ދައުލަތުގެ ރަސްމީ ރިޒާވް 614.6 މިލިއަން އެމެރިކާ ޑޮލަރަށް އިތުރުވެފައިވާ ކަމަށާއި، އަދި ބޭނުންކުރެވޭ ގޮތަށް ރާއްޖޭގެ ބޭންކުތަކުގައި މަރުކަޒީ ބޭންކުން އިންވެސްޓްކޮށްފައި 120 މިލިއަން އެމެރިކާ ޑޮލަރު އެބަހުރި ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސްހިސާބުތަކުން ދައްކައިފިއެވެ.

އެމްއެމްއޭ އިން ނެރެފައިވާ ބަޔާނުގައިވާ ގޮތުން، ބޭރު ފައިސާގެ ރިޒާވް އިތުރުކުރުމަށާއި އިގްތިސާދީ ހަމަޖެހުމަށް އެހީތެރިވުމުގެ ގޮތުން، އެމްއެމްއޭއާ ރިޒާވް ބޭންކް އޮފް އިންޑިއާ (އާރްބީއައި) އާއި ދެމެދު ދާދި ފަހުން ވެވުނު ކަރަންސީ ސްވޮޕް އެރޭންޖްމަންޓްގެ ދަށުން، 400 މިލިއަން ޔޫއެސް ޑޮލަރު ލިބިފައިވެއެވެ.

އާއްމުކޮށް އެމްއެމްއޭއިން މިފަދަ ފައިސާ ބޭރުގެ ބޭންކުތަކުގައި އިންވެސްޓް ކުރި ނަމަވެސް، އޮކްޓޫބަރު 2024 ގައި އެމްއެމްއޭ އިން ވަނީ 120 މިލިއަން ޑޮލަރު ރާއްޖޭގެ ބޭންކުތަކުގައި އިންވެސްޓް ކޮށްފައެވެ.

މިނިންމުމުގެ މަގުސަދަކީ މި އިންވެސްޓްމަންޓުން ލިބޭ ނަފާ ވީހާވެސް ބޮޑުކުރުމާއި މާލީ ދާއިރާގެ ކުރިއެރުމާއި ހަމަޖެހުމަށް މަގުފަހިކޮށް މުޅި އިގްތިސާދަށް ފައިދާވާނެ ގޮތަށް މިކަންކުރުމެވެ.

މި ބަދަލުތަކާ އެކު، ސެޕްޓެމްބަރު 2024 ނިމުނުއިރު އޮފިޝަލް ރިޒާވް އެސެޓްސް 371.2 މިލިއަން އެމެރިކާ ޑޮލަރުގައި ހުރި ނަމަވެސް، އޮކްޓޯބަރު 2024 ނިމުނުއިރު އޮފިޝަލް ރިޒާވް އެސެޓްސް ވަނީ 614.6 މިލިއަން އެމެރިކާ ޑޮލަރަށް އިތުރުވެފައެވެ.

މީގެ އިތުރުން މި މުއްދަތުގައި އަދަރ ފޮރިން ކަރަންސީ އެސެޓްސްގެ ގޮތުގައި ހުރީ 122.5 މިލިއަން އެމެރިކާ ޑޮލަރެވެ. މި ދެ ބަޔަކީ ވެސް އެމްއެމްއޭގެ ފޮރިން ކަރަންސީ އެސެޓްގެ ތެރޭގައި ހިމެނޭ ދެބައެވެ.