މިއަދުގެ ހުކުރު ޚުތުބާ ވެގެން ގޮސްފައިވަނީ ވަރަށްގިނަ މީހުން ކަނުލާ އަޑުއެހި ޚުތުބާ އަކަށެވެ. މީގެ ކުރިން ހުކުރަށްގޮސް ތާއްޔާ ޖެހި ޖެހި ތިބި ކިތަންމެ ބަޔަކުވެސް މިއަދުގެ ޚުތުބާ ވަރަށް ކަނުލާ އަޑު އެހިއެވެ. މުދަލާއި މުދަލުން ތިބާއަށް އެއްޗެއް ލިބޭ ވާހަކައެއް ދެއްކީތީއެވެ.

މި ހަފްތާގެ ހުކުރު ޚުތުބާ ހާއްސަ ކޮށްފައިވަނީ ވާރުތަ މުދަލަށް ރައްކާތެރިވުމާ ގުޅޭގޮތުންނެވެ. އިންސާނާ މަރުވުން އޭނާ ދޫކޮށްފައިދާ ތަރިކައަކީ އެ ބަހާނެ އުސޫލުތަކާއި ގަވާއިދުތަކެއް މާތް ﷲ ގެ ވަޙީބަސްފުޅުން ކަނޑައަޅުއްވާފައިވާ އެއްޗަކަށްވާއިރު އެ އެންގެވި ގޮތަށް ވާރުތަމުދާ ބެހުމަށް ޚުތުބާގައި ވަނީ ބުނެފައެވެ.

ޚުތުބާގައި ބުނެފައިވަނީ ވާރުތަ މުދަލަކީ މާތް ﷲ ގެ ޙައްގުތަކުގެ ތެރޭގައި ހިމެނޭ އެއްޗެއް ކަމުން އެ ކަލާނގެ ހައްގަކަށް އަރައިނުގަނެ އެ އެންގެވި ގޮތަށް މުދާ ބަހަން ޖެހޭނެ ކަމަށެވެ. އަދި ވާރުތަ މުދަލުގެ ހައްގުވެރިއަކަށް އެ މުދާ ލިބުމަށް ނޭދޭ މީހާއަކީ އަނެކާގެ ހައްގަކަށް އަރައިގަންނަ މީހެއް ކަމަށާއި އެއީ ރަހިމުގެ ގުޅުންވެސް ކަނޑައިފި މީހެއްކަމަށްވެސް ޚުތުބާގައި ވަނީ ބުނެފައެވެ.

އިސްލާމް ދީނުގައި ތަރިކަ މުދާ ބަހަންޖެހޭ ގޮތާ މެދު ދީނުގެ ދުޝްމަނުން އަސާސެއް ނެތް ވާހަކަތައް ދައްކާކަން ފާހަގަކޮށް ޚުތުބާގައި ބުނެފައިވަނީ އެ ކަންކަން އިސްލާމުންގެ ތެރެއިންވެސް މިހާރު ފެންނަމުންދާ ކަމަށެވެ. އެގޮތުން ދީނުގައި މުދާ ބަހާއިރު އަންހެނުންނަށް އަނިޔާވެރިވެފައިވާ ކަމަށް ބުނާ ކަމަށާއި ނަމަވެސް މިއީ އަސާސެއް އަދި ހަގީގަތެއް ނެތް ވާހަކަތަކެއް ކަމަށްވެސް ޚުތުބާގައި ވަނީ ބުނެފައެވެ. މިފަދައިން އިސްލާމް ދީނުގެ މި ހުކުމާއި މެދު ފާޑުކިޔާ މީހުންނަށް އިޝާރާތް ކޮށް ޚުތުބާގައި ބުނެފައި ވަނީ އިސްލާމް ދީނުގައި ތަރިކަ މުދާ ބެހުމުގައި އަންހެނުންނާއި ފިރިހެނުން ތަފާތު ކުރާ ކަމަށް ބުނެ ފާޑު ކިޔުމުން ބޭޒާރުވަނީ ތިމާ މީހާކަމަށާއި އެއިން އެނގެނީ އެ މީހެއްގެ ޖާހިލު ކަމާއި އިލްމުގައި ފުންނާބު ތިރިކަން ކަމަށެވެ.

ތަރިކަ މުދާ ބެހުމުގައި މައްސަލަ އުފެދޭ ކަންތައްތަކެއް ވެސް ހުންނަކަން ޚުތުބާގައި ވަނީ ފާހަގަކޮށްފައެވެ. އެގޮތުން ޝަރުއު ކުރައްވާފައިވާ މިންވަރަށްވުރެ އިތުރަށް ވަކި ވާރުތަވެރިއަކަށް ނުވަތަ ދަރިއަކަށް ދިނުމާއި ވާރުތަވެރިންނާއި ދަރިންނަށް އެކަން އެނގިފައި ނުވުމާއި މުދަލުގެ މިންވަރާއި ހުރި ތަން ދަރިންނަށް ނޭނގުމާއި މުދާ ބެހުން ފަސް ކުރުން ވެސް ހިމެނެއެވެ. ބާލިޣުނުވާ ކުޑަކުދިން ތިބުމުން މުދާ ބެހުން ލަސް ކުރުމުގެ ސަބަބުން އެފަދަ ކުދިން ހާލުގައި ޖެހި މަގުމަތިވަމުންދާތަން ފެންނަ ކަމަށާއި މުދާ ބެހުން ލަސް ކުރުމުގެ ސަބަބުން ބައެއް ވާރުތަވެރިން މަރުވެ، ވާރިސުންނަކީ ކޮބައިކަން ނޭނގި މުދާ ބަހަން އުނދަގޫވާ ކަމަށް ވެސް ޚުތުބާގައި ވަނީ ބުނެފައެވެ.

ތަރިކަ މުދަލުގައި ޖެހޭ މީހާއަކީ އީމާންކަން ބަލިކަށި މީހެއްކަން ފާހަަގަކޮށް ޚުތުބާގައި ބުނެފައިވަނީ އެ މުދަލުގައި ޖެހެވެނީ އަމިއްލަ އެދުން ބޮޑުވުމާއި ދަހިވެތިކަން އިންތިހާއަށް ދިއުމުން ކަމަށެވެ.

ކަން މިހެން ހުރި ނަމަވެސް، ވާތުރަ މުދަލުގެ އެކި އެކި މައްސަލަ ތަކަކީ މިއަދު ކޯޓުތަކުގައި ގިނަ، އަދި ނިމުން ލަސް މައްސަލަ ތަކެކެވެ. އެ މުދަލުގައި ކޮންމެވެސް މީހަކު ޖެހި، ނުވަތަ ކޮންމެވެސް ހައްގެއް ނުލިބި އުނިވުމުން، ރޫޅި ބައިބައިވެފައި ވަނީ ކިތައް ކިތައް އާއިލާ ތޯއެވެ؟ މިއަދު ގިނަ ބަޔަކު ކަނުލާ ޙުތުބާ އަޑު އެހިކަން ފާހަގަވެފައި ވުމީ އުފާވެރި ކަމެކެވެ. އުންމީދަކީ އަހަރެމެންނަށް ހެޔޮ ވިސްނުން ލިބި، އަދުލުވެރިކަމާއި އިންސާފަށް ލޯބިކުރާ، އަނެކުންގެ ހައްގަށް ރައްކާތެރި ބަޔަކު ކަމުގައި އަހަރެމެން އެންމެން ވުމެވެ.