ކޮންމެ މީހަކީ ވެސް ދިރިއުޅުމުގައި ކޮންމެވެސް ކަމެއް ހާސިލުވުމަށް މަސައްކަތް ކުރާ މީހެކެވެ. އުއްމީދު ތަކެއް ކުރާ މީހެކެވެ. އަޒުމެއް ކަނޑައަޅައި އެކަމެއް ހާސިލު ކުރުމަށްޓަކައި ގިނަ ކަންކަންވެސް ކުރެއެވެ. ނަމަވެސް ކާމިޔާބު ނުލިބި ލަސްވުމާއި ކާމިޔާބު ވާނޭ ކަމުގެ އުއްމީދު ގެއްލުމާއެކު ކުރެވުނު ހުރިހާ މަސައްކަތެއް ފެނަށް ވެގެން ދެއެވެ. ކަމެއް ކާމިޔާބު ކުރުމުގައި ލަނޑުދަނޑިތަކެއް ކަނޑަ އެޅުމުގެ މުހިންމުކަމަކީ އެއީއެވެ. ނަމަވެސް އެ ލަނޑުދަނޑިތައް ކަނޑަ އެޅުމުގައި ކޮންމެވެސް އެއް ހިސާބަކުން މައްސަލަ އުޅުމުގެ ސަބަބުން މި ދެންނެވި ފަދައިން ނާކާމިޔާބާ ކުރިމަތިލާން ޖެހިދެއެވެ. މި ލިޔުމުގައި އަލި އަޅުވައިލަން ގަސްތު ކުރަނީ ކާމިޔާބު ވުމަށް ލަނޑުދަނޑިތަކެއް ކަނޑަ އަޅާނޭ ގޮތްތަކަކަށެވެ.

ހާސިލް ކުރަން ބޭނުންވާ ކަމެއް ކަނޑައަޅާށެވެ.

ފުރަތަމަ މަރުހަލާއަކީ ކަމެއް ކަނޑަ އެޅުމެވެ. ކުރަން ބޭނުންވާ ކަމެއް ހިތުލާ ހިސާބަކީ ފެށުން ކަމަށް ބެލެވިދާނެއެވެ. އެކަމަކު ކަމެއް ކަނޑައެޅުމުގައި ތިމާ އަކީ މާ މޮޅު މީހަކަށް ވާކަށް ނުޖެހެއެވެ. އަދި ކުރާން އުޅޭ ކަމަކީ އާދަޔާ ޚިލާފު ކަމަކަށްވެސް ވާކަށް ނުޖެހޭނެއެވެ.

ކުރަން އުޅޭ ކަމެއް ސާފުވާން ޖެހޭނެއެވެ.

ކަމެއް ކަނޑައަޅަނީ ތިމާ ކަމަށްވެފައި އެއީ ކޮންކަމެއްކަން ތިމާއަށް ވެސް ސާފު ނުވާނަމަ އާޚިރު ނަތީޖާއަކަށް ވާނީ އެއްވެސް ތާކަށް ލައްވައިނުލުމެވެ. އެހެންކަމުން ކުރަން އުޅޭ ކަމެއް ފެށުމުގެ ކުރިން ސާފު ވާން ޖެހެއެވެ. މިސާލަކަށް ކޮންމެ ދުވަހަކު ހެނދުނު ހޭލައި ގަވާއިދުން ދުވެ ކަސްރަތު ކުރަމުން ދިޔަސް ދެން ބަލަން ޖެހޭ އެހެން ކަންކަމަށް ނުބެލޭނަމަ ހިކޭނެތޯއެވެ؟ ހަށިގަނޑުން ސަރުބީ އެންދުމުގެ ބޭނުމުގައި ކަސްރަތު ކުރިޔަސް، އޭގެ ފަހުން ހެއްދެވިހާ އެއްޗެއް ކާނަމަ، ހަގީގަތުގައި ކުރަން އުޅޭ ކަމެއް ސާފު ނުވަނީއެވެ.

ބޮޑުކޮށް ވިސްނާށެވެ.

ދިރިއުޅުމުގައި ފަސޭހައިން އެއްވެސް ކަމެއް ނުވާނެއެވެ. އެހެންކަމުން ކަމެއް ކުރަން އުޅޭއިރު، ވީހާވެސް ފުޅާ ދާއިރާއެއްގައި ވިސްނުން ބަހައްޓާށެވެ. އެއްވެސް ކަމަކީ ނުކުރެވޭނެ ކަމެއް ނޫންކަމުގައި ސިކުނޑިއަށް ވިސްނައިދޭށެވެ. ކަމެއް ކުރަން އުޅޭއިރު ވަރަށް އަވަހަށް ސިކުނޑި އެކަމުން ބަރީޢަވުމަށް މަސައްކަތް ކުރާނެއެވެ. އެއީ ނުކުރެވޭނޭކަމެއްކަން ވިސްނައިދޭން އުޅޭނެއެވެ. ނަމަވެސް، އެކަމުން ސަލާމަތްވެ އެ ކަމަކީ ކުރެވިދާނެކަމެއްކަން އަމިއްލަ ނަފްސަށް ވިސްނައިދޭށެވެ.

މުހުލަތެއް ކަނޑައަޅާށެވެ.

ކަމެއް ކުރަން ފަށާއިރު އެކަމެއް ކާމިޔާބު ކަމާއެކު ނިންމާލުމަށް އެންމެ ބޮޑު އެއްބާރުލުމެއް ނުވަތަ އެހީތެރިކަމެއް ފޯރުކޮށްދޭ އެއް ކަމަކީ އެކަމެއް ނިންމާނެ ދުވަހެއް ކަނޑައެޅުމަށްފަހު ފެށުމެވެ. އެހެން ނޫންކަމަށްވާނަމަ، ކުރަން އުޅޭ ކަމެއް ނުނިމި ދިގުލައި ހިނގައިދާނެއެވެ. ނުވަތަ ނިމޭނޭ ދުވަހެއް ނާންނާނެއެވެ. ވަކި ދުވަހަކަށް ނިންމަން އަޒުމް ކަނޑައެޅުމުން ކަންކަން ރާވާލައިގެން ކުރިޔަށްވެސް ގެންދެވޭނެއެވެ.

