ކޮންމެ ގައުމެއްގައިވެސް އެ ގައުމެއްގައި އޮންނަ ދިރިއުޅުމުގެ ވައްޓަފާޅި ތަފާތެވެ. އެގޮތުން މި ދިވެހިރާއްޖޭގައިވެސް މި އޮންނަނީ ތަފާތު ވައްޓަފާޅިއެކެވެ. ނަމަވެސް ދިވެހިންގެ ދިރިއުޅުމުގެ ވައްޓަފާޅީގެ ތެރެއަށް އެތައް ނުފޫޒެއް މިއަދު ދަނީ ފޯރަމުންނެވެ. ދިވެހިންގެ ދިރިއުޅުމުގެ ވައްޓަފާޅީގެ އެއް ބަޔަކީ އިސްލާމް ދީނެވެ. ހުޅަނގުގެ ގޮތްތަކަކީ މި ވައްޓަފާޅީގެ ބައެއް ނޫނެވެ. ނަމަވެސް މިއަދު މިއީ ބޮޑު ނުފޫޒެއް ފޯރުވާ ކަމެއް ކަމުގައި ވެއްޖެއެވެ.

ދިވެހިންނަކީ 1153ވަނަ އަހަރުންފެށިގެން އިސްލާމްދީނުގެ މަތީގައި ސާބިތުވެ ތިބި ގައުމެކެވެ. ސައްތައިންސައްތަ އިސްލާމީ ގައުމެއް ކަމަށް ދައުވާކޮށް ވަކާލާތު ކުރަމުން އަންނަ ގައުމެކެވެ. ނަމަވެސް އިސްލާމްދީނުގެ ސާފު އަޤީދާއަށް ބުރުއަރާ އެތައްކަމެއް މި ގައުމުގައި ހިނގަމުން އެބަ ދެއެވެ. ހައްތަހާވެސް ހުޅަނގުގެ ނުފޫޒެވެ. މިވާހަކަތައް ނޫސް މަޖައްލާތަކުގައި އަމުދުން ދައްކާތީ ނުފެނެއެވެ.

މި ގައުމުގެ ގާނޫނު އަސާސީ ބުނާގޮތުން ބޮޑު މީހެއްކަމަށް ކަނޑައަޅަނީ އުމުރުން 18 އަހަރު ވުމުންނެވެ. ކައިވެންޏެއް ކުރެވެނީވެސް 18 އަހަރު ވުމަށްފަހުގައެވެ. މިކަމުގައި މާބޮޑު ގޯހެއް ނެތެވެ. ނަމަވެސް ގޯސްވާ ހިސާބެއް އެބަ އާދެއެވެ. މިވާހަކަވެސް މިއީ މާ ގަދަޔަށް ދައްކާ ވާހަކައެއް ކަމުގައި ނުވެއެވެ.

18 އަހަރު ވުމުގެ ކުރިން ކައިވެންޏެއް ކޮއްފިނަމަ އެއީ ބޮޑު ގޯހެއް ކަމުގައި ވެދެއެވެ. ނަމަވެސް ކައިވެނި ނުކޮށް، ލޯބީގެ ގޮތުން ގުޅިގެން، އެކަހެރިވުމާއި ސިއްރުން ބައްދަލު ކުރުމާއި ކޮޓަރިތަކަށް ދިއުން އެއީ ގޯހެއް ކަމުގައި ނުވެއެވެ. މި ދައްނަވަނީ ބަޔަކު ޒިނޭ ކުރާ ވާހަކައެއް ނޫނެވެ. ނަމަވެސް ކައިވެނި ނުކޮށް، އެފަދަ ގުޅުމެއް ހިންގައިފިނަމަ އެއަށް ޒިނޭ ނޫން އެހެން އެއްޗެއް ނުކިޔޭނެތާއެވެ. ގޯސް ވަނީ މިހިސާބުންނެވެ. 18 އަހަރު ވުމުގެ ކުރިން ކައިވެނި ކުރުން ގޯސްވެފައި، ލޯބީގެ ގޮތުން ގުޅި، ގުޅުންތަކެއް ބޭއްވުމަށް މުޖުތަމައު ރުހި ގަބޫލުވާތީއެވެ.

އެންމެން ދަންނަ އެއް ހަގީގަތަކީ އިންސާނަކު ބާލިޣުވުމަށްފަހު، އެ އިންސާނެއްގެ ޖިންސީ އެދުންވެރިކަން އުފެދި، އެކަން އެމަގުން ހިނގާނެ ކަމެވެ. އެއީ 18 އަހަރު ވަންދެން ހިމޭނުން ހުންނަ ހިއްސެއް ނޫންކަމެވެ. ދިވެހިރާއްޖޭގައި ކައިވެނި ކުރެވޭ އުމުރަކީ 18 އަހަރު ކަމުގައި ހަދާފައި އޮންނަނީވެސް ކޮންމެވެސް ސަބަބަކައްޓަކައެވެ. އެ ގާނޫނަށް އިހްތިރާމު ކުރަންވާނެއެވެ. ނަމަވެސް ހިތާމަ އަކީ އިސްލާމް ދީނަށް އިހްތިރާމު ނުކުރާތީއެވެ. 18 އަހަރު ނުފުރޭ ކިތައް ކުދިން، ލޯބީގެ ގޮތުން ގުޅި، ކައިވެނިން ބޭރުގައި ގައިގޯޅިވެ އުޅޭ ހެއްޔެވެ؟

ފާހިޝް ކަންކަން އެއީ ގޯސްކަމެއް ކަމުގައި ނުދެކި، އެއީ އާދައިގެ އާއްމު ކަމެއް ކަމުގައި ދެކި، ހަލާލު ކަންކަން އެއީ އަދި ގޯހެއް ކަމުގައި ދެކެވޭ ދެކެވުމަކީ މާ ބޮޑު ގޯހެކެވެ! މުސްލިމެއްގެ ހައިސިއްޔަތުން ލަދުގަންނަން ޖެހޭނެ ކަމެކެވެ. މުޖުތަމައުގައި ހުޅަނގުގެ ވައްޓަފާޅި އެއީ މާ ކަމުދާ ވައްޓަފާޅިއެއް ކަމުގައި ދެކުން އެއީ ބޮޑު ގޯހެކެވެ.