ދުނިޔެމަތީގައި އިންސާނާ އަށް ދިމައިވާ ކޮންމެ ނާކާމިޔާބީ އަކީ ހަގީގީ ކާމިޔާބަށް ވާސިލްވެވެން އޮތް ވަރަށްވެސް ފަހި މަގެކެވެ. މަޝްހޫރު ދީނީ ޢިލްމުވެރިޔާ މުފްތީ ދެއްވި ދަރުސެއްގައި ވިދާޅުވެފައިވަނީ ކޮންމެ ނާކާމިޔާބީއަކީ ހަގީގީ ކާމިޔާބަށް ވާސިލްވެވެން އޮތް ފަހި މަގެއް ކަމަށެވެ. އެހެނީ މި ދުނިޔެއަކީ އިމްތިހާނުތަކުން ފުރިގެންވާ އިމްތިހާނުގެ ގޮވައްޗެކެވެ.

މާތް ﷲ އިންސާނުން އިމްތިހާނުކުރައްވަނީ ތަފާތު އެކި ގޮތް ގޮތަށެވެ. އެއްބަޔަކަށް އުފާވެރިކަމާއި ހިތްހަމަޖެހޭ ކަންކަން މެދުވެރި ވެގެންނެވެ. ނަމަވެސް އުފާވެރި އެއްވެސް ކަމަކުން، އިންސާނާގެ ނަފްސު ރުޅިވެރިކަމުގެ އަޅުވެތިކަމަށް ނުދެއެވެ. ނަމަވެސް ނާކާމިޔާބީތަކުގައްޔާއި ހިތާމަވެރި ހާލަތްތަކުގައި އަބަދުވެސް އިންސާނާ އަށް ރުޅި އިސްކުރެވެއެވެ. މިފަދަ ކޮންމެ ހިތާމަވެރިކަމެއް ނުވަތަ ނާކާމިޔާބީއެއް މިއީ ހަގީގަތުގައި އަހަރެމެންނާ ކުރިމަތިވާ އިމްތިހާނެކެވެ. ކޮންމެ އިމްތިހާނަކީ އެއިން އަހަރެމެންނަށް ސުވަރުގެ ދެވެން މަގު ފަހިކޮށްދޭ ފަހި މަގެކެވެ. ނަމަވެސް އެ އިމްތިހާނުގެ ބޭނުން ކުރަން އެނގިއްޖެ މީހަކަަށް އެކަންޏެވެ.

އިމްތިހާނުގެ ވަގުތުގައި (ނާކާމިޔާބީގެ އިމްތިހާނުގެ ވަގުތުގައި) ރުޅި އިސްކުރުމާއި ރުޅީގެ މައްޗަށް ނަފުސު ކިޔަމަން ނުކުރެވުމަކީ ހިތާމަހުރި ކަމެކެވެ. އެހެން ވެއްޖެ ނަމަ އެ ނާކާމިޔާބީގެ ސަބަބުން ހަގީގީ ކާމިޔާބަށް ވާސިލްވެވެން އޮތް މަގު އެމީހަކު އަމިއްލައަށް ބަންދުކުރީއެވެ.

އާދޭހެވެ! ކޮންމެ ނާކާމިޔާބީއެއްގައި ރުޅިމަޑުކޮށް ނަފްރަތާއި ހަސަދަވެރިކަން އިސްނުކޮށް ކިޔަމަންތެރިކަމާއި އެކީ ހެޔޮމަގަށް ނުވަތަ ހެޔޮ ގޮތަށް އެދި އިހުލާސްތެރި ކަމާއެކީ ހިތްވަރުކުރާ މީހާއަށް ދެދުނިޔޭގެ ކާމިޔާބީ ހުއްޓެވެ. އެއީ ދުނިޔެމަތީގައި އިތުރަށް ދެވަނަ ފަހަރަށް ނާކާމިޔާބީއާއި ކުރިމަތިނުވުން ނުވަތަ ނުވުމުގެ ފުރުސަތު ބޮޑުކަމުން ލިބޭ ކާމިޔާބީއާއި، ނާކާމިޔާބީގެ ވަގުތުގައި ކެތްތެރިކަން އިސްކުރުމުން އާޚިރަތުގައިި ލިބެން އޮތް ކާމިޔާބީއެވެ. މީގެ ތެރެއިން ހަގީގީ ކާމިޔާބީ އާޚިރުގައި ލިބެން އޮތް ކާމިޔާބީއެވެ. ދުނިޔެމަތީގައި އެ މަންޒަރު އަހަރެމެންނަށް ސިފަ ނުވުމާއި އަގީދާގެ ބަލިކަށިކަމުގެ ސަބަބުން ނާކާމިޔާބީގެ ވަގުތުގައި ހަގީގީ ކާމިޔާބަށް ނަސްފު އެދޭ އެދުން ކުޑަވެދެއެވެ. ގިނަ ފަހަރަށް ރުޅި އިސްކުރުމާއި ކެތްނުކުރެވުން ފަދަ ކަންކަން އިސްކުރެވެއެވެ.

ނާކާމިޔާބީގައި ކެތްތެރިވެއްޖެ ކޮންމެ މީހަކަށް ހަގީގީ ކާމިޔާބަށް ވާސިލްވާން މަގެއް ކޮށުނީއެވެ. އެހެންކަމުން ދުނިޔެމަތީގައި ދިމައިވާ ނާކާމިޔާބުތަކުގައި ރުޅި އިސްކޮށް ހަސަދަވެރިކަން އިސްކުރުމެއް ނެތެވެ. އިންސާނާގެ މަައްޗަށް އޮތީ ކެތްތެރިކަން އިސްކުރުމެވެ.