އިސްލާމްދީނުގައި އައިސްފައިވާ ބައެއް ކަންކަމާއި މެދު ބައެއް އާންމުންގެ ސުވާލުތަކާ ހިޔާލުތަކާ ޝަކުވާތައް ހުރެއެވެ. މިއީ މި ފަހަކުން މީސް މީޑިޔާގައި ބަޔަކު ދައްކާފައިވާ ވާހަކައެވެ. ޖުނުބުވެރި ޙާލުގައި ކައި ބޮއެ ހެދުމާއި ނިދުން ހުއްދަ ނުވާނޭ ކަމަށް އެއްބަޔަކު ބުނާއިރު އަނެއް ބަޔަކު އެކަން ކުރެވޭނޭ ކަމަށް ބުނެ އެ ވާހަކަ ތަކުގައި ހިޔާލުތަކެއް އުފެދިފައި ހުއްޓެވެ. އެހެންކަމުން އެކަން ސާފުކޮށް އެކަމުގެ ހުކުމް ހޯދުމަށް ކުރެވުނު ދިރާސާތަކުގައި ފަރަންޖީ އެތައް ލިޔުންތަކެއް ފެނުނެވެ. ނަމަވެސް އެކަމަށް އިޝާރާތް ކުރާ ދިވެހި ލިޔުމެއް، ދިވެހި މަޖައްލާއެއް ކަމަށްވާ "ދެން އެމްވީ" ގައި އޮއްވާ ދުށީމެވެ. މި ލިޔުމުގައި މި ހިމަނާލާނީ އެ ލިޔުމާ ހަވާލާދީ ލިޔެފައިވާ ލިޔުމެކެވެ.

ޖުނުބުވެރި ޙާލުގައި ކައިބޮއިހެދުމާ ނިދުމަކީ މަނާކަމެއް ނޫންކަމަަށް އެ ކިޔުމުގައި އޮތެވެ. ނަމަވެސް ޖުނުބުވެރިވެގެންވާ ޙާލު ކައިބޮއި ނިދައި ހަދަން ބޭނުންވެއްޖެނަމަ ވުޟޫކޮށްގެން ކައިބޮއި ހެދުން މުސްތަޙައްބު ވެގެންވާކަމަށް ވެއެވެ. ރަސޫލާގެ ރަނގަޅު ނަމޫނާއަކީ އެއީއެވެ.

މާތް ﷲ ރުއްސުންލެއްވި ޢާއިޝަތުގެފާނުގެ އަރިހުން ރަސޫލު ﷲ ﷺ ޖުނުބުވެރިވެ ވަޑައިގެންވާ ޙާލުކޮޅު ފަރީއްކުޅުއްވަން ނުވަތަ އަވަހާރަފުޅު ލެއްޕެވުމަށް ބޭނުންފުޅުވާނަމަ ވުޟޫ ކުރައްވާކަން އެނގޭ ކަމަށް އެ ލިޔުމުގައި ބުނެފައިވެއެވެ.

އެހެންކަމުން ޖުނުބުވެރިވެގެންވާ ޙާލު ކައިބޮއި ހެދުމާއި އަދި ނިދުމަކީ މަނާކަމެއް ނޫނެވެ. ނަމަވެސް އެފަދަކަމެއް އެފަދަ ޙާލުގައި ކުރަން ޤަސްދުކުރާމީހާ ވުޟޫކުރުމީ ރަސޫލާގެ ސުންނަތުގައިވާ މުސްތަޙައްބު ގޮތެވެ. އެއީ އަދި ރަނގަޅު މޮޅު އިތުރުގޮތެވެ. އަދި ޖުނުބުވެރިޔާ ކައިބޮއި ހެދުމާއި ނިދުމާ މިކަންކަމުގެ ކުރިން ހިނައިގަތުމަކީ އޮޅުމެއްނެތްގޮތުގައި އެންމެ ރަނގަޅު ގޮތެވެ.

ކަން އޮތީ މިހެން ކަމުން، މި ލިޔުމުން އެނގޭ ކަމަކީ، ޖުނުބުވެރުޔާ ކެއުމަށާއި ނިދުމުގެ ކުރިން ހިނައިގަތުން ވާޖިބުވެގެން ނުވާކަން އެނގެއެވެ. ނަމަވެސް މުސްތަޙައްބު ގޮތަކީ ވުޟޫކުރުން ކަމުގައި އެނގެން އެބަ އޮތެވެ. މި ލިޔުމަކީ ކޮންމެވެސް ގޮތަކުން، ކޮންމެވެސް ބަޔަކަށް ފައިދާތަކެއް ކުރާނޭ ލިޔުމެއް ކަމުގައި ލައްވާށިއެވެ. އަދި ހުރިހާ ކަމެއް މޮޅަށް ދެނެވޮޑިގެން ވަނީ މާތް ﷲ އެވެ.

 

ހަވާލާ: ދެން އެމްވީ، ޖުނުބުވެރި ހާލުގައި ކެޔުމާއި ނިދުމަކީ ކޮންކަހަަލަ ކަމެއް؟، 2020