ކޮވިޑް-19 ގެ ބަލިމަޑުކަމަށް ހާއްސަ ވެކްސިން އުފެއްދި އެސްޓްރަޒެނަކައާ ގުޅިގެން ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އިން ފުއްޕާމޭގެ ބަލިތަކަށް ހާއްސަ ބޭހެއް ނެރެފި އެވެ.

މި ބޭސް ނެރެފައިވަނީ ޑިސެމްބަރު 7 ގައެވެ. އެސްޓީއޯއިން ލޯންޗްކޮށްފައި ވަނީ 'ސިމްބިކޯޓް ޓާބިއުހޭހަރ' އަދި 'ޕަލްމިކޯޓް ރެސްޕިއުލްސް' ކިޔާ ބޭސްތަކެކެވެ.

މީގެ ތެރެއިން ސިމްބިކޯޓް ޓާބިއުހޭހަރއަކީ އިންހޭލަރެކެވެ. އަނެއް ބޭހަކީ ދިޔާ ބޭހެކެވެ. 

އެގޮތުން، ސިމްބިކޯޓް ޓާބިއުހޭހަރއަކީ އެޑްވާންސްޑް ޑްރައި ޕައުޑަރ އިންހޭލަރެކެވެ. މިއީ، އަސްތުމާ ނުވަތަ އެނޫންވެސް ބައްޔެއްގެ ސަބަބުން ކުއްލިކުއްލިއަށް ނޭވާ ނުލެވޭ ހާލަތުގައި ބޭނުންކުރާ ބޭސްތަކަށްވުރެ މާ އަވަސް، އަދި މާ އަރާމު ތަސައްލީއެއް ފޯރުކޮށްދޭނެ އިންހޭލަރެއް ކަމަށް އެސްޓީއޯއިން ބުންޏެވެ. 

ދެން ނެރުނު ޕަލްމިކޯޓް ރެސްޕިއުލްސްއަކީ ހަ މިނެޓު ތެރޭގައި ނޭވާލާ ހޮޅީގެ ތެރޭގައި އުފެދިފައި ހުންނަ ދަވަތައް ވިރުވާލަދޭނެ ބޭހެއް ކަމަށް އެސްޓީއޯއިން ބުންޏެވެ. ހަމައެއާއެކު، މި ބޭހުގެ ސަބަބުން ވަރުގަދަ 'ޕަލްމޮނަރީ ވޭސޯކޮންސްޓްރިކްޓިވް' އަސަރެއް، ބޭސް ބުއިމުގެ 30 މިނެޓު ތެރޭގައި ކުރާ ކަމަށް އެސްޓީއޯއިން މައުލޫމާތު ދެއެވެ. ޕަލްމޮނަރީ ވޭސޯކޮންސްޓްރިކްޝަނަކީ، ނޭވާލަ ވައިގެ ތެރެއިން ފުއްޕާމޭގެ ބަޔަކަށް ރަނގަޅަށް ވައި ނުލިބޭ، ނުވަތަ އެ ބައިން ނޭވާކާވައި ރަނގަޅަށް ދަމައިނުގަނެވޭ ހާލަތެއްގައި، ވައި ދައުރުކުރާ ނާރުތައް ފިއްތާލައިގެން ރަނގަޅަށް ވައި ދަމައިގަނެވޭނެ ބަޔަކަށް ވައި ފޮނުވުއިދޭން ހަށިގަނޑުން އަމިއްލައަށް ކުރާ ކަމެކެވެ.

މި ދެ ބޭސް ލޯންޗްކުރުމަށް ދަރުމަވަންތަ ހޮސްޕިޓަލުގައި ބޭއްވި ހާއްސަ ރަސްމިއްޔާތެއްގައި ވާހަކަ ދައްކަވަމުން، ފުއްޕާމޭގެ ބަލިތަކަށް ހާއްސަ، އަދި މި ދާއިރާގައި މަގުބޫލު އިންޑިއާގެ ޑރ. ރެނިސް ޑޭވިސް ދެއްކެވި ވާހަގަކައިގައި، ގްލޯބަލް އިނިޝިއޭޓިވް ފޮ އާސްތުމާ (ޖީނާ)އިން އެކުލަވާލާފައިވާ، އާސްތުމާ އަދި ސީއޯޕީޑީ ބަލިތަކަށް ހާއްސަ ގައިޑްލައިންތަކުގެ މުހިންމުކަން ފާހަގަކޮށްފައި ވެއެވެ. އަދި، ފުއްޕާމޭގެ ބަލިތަކަށް ޝިފާއެއްގަ ގޮތުގައި އިންހޭލަރ ފަދަ ބޭސްތައް މާ ގިނައިން ބޭނުންކުރުން މަދުކުރުމަށް، ޖީނާ ގައިޑްލައިންތަކުގައި ފާހަގަކޮށްފައިވާ ނުކުތާތަކަށް އެ ބޭފުޅާ އަލިއަޅުވާލެއްވި އެވެ.