި ހުންނަ އަނބި މީހާއަށް އަންހެނުންގެ ދުވަހާއި ގުޅިގެން އެންމެ ކުޑަމިނުން ބަހެއްވެސް ބުނެނުލާ، އޮފީހުގައި އުޅޭ އަންހެންނުންނަށްމިދުވަސް ފާހަގަކޮށްދިނުމަށް ކަންކަން ރާވާ ފިރިންވެސް އުޅެއެވެ. މީ ވަރަށް ހިތާމަ ހުރި ކަމެކެވެ. އަންހެނުންގެ ދުވަސް ފާހަގަ ކޮށްދޭން ޖެހެނީ ހަމައެކަނި ވަޒީފާ ތަކުގައި އުޅޭ އަންހެނުންނަކަށް ނޫނެވެ. މިއީ ހުރިހާ އަންހެނުންނަށްވެސް އަންނަ ދުވަހެކެވެ. އޮފީހުގައި އުޅޭ ކަނބަލުންނާއި ގޭގައި ތިބޭ ކަނބަލުން ހަމަ ހަމަ ވާން ޖެހެއެވެ. ވަޒީފާއަކަށް ނުގޮސް ގޭގައިހުރެގެން އާއިލާއަށް ކޮށްދޭ ހިދުމަތަކީ އެއްގޮތަކަށްވެސް ކުޑަ ކަމެއް ނޫނެވެ. އަންހެނުން ބާރުވެރިކުރުވަން މަސައްކަތް ކުރަންވީ ހަމައެކަނި މަސައްކަތުގެ މާހައުލަކު ނޫނެވެ. 


ފާހަގަކޮށްލަން ބޭނުމީ އަންހެން ޖިންސަށް ނިސްބަތްވާ ކޮންމެ އަންހެނަކަށްވެސް ހަންހެނުންގެ ދުވަސް ހައްގުވާނެ ކަމެވެ. ކޮންމެ އަންހެނަކީވެސް މަންމައެއް، ދައްތައެއް، މާމައެއް، ކޮއްކޮއެއް، ބޮޑުދައިތައެއް ނުވަތަ ފަހަރިއެއް ފަދަ ކޮންމެވެސް އެއް ޒިންމާއެއް އަދާ ކުރާ އަންހެނެކެވެ. ވަޒީފާތަކުގައި އުޅޭ އަންހެނުންނެކޭ އެއްފަދައިން ކޮންމެ އަންހެނަކަށްވެސް މިދުވަސް ހާއްސަ ކޮށްދެއްވާށެވެ. ވަޒީފައި ތަކުގައި ބުރަ މަސައްކަތް ކުރަމުން، އާއިލާ ބަލަހައްޓާ އަހެނުން ކުރާ ބުރަ މަސައްކަތާއި، ގޭގައި އާއިލާއަށް ޓަކައި އެތައް ގުރުބާނީއެއް ވަމުން އަންނަ އަންހެނުންނަށް އެމީހުން އެކުރާ ހިދުމަތުގެ އަގު ވަޒަންކޮށްދެއްވާށެވެ.