އިންސާނާގެ ދިރިއުޅުމުގައި އެންމެ މުހިންމު އެއް ދައުރެެއް އަދާކުރާ އެއް ތަނަކީ ފާހާނާއެވެ. ފާހާނާއަކީ އަޅުގަނޑުމެންގެ ޒާތީ އެތައް ކަމެއް އެތަނަކާއި ގުޅިފައިވާ ތަނެކެވެ. އަދި ހަށިގަނޑުގެ ސާފުތާހިރުކަން ދެމެހެއްޓުމަށް އެންމެ ބޮޑަށް ބޭނުންކުރާ ތަނެވެ. ނަމަވެސް، ގިނަ މީހުން ފާހާނާގެ ސާފުތާހިރުކަމަށް އެކަށީގެންވާ ސަމާލުކަމެއް ނުދެއެވެ. މި ލިޔުމުގައި ބަލައިލާނީ ފާހާނާގެ ސާފުކަމުގެ މުހިންމުކަމާއި، އެކަމުން އަޅުގަނޑުމެންގެ ޝަޚްޞިއްޔަތަށް ކުރާ އަސަރާ ބެހޭގޮތުންނެވެ.

ފާހާނާގެ ސާފުކަމަކީ ހަމައެކަނި ލޮލަށް ރީތިވާ ކަމެއް ނޫނެވެ. އެއީ ޞިއްޙީ ގޮތުން ވެސް ވަރަށް މުހިންމު ކަމެކެވެ. ސާފު ނޫން ފާހާނާއަކީ ބެކްޓީރިއާއާއި ވައިރަސްތައް އުފެދި، ގިނަވާނެ ތަނެކެވެ. މިފަދަ ތަނެއް ބޭނުންކުރުމުން އެކި ބާވަތުގެ ބަލިތަކަށް މަގުފަހިވެއެވެ. އެހެންކަމުން، ފާހާނާ ސާފުކޮށް ބެލެހެއްޓުމަކީ އަޅުގަނޑުމެންގެ ޞިއްޙަތު ރައްކާތެރިކުރުމަށް ކުރެވޭނެ މުހިންމު ކަމެކެވެ.

ފާހާނާގެ ސާފުކަމުން އަޅުގަނޑުމެންގެ ޝަޚްޞިއްޔަތާ ދޭތެރޭ އެހެން މީހުން ދެކޭގޮތަށް ވެސް ބޮޑު އަސަރެއް ކުރެއެވެ. ސާފު ފާހާނާއެއް ހުރި ގެއަކަށް ވަންނަ މީހަކަށް އެ ގޭގެ ވެރިންނަކީ ސާފުތާހިރުކަމަށް އަހައްމިއްޔަތުކަން ދޭ ބައެއްކަން އެނގެއެވެ. މިއިން އެ ގޭގެ މީހުންގެ އަޚްލާޤާއި ސުލޫކު ރަނގަޅުކަން ދޭހަވެއެވެ. ނަމަވެސް، ހަޑިވެފައިވާ ނުސާފު ފާހާނާއެއް ހުރި ގެއަކުން ފެންނަނީ އޭގެ އިދިކޮޅު މަންޒަރެވެ.

އިސްލާމްދީނުގައި ވެސް ސާފުތާހިރުކަމަށް ވަރަށް ބޮޑު އަހައްމިއްޔަތުކަމެއް ދެއެވެ. އިސްލާމް ދީނުވައި ވަނީ ސާފުތާހިރުވުމަކީ އީމާންކަމުގެ ދެބައިކުޅައެއްބައި ކަމުގައެވެ. މި ކަމުން އެނގެނީ ސާފުތާހިރުކަމަކީ އަޅުކަމެއްގެ ގޮތުގައި ވެސް ބެލެވޭ ކަމެއްކަމެވެ. އެހެންކަމުން، ފާހާނާ ސާފުކޮށް ބެލެހެއްޓުމަކީ ދީނީ ގޮތުން ވެސް ބާރުއަޅާ ކަމެކެވެ.

ކޮންމެއަކަސް އިންސާނެއްގެ ކިބައިގާ ކުޑަނަމަވެސް ސާފުތާހިރުކަމުގެ ސިފައެއް ހުރިނަމަ، އޭނާ ބޭނުންކުރާ ފާހާނާ ހަޑިވިޔަކަ ނުދޭނެެއެވެ. ބޭރުފުށުން މޫނުގެ ކުލަ އަލިކޮށް ބުމަ ކަޅުކޮށް އިސްތަށިގަނޑުގައި ދަޅައަޅުވާލައިފައި މާ ރީތި މީހެއް ކަމަށް ދެއްކިގެން އުޅުނަސް، ތިބާގެ ފާހާނާގެ ތާހިރުކަން ކުޑަނަމަ، ތިބާއީ މާ ރީތި މީހެއްކަމަކަށް ނުވާނެެެއެވެ.