އަދުގެ ޒުވާނުންގެ ތެރޭގައި އާންމުކޮށް ފެންނަ އެއްކަމަކީ ކިޔެވުން ނިމެންދެން ކައިވެނިނުކޮށް ހުރުމެވެ. ގިނަ ޒުވާނުން ޤަބޫލުކުރާ ގޮތުގައި ކައިވެނި ކުރުމަކީ ކިޔެވުމަށް ހުރަސްއެޅޭނެ ކަމެކެވެ. ނަމަވެސް މިއީ ރަނގަޅު ވިސްނުމެއް ނޫނެވެ. ޙަޤީޤަތުގައި ކައިވެނި ކުރުމަކީ ކިޔެވުމަށް ހުރަހަކަށް ވާންޖެހޭނޭ ކަމެއް ނޫނެވެ. އަދި ކިޔެވުން ނިމެންދެން ނުވަތަ ވަކި ކަމެއް ނިމެންދެން ކައިވެނި ނުކޮށް ލަސްކުރުމީ އިސްލާމްދީންވެސް ބާރުއަޅާ ކަމެއް ނޫނެވެ.

އިސްލާމްދީނުގައި ކައިވެނި ކުރުމަކީ ޝަރުޢު ކުރައްވާފައިވާ ކަމެކެވެ. ކީރިތި ރަސޫލާ ޞައްލަ ﷲ ޢަލައިހި ވަސައްލަމަ ވަނީ ޒުވާނުންނަށް ކައިވި ކުރުމަށް ގޮވާލާ އެކަމަށް އަވަސްވެގަތުމަށްވެސް އިޝާރާތްކުރައްވާފައި ކަމަށް ގިނަ ޢިލްމުވެރިންވެސް ވިދާޅުވެއެވެ.

ކައިވެނި ކުރުމުން ލިބޭ ގިނަގުނަ ފައިދާތައް ވެއެވެ. އޭގެ ތެރޭގައި ނަފްސާނީ އަދި ޖިސްމާނީ ދުޅަހެޔޮކަން، އިޖްތިމާޢީ ގުޅުންތައް ބަދަހިވުން، އަދި ޒިނޭގެ ފާފައިން ރައްކާތެރިވުން ހިމެނެއެވެ. މީގެ އިތުރުން، ކައިވެނި ކުރުމުން ލިބޭ އުފާވެރިކަމާއި ހިތްހަމަޖެހުމަކީ ކިޔެވުމަށް ހިތްވަރު ލިބޭނެ ކަމެކެވެ.

ކައިވެނި ކުރުމަކީ ކިޔެވުމަށް ހުރަހަކަށް ވާންޖެހޭނޭ ކަމެއް ނޫނެވެ. ގިނަ މީހުން ކައިވެނި ކޮށްގެން ތިބެ ކާމިޔާބުކަމާއެކު ކިޔަވައި ނިންމާފައިވެއެވެ. މިކަމަށް ބޭނުންވަނީ ދިރިއުޅުން ތަރުތީބު ކުރުމާއި، ވަގުތު ބެހުމާއި، އަދި ދެމަފިރިންގެ އެއްބާރުލުމެވެ. ކައިވެނި ކޮށްގެން ތިބެ ކިޔެވުމުން ލިބޭ އިތުރު ފައިދާއަކީ އެކަކު އަނެކަކަށް ދޭ ހިތްވަރާއި އެހީތެރިކަމެވެ.

ނަމަވެސް، ކައިވެނި ކުރުމުގެ ކުރިން ވިސްނަންޖެހޭ ބައެއް ކަންތައްތައް ވެއެވެ. އެއީ މާލީ ޤާބިލުކަން ހުރިތޯ އާއި، ޒިންމާ އުފުލުމުގެ ޤާބިލުކަން ހުރިތޯ އާއި، އަދި ކިޔެވުމާއެކު ޢާއިލީ ޒިންމާތައް އަދާ ކުރުމުގެ ޤާބިލުކަން ހުރިތޯ އެވެ. މި ކަންކަމަށް ރަނގަޅަށް ވިސްނައި ފިކުރުކޮށް، ކައިވެންޏާއިގެން ކުރިއަށްދިއުން މުހިންމެވެ.

ކިޔެވުން ނިމެންދެން ކައިވެނި ނުކޮށް މަޑުކުރާކަށް ނުޖެހެއެވެ. ކައިވެނި ކުރިޔަސް ކިޔެވިދާނެއެވެ. މުހިންމީ ރަނގަޅަށް ވިސްނައި، ރާވައި އަދި އެކަށީގެންވާ ގޮތެއްގައި ކަންކަން ކުރިޔަށް ގެންދިއުމެވެ. ކައިވެނި ލަސްކުރުމުން ލިބިދާ ހުރިހާ ގެއްލުމަކުން އަހަރެމެން ދުރުވާން ޖެހެއެވެ. ކައިވެނި ނުކޮށް ހުރެމެ، ފާހިޝް ކަމަކަށް އަރައިގަނެވިއްޖެނަމަ، އެއީ އަދި މާ ބޮޑު ވޭނެކެވެ. އެކަމުން އުފުލަން އެ ޖެހެނީ މާ ބޮޑު ތަކުލީފެކެވެ. ކައިވެނި ކޮށްގެން ހުރެ ކިޔެވުމަށްވުރެ އެތައް ގުނައަކުން ބޮޑު ތަކުލީފެކެވެ. އެހެންކަމުން ކައިވެނި ނުކޮށް ލަސްނުކުރާށެވެ! ކައިވެނި ކުރިޔަސް ކިޔެވިދާނެއެވެ!