އިސްލާމްދީނުގެ ވާހަކަ އެކި މީހުން އެކި ތަންތަނުގައި ދައްކަނީ އެކި އެކި ބޭނުންތައް ފުއްދުމަށެވެ. އެއްބަޔަކު ހެޔޮ ނިޔަތުގައި އެ ވާހަކަތައް ދައްކާ ހަދާއިރު، އަނެއްބަޔަކު އިސްލާމްދީނުގެ ވާހަކަ ދައްކަނީ ހަތިޔާރަކަށް ދީން ބޭނުންކޮށްގެން ކޮންމެވެސް އަމިއްލަ ފައިދާގަނޑެއް ހޯދާށެވެ. މިއީ ހިތާމަ ހުރި ކަމެކެވެ.

އިންސާނުން އެކަކު އަނެކަކަށް ފާޑިކިޔުމާއި އެކިކަހަލަ ތުހުމަތުތައް އަސާސެއް ނެތް ގޮތުގައި ކުރުމަކީ ހަމަ އެއްގޮތަކަށްވެސް ރުހެވިގެންވާ ކަމެއް ނޫނެވެ. ކަންމިހެން ހުރި ނަމަވެސް މުސްލިމުން އެކަކު އަނެކަކަށް ތަފާތު އިލްޒާމުތައް އަޅުވާ ތުހުމަތުތައް ކުރެއެވެ. ގަސްތުގައި އެނގި ހުރެ ދޮގު ތުހުމަތުތައްވެސް އަޅުވައެވެ. މިއީ އަމަލެއްގެ ގޮތުން ހުތުރު އަދި ނުބައިކަން ބޮޑު އަމަލެކެވެ. އެހެނީ މިފަދަ ދޮގު ތުހުމަތުތަކާއި ދޮގު އިލްޒާމުތަކުން އެ ބަސްތައް ރައްދުވާ މީހާގެ އަބުރާއި ކަރާމާތައް އުނިކަމެއް އަތުވެދާނެތީއެވެ. އާދޭހެވެ! އަދުގެ މި މުޖުތަމައުގައި އެފަދަ ދޮގު އިލްޒާމުތަކުގެ ސަބަބުން އަބުރާ ކަރާމާތައް އުނިކަން އައުމަކީ ވަރަށްވެސް ގާތުގައިވާ ކަމެކެވެ.

މިފަދަ ގޮތަކަށް ދޮގު ތުހުމަތު ތަކާއި ދޮގު އިލްޒާމުތައް އެހެން މީހުންގެ ބޮލުގައި އަޅުވަމުން އެއްބަޔަކު އުޅެނީ ފާޅުގައެވެ. އަދި އެކަމުގެ މައްޗަށް ބޮޑާވެ ފަހުރުވެރިވާ ހާލުގައެވެ. އަދި ދީނާއި ރަސޫލާގެ ވާހަކަތައް ދައްކާ އެކަމަށް ހިތްވަރު ދޭން މަސައްކަތް ކުރަނީ ކަމުގެ މަފްހޫމް އޮޅުވާލައިގެންނެވެ. ގަސްތުގައި އެހެން މުސްލިމުންނަށް ދޮގު ތުހުމަތު ކުރާ މީހުން ދައްކާ އެއް ވާހަކަ އަކީ، މި އުންމަތުގެ އެއްމެ މާތް އިންސާނާ ކަމަށްވީ ކައު ސާހިބާ މާތް މުޙައްމަދުގެ ނަބީކަލޭގެފާނުގެ މައްޗަށްވެސް ދޮގު އެތައް ތުހުމަތުތަކެއް ކުރެވުނު ވާހަކައެވެ. އަދި ތުހުމަތުތަކަކުން އިންސާނަކު ބަރީއަ ވާނަމަ، މުޙައްމަދުގެ ފާނު ބަރީއަ ވީސްތާއެވެ. އެހެނެއްކަމަކު އެކަން އެހެން ވެފައެއް ނެތެވެ. އެހެންކަމުން މިބައިމީހުންގެ އުޒުރަކަށްވީ މާތް ރަސޫލާ މީސްތަކުންގެ ދޮގު ތުހުމަތުތަކުން ބަރީއަ ނުވާއިރު، އާދައިގެ އިންސާނަކު އެފަދަ ތުހުމަތުތަކުން ބަރީއަ ވެގެން ނުވާނޭ ބުނާ ފަދަ އުޒުރެކެވެ. އެއާއި އެކު މިބައިމީހުން އެހެން މުސްލިމުތަކުންނަށް ބޮޑެތިވީހާ ދޮގު ތުހުމަތުތައް ކޮށް އުޅެއެވެ.

ހެޔޮވާނީ ކޮންފަދަ އަކުން ހެއްޔެވެ؟ މީހުންނަށް ދޮގު ތުހުމަތު ކުރަމުން، އޭނާ އެ ތުހުމަތުތަކުން ބަރީއަ ނުވާނޭކަން ބުނަން ރަސޫލާގެ ވާހަކަ މި ދައްކަނީ ދީނީ ހަމައިން ކޮން ޢިލްމެއް ލިބިފައި އޮތީމާ ހެއްޔެވެ. އޭ މުސްލިމު އަހުންނޭވެ! ދީނީ ޢިލްމާއި ދީނީ ވާހަކަތައް ދައްކަން ވާނީ ދެކެވޭ ވާހަކައެއް އެނގިތިބޭ ހާލުގައެވެ. ތިމާގެ އަމަލުތައް ދިފާއުކުރަން، އޭގެ އަސްލު ނޭނގޭ ދީނީ ވާހަކަތައް ނުދައްކާށެވެ! ދީނޭ ކިޔައިގެން، މާތް ރަސޫލާއޭ ކިޔައިގެން ތިމާ ބޭނުން ގޮތަކަށް ވާހަކަ ނުދައްކާށެވެ.