މައިންބަފައިންނަށް އުރެދުމަކީ، ތިމާގެ އަޅުކަންތަކުގައި ޖެހޭ ލައްތަކެއް ކަމަށް މިއަދުގެ ހުކުރު ޚުތުބާގައި ބުނެފިއެވެ.

"މައިންބަފައިންނަކީ ސުވަރުގޭގެ ދޮރުކޮޅުތަކެއް" މި މައުޟޫއަށް ރާއްޖޭގެ އެކިކަންކޮޅުތަކަށް މިއަދު އިއްވި ޚުތުބާގައި ބުނީ މާތް ﷲ އަށާއި، ރަސޫލާ އަށް އަދާކުރަން ޖެހޭ ހައްގުތަކަށް ފަހު، ދެން މުސްލިމުންގެ މައްޗަށް އެންމެ އިސް ހައްގަކީ، މައިންބަފައިންނަށް އަދާކުރަންޖެހޭ ހައްގުތައްކަމަށެވެ. ކީރިތި ޤުރުއާނާއި، ސުންނަތުގައި ވެސް އެކަމަށް ބާރުއަޅުއްވާފައިވާއިރު، ޝަރުއީ ނައްސުތަކުގައި މައިންބަފައިންނަށް ކިޔަމަންގަތުމަށް އަމުރުކުރައްވައި، އެބައިމީހުންނަށް އުރެދުމުގެ ނުބައިކަން ބަޔާންކުރައްވާފައި ވާކަމަށްވެސް ޚުތުބާގައި ބުނެފައިވެއެވެ.

މައިންބަފައިންނަށް އުރެދުމަކީ، ތިމާގެ އަޅުކަންތަކުގައި ޖެހޭ ލައްތަކެއް ކަން ފާހަގަކޮށް ޚުތުބާގައި ބުނީ މައިންބަފައިން މުސްކުޅިވެ އެ ދެމީހުންނަށް ޚިދުމަތް ކުރުމުގެ ފުރުސަތު ލިބުނު މީހާ، އޭނާ އަށް ސުވަރުގޭގެ ދޮރުކޮޅެއް ހުޅުއްވައިދެއްވީތީ، އެކަމަށްޓަކައި މާތް ﷲ އަށް ޝުކުރުވެރިވާންޖެހޭނެ ކަމަށެވެ. އަދި މައިންބަފައިންނަށް އަޅާލުމާއި ކަމޭހިތުމަކީ، އެކަމުގެ ޖަދަލުކޮށްގެން ވާނެ ކަމެއް ނޫން ކަމަށާއި، މައިންބަފައިން ހިތުގައި ޖެހުނަ ދީގެން ނުވާނެކަމަށްވެސް ޚުތުބާގައި ވަނީ ބުނެފައެވެ.

މީގެ އިތުރުން ޚުތުބާގައި ބުނީ، މުސްކުޅި މައިންބަފައިންނާއިއެކު އެއް ގެއެއްގައި އުޅުމަކީ، ދަރިންނަށް މިއަދު ހުތުރު ކަމަކަށް ވެފައިވާކަމަށާއި، މުސްކުޅި މައިންބަފައިން ނުކުޅެދޭ މީހުންނަށް ހާއްސަ ހިޔާވަހިތަކުގައި ބައިތިއްބަން ދަރިން ބޭނުންވާކަމަށެވެ. މިއީ ބައެއްގެ ފާސިދު ސަގާފަތުގައި ޖެހި، އާޝޯހުވެ، އާވާރާވެ ތިބެ ދަރިން ކުރާކަމެއްކަންވެސް ޚުތުބާގައި ފާހަގަކުރިއެވެ. އަދި މިކަމަށް އޮތް "ވެކްސިނަކީ" އިސްލާމީ ތަރުބިއްޔަތާއި، އިސްލާމީ ރިވެތި އަހްލާގާއި، އިސްލާމީ އަދަބާއި ސުލޫކު ކަމަށްވެސް ޚުތުބާގައި ބުނެފައިވެއެވެ.

މިއަދުގެ ހުކުރު ޚުތުބާ ވެގެން ގޮސްފައިވަނީ ވަރަށް އަސަރުގަދަ ޚުތުބާއަކަށެވެ. ޚުތުބާ ވިދާޅުވި ޚަތީބުންނާއި ޚުތުބާ އަޑުއެހި ގިނަ ބަޔަކަށް މިއަދުގެ ޚުތުބާއިން ވަނީ އަސަރު ކޮށްފައެވެ.