"މަރަށް ތައްޔާރުވުން" މި މައުޟޫއަށް އިއްވި ޚުތުބާގައި ބުނެފައި ވަނީ މާތް ﷲ ގެ ޒާތުފުޅު މެނުވީ އެހެން ހުރިހާ ތަކެއްޗަކީ ފަނާވެދާނެ ތަކެތި ކަމަށެވެ. އެކަލާނގެ ވަނީ އަޅުތަކުންގެ އަޖަލު ކަނޑައަޅުއްވާ، އައްލައުހުލް މަހްފޫޒުގައި ލިޔުއްވާފައި ކަމަށާއި، ލިޔުއްވާފައިވާ ގޮތާ އެއްވެސް ތަފާތު އަދި ލަސްވުމެއް އަދި އަވަސްވުމެއްވެސް ނެތި އެމީހެއްގެ އަޖަލު އެމީހަކާ ބައްދަލުކުރާނެ ކަމަށް ޚުތުބާގައި ބުނެފައިވެއެވެ.

އިންސާނުންގެ ތެރެއިން ކުއްލި މަރުތަކާއި އަދި އެކި ކަންކަމުގައި މަރުވެދާ މީހުން ވެސް ވަކިވެގެން އެދަނީ އެމީހުންގެ އަޖަލު ފުރިހަމަކޮށްފައި ކަމަށް ޚުތުބާގައި ބުނެފައިވެއެވެ. އަދި އިންސާނާގެ ގާތަށް މަރު އަންނާނެ ވަގުތެއް އޭނާއަކަށް އަދި އެހެން މީހަކަށްވެސް ނޭނގޭނެ ކަމަށް ވެސް ޚުތުބާގައި ވަނީ ބުނެފައެވެ.

މަރަށް ހާޒިރުވެފައިވާ ކޮންމެ އިންސާނަކަށް ވެސް މަރުގެ ވޭނާ ކުރިމަތިލާން ޖެހޭނެކަމަށް ޚުތުބާގައި ބުނެފައިވެއެވެ. ޚުދު ސަލާމާއި ސަލަވާތް ލެއްވި ކައު ސާހިބާ މުހައްމަދު صَلَّى ٱللَّٰهُ عَلَيْهِ وَسَلَّمَ މި ވޭން ތަހައްމަލުކުރެއްވިކަމަށް ޚުތުބާގައި ބުނެފައިވެއެވެ. އެގޮތުން މާތް ސާހިބާ މުޙައްމަދުގެފާނު މަރުގެ އާލާސްކަންފުޅާ އޮވެވަޑައިގެން، އެކަލޭގެފާނުގެ މޫނުފުޅުގައި ފެންފޮދެއް ހާކާލައްވަމުން، މަރުގެ ސަކަރާތުގެ ވޭން ބަޔާންކޮށްދެއްވި ކަމަށްވެސް ޚުތުބާގައި ވަނީ ބުނެފައެވެ.

މުއުމިނުންނަށްވުރެ ބޮޑަށް ކާފިރުންނާއި ފާޖިރުން މަރުގެ ވޭން ތަހައްމަލުކުރާނެ ކަމަށް ޚުތުބާގައި ބުނެފައިވެއެވެ. އެމީހުންގެ ރޫހު ހަށިގަނޑުން ނުކުންނަންދެން މަލާއިކަތުން އެ ހަށިގަނޑުގައި ތަޅުއްވާނެ ކަމަށް ވެސް ޚުތުބާގައި ބުނެފައިވެއެވެ. އަދި ހުތުރުކަން ބޮޑު ފުރާނަތަކަށް، އެ ފުރާނަތައް ހިއްޕަވާ ވަގުތު، ﷲ ގެ ޢަޒާބަށް އައުމަށް ގޮވާލެވޭނެ ކަމަށްވެސް ޚުތުބާގައި ބުނެފައިވެއެވެ.

މީގެ އިތުރުން އަހަރެމެން ކޮންމެ މީހަކީ އަބަދުވެސް މަރު ހަނދުމަކޮށް އަބަދުވެސް މަރަށް ތައްޔާރުވެގެން ތިބޭ ބަޔަކު ކަމުގައި ވުމަށް އެދި ތަކުރާރުކޮށް ޚުތުބާގައި ވަނީ ދުޢާކޮށްފައެވެ.