އެކަކު އަނެކަކަށް އޯގާތެރިވެ ރަހުމު ކުރުމަކީ މާތް ﷲ ގެ ރަހުމަތް އެމީހަކަށް ލައްވަވާނޭ ކަމެއްކަމަށް މިއަދުގެ ހުކުރު ޚުތުބާގައި ބުނެފިއެވެ.

"މާތް ﷲ ގެ ރަހުމަތްފުޅުގެ ތަނަވަސްކަން" މި މައުޟޫއަށް ހާއްސަކޮށްގެން މިއަދު ރާއްޖޭގެ އެކި ކަންކޮޅުތަކުގައި ދިން ހުތުބާގައި ބުނީ އެކަލާނގެއީ އެކަލާނގެ ހެއްދެވި އެންމެހައި އަޅުންނަށް، މުސްލިމުންނަށައި ކާފިރުންނަށް ވެސް ދުނިޔެމަތީގައި ރަހްމާންވަންތަ ރަސްކަލާނގެ ކަމަށެވެ.

މާތް ﷲ ގެ ރަހުމަތްފުޅު ނުވާނަމަ، އަހަރެމެންގެ ފާފަތަކަށާއި އުރެދުންތަކަށް ވަގުތުން އަޛާބު ދެއްވީސް ކަމަށް ހުތުބާގައި ވަނީ ފާހަގަ ކުރައްވާފައެވެ. ނަމަވެސް މާތް ﷲ އުރެދޭ މީހުންނަށް ވެސް އެކަލާނގެ މުހުލަތު ދެއްވާ ކަމަށާއި، ޝަރީކު ކުރާ މީހުންނަށް ވެސް އެކަލާނގެ މުހުލަތު ދެއްވަނީ ﷲ ގެ ރަހްމަތްވަންތަ ކަމުގެ ބޮޑު ކަމުން ކަމަށާއި އިމްތިހާނުކުރެއްވުމުގެ ގޮތުންކަމަށް ހުތުބާގައި ވަނީ ބުނެފައެވެ. މާތް ﷲ ގެ ރަހްމަތުގެ ސަބަބުން އެމީހުންނަށް ވަގުތުން އަޛާބު ނުދެއްވައި އެމީހުންނަށް މުހުލަތު ދެއްވާކަމަށްވެސް ޚުތުބާގައި ބުންޏެވެ.

މީގެ އިތުރުން، ހުތުބާގައި ބުނި ގޮތުގައި މާތް ﷲ ގެ ރަހީމުވަންތަ ކަމަކީ މުއިމިނުންނަށް ހާއްސަ ކުރައްވާފައިވާ ސިފަފުޅެކެވެ. ﷲ ލައްވަވާ އެ ރަހްމަތް ހާއްސަ ކުރައްވާފައި ވަނީ އެކަލާނގެއަށް އީމާންވާ މީހުންނަށެވެ. އަދި އެކަކު އަނެކަކަށް އޯގާތެރިވެ ރުހުމު ކުރުމަކީ މާތް ﷲ ގެ ރަހުމަތް އަހަރެމެންގެ މައްޗަށް ލައްވާނޭ ކަމެއް ކަމުގައިވެސް ހުތުބާގައި ބުންޏެވެ.

އެގޮތުން ދަރިން މައިންބަފައިންނަށް އޯގާތެރިވުމަށް ނަސޭހަތްތެރިވެ ހުތުބާގައި ބުނީ މައިންބަފައިންގެ ހެޔޮ ދުއާއިން މެނުވީ ދަރިންނަށް ސުވަރުގެ ނުވަދެވޭނެ ކަމަށެވެ. ހުތުބާގައި ބުނި ގޮތުގައި އަބާއްޖަވެރިއަކީ ރަހްމު ނުކުރާ މީހާ އެވެ. ރަހްމުކުރާ މީހަކަށް ތިބާ ވުމަށާއި، އޭރުން ﷲ ތިބާއަށް ރަހްމަތް ލައްވާނެ ކަމަށްވެސް ހުތުބާގައި ވަނީ ބުނެފައެވެ.