"އިންސާނުންނާއި ވެށީގެ ރައްކާތެރިކަން އޮތީ އިސްލާމްދީނުގައި" މި މައުޟޫއަށް މިއަދު އިއްވި ހުކުރު ޚުތުބާގައި ބުނީ މުއުމިނުން ދަންނަ ގޮތުގައި ވެށި ރައްކާތެރިކުރުމަކީ އޭނާގެ ދީނީ، ފަރުދީ އަދި ގައުމީ ވާޖިބެއް ކަމަށެވެ.

ވެއްޓަކީ އަހަރުމެންގެ ދިރިއުޅުމުގެ އެންމެ މުހިންމު އެއް ބަހާ ކަމުގައިވާއިރު، އެތަން ފާސިދުވެއްޖެ ނަމަ އިންސާނުންގެ ސިއްހަތު ފާސިދުވެގެން ހިނގައިދާނެ ކަމަށް ޚުތުބާގައި ބުނެފައިވެއެވެ. ޚުތުބާގައި ބުނީ މިއަދު ދުނިޔޭގެ ވަޔާއި ފެން ވަނީ ތަޣައްޔަރުވެފައި ކަމަށާއި، ދަނޑުހެއްދުމަށް އަޅާ ގަސްކާނާގައި ހިމެނޭ ކެމިކަލްތަކުން ކާބޯތަކެތި ވެސް ދަނީ ތަޣައްޔަރުވަމުން ކަމަށެވެ. ނަތީޖާއެއްގެ ގޮތުން ދިފާއީ ބާރު ދަށްވެ، ބަލިތައް ޖެހޭ މިންވަރު ދަނީ އިތުރުވަމުން ކަމަށެވެ. އަދި ކަނޑުގެ ލޮނުގަނޑު ހޫނުވުމާއި، ކުނިބުނީގެ ސަބަބުން ފަރުތައް ހަލާކުވެ ދިރުންތަކަށް ދަނީ ގެއްލުން ލިބެމުން ކަމަށް ޚުތުބާގައި ބުންޏެވެ.

ވެށި ތަޣައްޔަރުވެގެންދަނީ ހަމަ އިންސާނުންގެ އަމަލުތަކުން ކަމަށް ޚުތުބާގައި ބުނެފައިވެއެވެ. މާތް ﷲ ފެނާއި، ވަޔާއި، ބިން ޚަލްގުކުރެއްވީ ސާފުތާހިރުކޮށް ކަމަށާއި، އެހެންނަމަވެސް އިންސާނުން މި ތަކެއްޗަށް ގެންނަމުންދާ ބަދަލުތަކުގެ ސަބަބުން މާތް ﷲ ޚަލްގުކުރެއްވި ތަކެތި ދަނީ ތަޣައްޔަރުވަމުން ކަމަށް ޚުތުބާގައި ބުނެފައިވެއެވެ.

ޚުތުބާގައި ވަނީ ދިވެހިންނަކީ ކަނޑަށް ވަރަށް ބޮޑަށް ބަރޯސާވާ ބައެއްކަން ފާހަގަކޮށްފައެވެ. އިގްތިސާދުގެ ބޮޑު ބައެއް ވެސް ކަނޑަށް ބަރޯސާވާއިރު މިއަދު އަހަރުމެންގެ އަތްތަކުން ކަނޑަށް ވެސް އެތައް ގެއްލުމެއް ދެމުންދާކަމަށް ޚުތުބާގައި ވަނީ ބުނެފައެވެ.

އިންސާނުންނަށް މަގު ދެއްކެވުމަށް ފޮނުއްވެވި މާތް ރަސޫލާ ވަނީ ވެށި ސާފުތާހިރުކޮށް ބާއްވައިގެން ދިރިއުޅުމަށް އިރުޝާދު ދެއްވާފައެވެ. އަދި ތިމާވެށި މުޑުދާރު ނުކުރުމަށާއި، ޚާއްސަކޮށް ފެން މުޑުދާރު ނުކުރުމަށް ނުވަތަ ހަޑިނުކުރުމަށް ޚުތުބާގައިވަނީ ނަސޭހަތްތެރި ވެފައެވެ.