ބާކީވުމާއި އެކަނިވެރިވުމަކީ ހިތްދަތި ކަމެކެވެ. އެކި ސަބަބުތަކާއިހުރެ އިންސާނުންނަށް އެކަނިވެރިކަން އިހުސާސް ކުރަން ޖެހެއެވެ. މި އެކަނިވެރިކަމުގެ ވޭނީ އުދާސްތަކަށް ނިމުމެއް ހޯދުމަކީ އިންސާނާ ގަދައަޅާ ކުރަންޖެހޭނޭ މަސައްކަތެކެވެ. އެގޮތުން އެއްވެސް ގޮތަކުން، އެއްވެސް ސަބަބެއް މެދުވެރިވެގެން ނަމަވެސް ނުވަތަ ސަބަބެއް މެދުވެރި ނުވެ ނަމަވެސް އެކަނިވެރިކަން އިހުސާސް ކުރެވޭނަމަ އެކަމަށް އޮތް އެންމެ ރަނގަޅު ފަރުވާ ނުވަތަ ހައްލަކީ ރޭގަނޑުގެ ފަހުބައިގައި ހޭލައި ހުރެ، ﷲ ތަޢާލާއަށް އަޅުކަންކޮށް ދުޢާކުރުން ގިނަ ކުރުމެވެ. ﷲ ތަޢާލާއާއި "މުޢާމަލާތުކުރުން" ގިނަކުރުމެވެ. ބާކީވުމާއި އެކަނިވެރިކަން ފިލުވައިލުމަށް މާތް ﷲ ފުދިވޮޑިގެންވެއެވެ.

އަހަރެމެން ދަންނަވާ ދެންނެވުންތަކަށް ﷲ ތަޢާލާ ދެއްވަވާ ޖަވާބު ނުވަތަ އިޖާބައިގެ "އަޑު" އަހަރެމެންނަށް ނުއިވިދާނެއެވެ. އެއީ އެއްވެސް ހާލެއްގައި ކަންބޮޑުވާންޖެހޭ ކަމެއް ނޫނެވެ. އަހަރެމެންގެ ދެންނެވުންތައް އައްސަވައި ވޮޑިގެންވާކަމާއި އިޖާބަ ކުރައްވަވާނޭ ކަމަށް ޤުރުއާނުން ސާފުކޮށް އެނގެން އޮތުމުން އަހަރެމެންނަށް ފުދެންވާނެއެވެ. ﷲ ތަޢާލާގެ ބަސްފުޅަށް އިތުބާރުކުރުމާއި ހިތުން ތެދުކޮށް އެ ބަސްފުޅުތަކުގެ ތެދުކަން ޤަބޫލުކުރުމަކީ އެއީއެވެ.

މިފަދައިން ކަންކަން ކުރާ މީހާއަކީ ޙަޤީޤަތުގައި އެކަނިވެރިއެއް ނަމަވެސް އެމީހަކީ ދުނިޔޭގައި ބާކީވެ އެކަނިވެރިވެފައިވާ މީހެއް ގޮތަށް ސިފަވެދާނެއެވެ. ނަމަވެސް ޤަބޫލުފުޅު ކުރައްވާށެވެ! އެކަން އެމީހަކަށް އިހުސާސެއް ނުކުރެވޭނެއެވެ. އިހުސާސް ކުރެވޭނީ އެމީހަކާއިއެކު އެތައް ބަޔަކު ތިބި ކަމަށެވެ. އެގޮތަށް އިހުސާސް އެކުރެވެނީ އަހަރެމެންގެ ދުޢާ އަޑުއައްސަވައި އިޖާބަ ދެއްވަވާތީއެވެ. އެކަން ހިތުގައި ޤަބޫލުކުރެވޭތީއެވެ.

ތިމާ އެކަނިވެރިވެއްޖެ ކަމަށް ޤަބޫލުކުރެވޭނަމަ، ފަހަރުގައި އެކަމުން އެނގެނީ އެމީހަކު ތައުބާވާންޖެހޭ ގިނަ ފާފަތަކެއް ކުރެވި ތައުބާ ނުވެވި ހުރިކަމެވެ. އެފަދަ މީހަކު އެތައް ސަތޭކަ ބަޔަކާއި އެކު ގުޅުން އޮތްނަމަވެސް އެމީހަކަށް ޤަބޫލުކުރެވޭނީ އެމީހަކީ އެކަނިވެރިއެއް ކަމަށެވެ. ހީވާނީ ބާކީވެފައިވާ ފަދައިންނެވެ. އަޅައިލާނެ އެއްވެސް މީހަކު ނެތް މީހެއް ކަމަށެވެ. އެމީހަކާއިމެދު ވިސްނާ ހަމަ އެކަކުވެސް ނެތް ކަމަށެވެ.

މި އިހުސާސްތަކާއި ޤަބޫލުކުރުންތައް ޤަބޫލުކުރެވެނީ ކީއްވެގެން ހެއްޔެވެ؟ އެކަން އެހެންވާ ސަބަބަކީ އެމީހަކު ﷲ ތަޢާލާގެ އެންގެވުންތަކަށް ފަރުވާކުޑަކޮށް އަޅައިނުލައި ދޫކޮށްލުމުން ﷲ ތާޢާލާ އެމީހަކު ދޫކޮށްލައްވަވާތީ ކަމަށް ވެދާނެއެވެ. ދުނިޔޭގެ ހަޔާތަށް ބެލި ނަމަވެސް އެމީހަކާއިމެދު އަޅައިނުލާ މީހުންނަށް އަޅައިލުމަކީ ކުރެވޭ ކަމެއް ނޫނެވެ. އެމީހަކާއިމެދު ފަރުވާ ނުބަހައްޓާ މީހަކަށް ފަރުވާ ބެހެއްޓުމަކީވެސް ކުރެވޭ ކަމެއް ނޫނެވެ. މިކަންކަން މިގޮތަށް މެދުވެރި ކުރައްވަވަނީވެސް ޢިބްރަތް ޙާޞިލުކުރުމަށެވެ.

ވިސްނާށެވެ! އެކަނިވެރިކަމާއި މާޔޫސްކަމާއި ބާކީވުމުގެ އިހުސާސް ކުޑަކުރުމަށް ނުވަތަ އެ އިހުސާސްތަކުން ދުރުވުމަށް، އަބަދާއި އަބަދު އަހަރެމެން ބައްލަވާ އަދި އައްސަވާ ވޮޑިގެންވާ މާތް ﷲ އާއި ކުއްތަންވާށެވެ. އެއީލާހަކީ އަހަރެމެން ދޫކޮށް ބާކީކޮށްލާނޭ އިލާހެއް ނޫނެވެ. އެ އިހާލާއި މެދުގައި އޮންނަ ގުޅުން ބަދަހި މީހާއީ އެ އިލާހުގެ ރުހިވޮޑިގަތުން ބޮޑު މީހެކެވެ. އެކަނިވެރިކަމުގެ އިހުސާސްތަކަށް ހައްލަކީ މިއީއެވެ. 

 

ހަވަލާ: މުފްތީ މެންކް (2022)