ގައުމެއްގެ ހާލަތު ބަދަލު ކުރުމަށް ނަފްސުތައް އިސްލާހު ވާން ޖެހޭނޭ ކަމަަށް މިއަދުގެ ޚުތުބާގައި ބުނެފިއެވެ.

"ޤައުމު އިސްލާހުވުން އޮތީ ނަފްސުތައް އިސްލާހުވެގެން" މި މައުޟޫއަށް ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ޚުތުބާގައި ބުނީ، ކާމިޔާބީއާ ދިމާލަށް ގެންދާ ތިން ކަމަކީ ސިއްރާއި ފާޅުގައި މާތް ﷲ އަށް ބިރުވެތިވުމާއި، މީހަކު ދެކެ ރުޅި އައިސްގެންވާ ހާލުގައި ވިޔަސް ނުވަތަ ހިތްހަމަޖެހިގެންވާ ހާލުގައި ވިޔަސް ހައްޤު ބަސް ނޫނީ ނުބުނުމާއި ފަޤީރު ކަމާއި ތަނަވަސް ކަމުގެ ވަގުތުގައި ވެސް މުށްބާރު ކުރުމެއް ނެތި އަދި އިސްރާފު ކުރުމެއް ވެސް ނެތި ތިމާއަށް ލިބޭ މިންވަރާއި އެއްވަރަށް ބަލައިގެން ދިރިއުޅުމުގެ ޚަރަދުތައް ބިނާކުރުން ކަމަށެވެ. އަދި ހަލާކާ ދިމާލަށް ގެންދާ ތިންކަމަކީ ދުނިޔޭގެ އެދުންތަކަށް ގޮސް ހުސްވެ އެއަށް ތަބާވެ ދިޔުމާއި، ހަވާ ނަފްސުގެ އެދުންތަކަށް އިޖާބަ ދިނުމާއި އަމިއްލަ ނަފްސުގެ މޮޅުކަން އަމިއްލައަށް ފެނި ބޮޑާވެގަތުން ކަމަށެވެ.

އެންމެ ބާއްޖަވެރި މީހަކީ އެ މީހާގެ ހަވާ ނަފްސާ ދެކޮޅުވެ މާތް ﷲ ގެ ރުއްސެވުން ލިބިގަތުމުގެ މަގަށް ރުޖޫއަވެ ތައުބާވާ މީހާ ކަމަށް ވެސް ޚުތުބާގައި ބުންޏެވެ.

ޚުތުބާގައި ބުނީ ފުރިހަމަކަމާއެކު އަދި ތާހިރުކަމާއެކު ފިތުރަތުގެ ސާފުކަން މަތީ ދުނިޔެއަށް އަންނަ އިންސާނާގެ ނަފްސު ތަޣައްޔަރުވެގެންދަނީ ކިހިނެއްކަމާއި އެ ތަޣައްޔަރުވުމުން މިންޖުވުމުގެ މަގު ބަޔާން ކޮށްދެވަމުން ކީރިތި ރަސޫލާ ހަދީޘް ކުރެއްވި މާނައެއްގައިވާ ކަމަށެވެ.

އިންސާނާގެ ނަފްސު އޭގެ ފިތުރަތުގެ ސާފު ތާހިރުކަމުގެ ތެރޭގައި ހިފައްޓައި ތަޣައްޔަރު ކަމެއް އަޔަނުދީ، ގަދަ އަޅައި މަސައްކަތް ކުރުމަކީ ކޮންމެ މުސްލިމެއްގެ މައްޗަށް ވާޖިބެއް ކަމަށް ވެސް ޚުތުބާގައި ވަނީ ބުނެފައެވެ.

މީގެ އިތުރުން ޚުތުބާގައި ބުނެފައިވަނީ ގައުމެއް އިސްލާހު ކުރުމަށްޓަކައި އެ ގައުމެއްގެ ރައްޔިތުންގެ ނަފްސުތައް އިސްލާހު ކުރަން ޖެހޭނެ ކަމަށެވެ. ގައުމެއްގެ ހާލަތަށް އަންނަ ބަދަލު ތަކަކީ އެ ގައުމެއްގައި އުޅޭ ރައްޔިތުންގެ ނަފްސުތަކަށް އަންނަ ނުވަތަ ގެންނަ ބަދަލުތަކެެއް ކަމުގައިވެސް ޚުތުބާގައި ވަނީ ބުނެފައެވެ. އެހެންކަމުން ކޮންމެ މީހަކު ވެސް ްެމީހެއްގެ ނަފްސު އިސްލާހުކުރަން ގަދަ އަޅާ މަސައްކަތް ކުރަން ޖެހޭނެ ކަމަށާއި ހަވާ ނަސްފުގެ މައްޗަށް ޖިހާދުކުރަންވާނެ ކަމަށްވެސް ޚުތުބާގައި ވަނީ ބުނެފައެވެ. އަދި އެއްމެ މަތިވެރި ޖިހާދަކީ ހަވާނަސުގެ މައްޗަށް ކުރާ ޖިހާދުކަމަށްވެސް ޚުތުބާގައި ވަނީ ބުނެފައެވެ.