ރަސޫލުﷲ ޞައްލަﷲ އަލައެހި ވަޞައްލަމަ އަކީ، މުޅި އިންސާނިއްޔަތަށް ހުރި ރިވެތި ނަމޫނާއެއްކަން، ކީރިތި ޤުރުއާނުގައި ބަޔާންކުރައްވާފައިވެއެވެ. ތަބާވާންވީ، ﷲ ގެ ޙަޟްރަތުން، އެކަލޭގެފާނު ގެންނެވި ތެދުމަގަށެވެ. ދީނީ ކަންކަމުގެ ހުކުމްތައް އެނގެންއޮތީ، އެކަލޭގެފާނަށް ބާވާލެއްވި ކީރިތި ޤުރުއާނުންނާއި، އެކަލޭގެފާނުގެ ސުންނަތުންނެވެ. އިބްރަތް ލިބިގަންނަންވީ އެކަލޭގެފާނުގެ ސީރަތުންނެވެ. އިންސާނާގެ ދިރިއުޅުމުގައި ދިމާވާ އެކިއެކި ކަންކަމުގައި އަމަލު ކުރަންވީގޮތުގެ އިރުޝާދު އެކަލޭގެފާނުވަނީ ދެއްވާފައެވެ.

މިގޮތުން، އިންސާނާގެ ދުނިޔެމަތީގެ ހަޔާތުގެ މަންހަޖު، ކީރިތި ޤުރުއާނާއި ރަސޫލާގެ ސުންނަތުގައި ވަރަށް ސާފުކޮށް ބަޔާންކުރައްވާފައިވެއެވެ. ދީނަށް ގޮވާލުމާއި، މުޖުތަމަޢުގައި ހުންނަ ނުރަނގަޅު ކަންތައްތައް ފިލުވުމަށް މަސައްކަތްކުރުމުގެގޮތް، ކީރިތި ޤުރުއާނުގައި ދައްކަވާފައިވެއެވެ. އަދި ކީރިތި ރަސޫލާ އަމަލުފުޅުން މިކަމުގެ ވަރަށް ރިވެތި ނަމޫނާ ފެންނަން އެބަހުއްޓެވެ. ކީރިތި ޤުރުއާންގައިވާ މަތިވެރި އުސޫލުތަކާއި، އެކިއެކި ކަންކަމުގައި ދެއްވާފައިވާ އިރުޝާދުތަކަށް ތަބާވުމުގައި މުސްލިމުންގެ ނަމޫނާއަކީ، ކީރިތި ރަސޫލާކަން، ޤުރުއާނުގެ އެއްއާޔަތަށްވުރެ ގިނަ އާޔަތުގައި ބަޔާންކޮށްދެއްވާފައިވެއެވެ. މިސާލަކަށް، އެއްދުވަހަކު، އިތުރު އެކަލޭގެފާނު ޞަހާބީންނާއެކު ވާހަކަފުޅު ދައްކަވަން އިންނަވަނިކޮށް، ޒުވާން ކުއްޖަކު މާދުރުގައިހުރެ، އެކަލޭގެފާނުގެ ނަންފުޅުން ގޮވާލައި ހަރުއަޑުން ދެންނެވިއެވެ. އޭ، ރަސޫލުﷲ ގެފާނެވެ! މިވެނި ނުބައިކަމެއް ކުރުމަށް ތިމަންނައަށް ހުއްދަ ދެއްވާށެވެ! އެހިނދު އެކަލޭގެފާނުގެ އަރިހުގައި ތިބި ބައެއްމީހުން، އެޒުވާނާއަށް އެކަށީގެންވާ އަދަބެއްދިނުމަށް ތެދުވިއެވެ. އެކަލޭގެފާނު، އެމީހުންނަށް ޙަދީޘްކުރެއްވީ މަޑުން ތިބުމަށެވެ. ދެން އެޒުވާނަކު އެކަލޭގެފާނުގެ އަރިހަށް ގެންނަވާފައި އޯގާވެރިކަމާއެކު ޙަދީޡްކުރެއްވިއެވެ. ތިޔަކުއްޖަކު ތިޔަބުނާ ނުބައިކަންތައް، ތިޔަކުއްޖާގެ، މަންމަ ނުވަތަ އުޚުތަކު ނުވަތަ މަހްރަމަކާމެދު އެހެންމީހަކު ކުރުމަށް ތިޔަކުއްޖާ ރުހޭނެ ހެއްޔެވެ؟ އެކުއްޖާ ދެންނެވިއެވެ. ތިމަން ހޭބުއްދު ސަލާމަތުން ހުއްޓާ، އެފަދަ ކަމެއް ތިމަންގެ އާއިލާގެ އެކަކާމެދުވެސް އެހެންމީހަކު ކުރިޔަ ނުދޭނަމެވެ. އެހިނދު އޯގާވެރިކަމާއި ރަހުމުން ފުރިގެންވާ އަޑުފުޅަކުން ޙަދީޘްކުރެއްވިއެވެ. ތިޔަ ޒުވާނާފަދައިން، އެހެން މީހުންވެސް އެމީހުންގެ އާއިލާގެ މީހުން ސަލާމަތްކުރާނެއެވެ. ދެން އޭނާ އަށް ނަސޭހަތްތެރިވެ ވަޑައިގަތުމުން، ވަރަށް ރަނގަޅަށް އޭނާއަށް ވިސްނިއްޖެއެވެ. އެޒުވާނާވީ، ވަރަށް ތަޤުވާވެރިކަން ބޮޑު މީހަކަށެވެ.

މާތް ނަބިއްޔާގެ ހަޔާތްޕުޅުން، ގުނައި އަދަދުނުކުރެވޭހާ މިފަދަ ގިނަގުނަ ފިލާވަޅުތަކާއި އިބްރަތްތައް ލިބިގަނެވެން އެބަހުއްޓެވެ. މުސްލިމުންކުރެ ދީނުގެމަގަށް ގޮވާލައި، މީހުން އިސްލާހުކުރަން މަސައްކަތްކުރާ މީހުންގެ މައްޗަށް އޮތީ، މާތް ނަބިއްޔާ ދައްކާފައިވާ އިރުޝާދުތައް އުނގެނި، އެއާ އެއްގޮތަށް އަމަލުކުރުމެވެ. ޣައިރު މުސްލިމުން، އެމީހުންގެ ބާޠިލް އަޤީދާ އަށް މީހުން ވެއްދުމަށް މަސައްކަތްކުރާގޮތަށް އަމަލުކުރުމެއް ނޫނެވެ.

 

("ކީރިތި ރަސޫލާ ދެއްކެވި ރީތި ނަމޫނާއަށް ތަބާވާށެވެ!" - މުޙައްމަދު ރަޝީދު އިބްރާހިމް – ދީނުގެމަގު، އަހަރު 18، އަދަދު 1، ޞަފްހާ 4، 21 ސެޕްޓެންބަރު 2001)