ޤުރުބާން ކުރާނޭ ކަންކަން ނިންމާށެވެ.

 ކަމެއް ހާސިލް ކުރަން ކަނޑައަޅައިގެން ކުރިޔަށް ދާއިރު ކިތަންމެ ކަމެއް ޤުރުބާން ކުރަންވެސް ޖެހެއެވެ. މިސާލަކަށް ހިކެން ބޭނުންވެގެން ފަތިހާ ދުވަން ތެދުވާނަމަ، ފަތިހުގެ ނިދި ޤުރުބާން ކުރަން ޖެހެއެވެ. ބަރުދަން ލުއިކުރަން އެދޭނަމަ، މީރު ކޮންމެ އެއްޗެއް ނުކެވޭނެއެވެ. ސަރުބީ ލިބޭ ލުއި ކާނާތައް ކިތަންމެ ކާހިތްވިޔަސް ދޫކޮށްލަން ޖެހެއެވެ. އެހެންކަމުން، ކަމެއް ހާސިލު ކުރުމަށް ދޫކޮށްލަން ޖެހޭ ކަންކަން ކަނޑައަޅާ އެކަންކަމުން ދުރުހެލިވާންވެސް ޖެހެއެވެ.

ކުރާ ކަންކަން ބަލަހައްޓާށެވެ.

ވަކި ގޮތަކަށް ކަމެއް އަދި ކުރަމުން އައެއް ކަމަކު އެކަންކަން ގަވާއިދުން ނުބެލެހެއްޓޭނަމަ، ކުރިޔަށް ދިޔުމުގައި ދަތިތަކެއް އަންނާނެއެވެ. އުޅެވެނީ ކިހާ ހިސާބެއްގައިކަން ނޭނގުމާއި، މި ކުރެވެނީ ރަނގަޅު ކަންތައް ރަނގަޅު ވަގުތުގައި އެންމެ އެކަށީގެންވާ މިންވަރަށްކަން ނޭނގުމުގެ ސަބަބުން ނޭދެވޭ އަސަރުތަކެއް ކުރުމަކީ ވެދާނެކަމެކެވެ. މިސާލަކަށް ކަސްރަތު ކުރާނަމަ، އެޕްލިކޭޝަނެއް ބޭނުން ކުރުމަކީ ވަރަށް އެދެވޭ ކަމެކެވެ. އޭރުން ކޮންމެ ދުވަހަކު ކަސްރަތު ކުރަން ޖެހޭ މިންވަރު ދެނެގަނެވި އެ މިންވަރަށް ކުރެވޭނެއެވެ. އަދި ފަހުން ބަލައިލާ އިސްލާހު ކޮށްލަން ޖެހޭ ކަންކަން ދެނެގަންނަން ފަސޭހަވާނެއެވެ.

ބާރު އަޅާނެކަމެއް ކުރެވިދާނެއެވެ.

ކުރަން އުޅޭ ކަމެއް ކަނޑައަޅައި އެކަމަށް ތާވަލެއް ހަދައި އަދި ކަންކަން ކުރެވޭ ގޮތް ގަވާއިދުން އަމިއްލައަށް ބެލެހެއްޓިއެއް ކަމަކު، ލަނޑުދަނޑި ހާސިލު ކުރުމުގައި ނާކާމިޔާބުވުމަކީ ކައިރި ކަމެކެވެ. އެހެނީ އަތުން ގެއްލޭ އިތުރު ކަމެއް ނެތުމުންނެވެ. ނާކާމިޔާބު ވެއްޖެ ނަމަ އަނެއްކާވެސް ފެށިދާނޭ ކަމުގެ ވިސްނުން އޮންނާނެތީއެވެ. އޭގެ ބަދަލުގައި ކަނޑައަޅާ ލަނޑުދަނޑިތަކަށް ހާސިލު ނުވެއްޖެނަމަ ކުރާނޭ ކަމެއް ކަނޑައެޅިދާނެއެވެ. މިސާލަކަށް މީހަކަށް ނުވަތަ ބަޔަކަށް ކެއުމެއް ދޭން ކަނޑައެޅިދާނެއެވެ. ނުވަތަ ކުރަން ހިތް ނޭދޭ ކަމެއް ކުރާނަމޭ ކަނޑައެޅިދާނެއެވެ.

ކުރިޔަށް ދާގޮތް ބަލާށެވެ.

ކަމެއް އަދި ކުރަން ކަނޑައަޅައިގެން ކުރިޔަށް ދިޔަޔަސް އެންމެ އެދެވޭ ނަތީޖާއެއް ނުލިބިދާނެއެވެ. އެހެންކަމުން ވަކި މުއްދަތު ތަކެއް ކަނޑައަޅައި އެ މުއްދަތު ތަކުގައި ކަންކަން ކުރިޔަށް ދާގޮތް މުޠާލިއާ ކޮށްލާށެވެ. ކަންކަން ދަނީ ރަނގަޅު މަގުންތޯ ބަލާށެވެ. ނޫންނަމަ، ރަނގަޅު މަގަށް ހެޔޮ ކޮށްލާށެވެ. އޭރުން އެ ހުރީ ރަނގަޅަށެވެ. އަދި އިސާހިތަކު ކާމިޔާބުގެ ޓަކި ޖަހައިދާނެއެވެ.