މިފަހަރުގެ ޔޫރޯ ފުޓްބޯޅަ މުބާރާތް، އިޓަލީ އަށް ކާމިޔާބުކުރެވޭނެ ކަމަށް އެ ޓީމުގެ ޕީއެސްޖީގެ މިޑްފީލްޑަރު މާކޯ ވެރާޓީ ބުނެފިއެވެ.

ޔޫރަޕުގެ ތަފާތު 11 ސިޓީއެއްގައި މިހާރު ކުޅެމުންދާ ޔޫރޯގައި އިޓަލީ އިން ދައްކަމުންދާ މޮޅު ކުޅުމުގެ ސަބަބުން އެ ޓީމަކީ މި މުބާރާތުގެ ފޭވަރިޓެއްކަމަށް ގިނަ ބަޔަކު ގަބޫލުކުރާއިރު، އިޓަލީގެ މިޑްފީލްޑްގެ އެންމެ މުހިއްމު ކުޅުންތެރިޔާ ކަމަށްވާ ވެރާޓީ ބުނީ އެ ޓީމުގެ ކުޅުންތެރިންގެ ވިސްނުން ވެސް އެގޮތަށް ބައްޓަންކުރަންޖެހޭނެ ކަމަށެވެ.

ޔުއެފާގެ ރަސްމީ ވެބްސައިޓަށް ދާދިފަހުން ވެރާޓީ ދިން އިންޓަވިއެއްގައި އޭނާ ބުނީ މި ފަހަރުގެ ޔޫރޯގައި އިޓަލީ އިން މުބާރާތުގެ ކޮންމެ ބުރެއްގައި ކާމިޔާބު ހޯދައި ކުރިއަށް އަޅާ ކޮންމެ ފިޔަވަޅަކާއެކު އޮންނަ ޕްރެޝަރު ބޮޑުވާނެ ކަމަށާއި، ހުރިހާ ކުޅުންތެރިންގެ ބުރަ މަސައްކަތާއި، ފުރިހަމަ އިތުބާރާއެކު އެ ޓީމަށް ހާސިލްކުރަން ބޭނުންވާ ލަނޑުދަނޑިއަށް ވާސިލްވެވިދާނެ ކަމަށެވެ.

"ކޮންމެ މެޗަކުން ހާސިލްކުރަން ބޭނުންވާ ކަންތައްތައް ކަނޑައެޅުމުން އަމާޒަށް ވާސިލްވެވޭނީ. އެހެން ނޫން ނަމަ އެކަމެއް ހާސިލްކުރުމަށް އުނދަގޫތައް ކުރިމަތިވާނެ،"

"ވަރަށް ކުޑަކުޑަ ކަމެއްގެ ސަބަބުން ވެސް މެޗެއްގައި ތަފާތު ފެނިދާނެ. އެހެންވުމުން ކޮންމެ މެޗެއްގައި ވެސް އަހަރެމެންގެ އެންމެ 'ބެސްޓް' ވާނެ ދޭން." ވެރާޓީ ބުންޏެވެ.

ވެރާޓީ އަށް ނިމިދިޔަ ސީޒަނުގެ ފަހުކޮޅު ކުރިމަތިވި އަނިޔާގެ ސަބަބުން މި ފަހަރުގެ ޔޫރޯގައި އިޓަލީ އިން ކުޅުނު ފުރަތަމަ ދެ މެޗުގައި ނުކުޅެވުނެވެ. އެކަމަކު، އެ ޓީމުން ގްރޫޕް ސްޓޭޖުގައި އެންމެ ފަހުން ވޭލްސްއާ ދެކޮޅަށް ކުޅެ 1-0 އިން މޮޅުވި މެޗުގައި އޭނާ ވަނީ ކުޅެފައެވެ.

މިކަމާ ގުޅޭގޮތުން ވެރާޓީ ބުނީ އަނިޔާ އަށް ފަހު ކުޅުމުގެ ތެރެއަށް އާދެވުމުން ވަރަށް ބޮޑު ހިތްހަމަޖެހުމެއް ލިބިފައިވާ ކަމަށާއި، ވޭލްސްއާ ދެކޮޅަށް ކުޅުނު މެޗު ހުރިހާ ގޮތަކުން ވެސް ހާއްސާ ކަމަށެވެ.

"އެ މެޗަކީ ހުރިހާ ގޮތަކުން ވެސް ވަރަށް ހާއްސަ މެޗެއް. ކުޅުމަށް އެނބުރި އާދެވުމުން ވަރަށް ބޮޑު އުފަލެއް ލިބިއްޖެ،" ވެރާޓީ ބުންޏެވެ.

މި މުބާރާތުގައި އިޓަލީ އަށް ދެން އޮތީ ދެވަނަ ބުރުގައި އޮސްޓްރިއާއާ ދެކޮޅަށް ކުޅޭ މެޗެވެ. މި މެޗު ފަށާނީ ރާއްޖޭގަޑިން މިރޭ ދަންވަރު 12 ޖަހާއިރު އެވެ.