ކްލަބްހައުސް އަކީ އެއް ފަހަރާ އެތަށް ހާސް ބަޔަކު އެއް ތަނަކުން ބައްދަލުވެ ވާހަކަ ދެއްކުމަށް ނުވަތަ އަޑު އެހުމަށް ޚާއްސަކޮށް އުފައްދާފައިވާ އެޕްލިކޭޝަނެކެވެ. އަލްފާ އެކްސްޕްލޮރޭޝަނުން ތައްޔާރު ކުރި މި އެޕް އެންމެ ފުރަތަމަ މާކެޓަށް ނެރުނީ 2020 ވަނަ އަހަރުގެ މަރޗްމަހުގައެވެ. އަދި މިއަހަރުގެ މޭމަހުން ފެށިގެން މި އެޕްގެ އެންޑްރޮއިޑް ބީޓާ އެޕްލިކޭޝަން އާންމުންނަށް ވަނީ ފޯރުކޮށްދީފައެވެ. މި އެޕްލިކޭޝަން ބޭނުން ކުރެވޭނީ ކުރިން މި އެޕް އަޅާފައިވާ ކޮންމެވެސް މީހަކު ދަޢުވަތު ދިނުމުން ނުވަތަ ނޮމިނޭޓް ކުރުމުންނެވެ. ކްލަބްހައުސް އިން ހާމަކުރި ގޮތުގައި ކުރިއަށް އޮތްތަނުގައިވެސް މިކަން އޮންނާނީ މިހެންނެވެ. އެއީ މި އެޕްލިކޭޝަން ބޭނުންކުރާ މީހުންގެ އަދަދު ބަލަހައްޓާ އެއާ އެއްވަރަށް ޚިދުމަތުގެ ފެންވަރު ރަގަޅުކުރުމަށ ކުރަން ޖެހޭ ކަންކަން ކުރުމަށް ފަސޭހަ ކުރުމުގެ ބޭނުމުގައެވެ. ކުންފުނީގެ އަމާޒަކީ މިއަހަރުގެ ނިމުމުގެ ކުރިން އެންޑްރޮއިޑް ވަރޝަން އެއްކޮށް އާންމުންނަށް ހުޅުވާލުމެވެ. މިހާތަނަށް މިލިއަނަކަށްވުރެ ގިނަ މީހުން ބޭނުންކުރަމުންދާ މި އެޕްލިކޭޝަންގެ ވެއިޓިންގ ލިސްޓްގައިވެސް މިލިއަނަކަށް ވުރެ ގިނަ މީހުން އެބަތިއްބެވެ.

މީސްމީޑިޔާގެ އެތައް ޕްލެޓް ފޯމްތަކެއް މިހާރުވެސް ބޭނުން ކުރަމުން ދަނިކޮށް ކްލަބްހައުސް އަށް މިހާ ކުރުމުއްދަތެއްގެ ތެރޭގައި މިހާބޮޑު މަޤްބޫލުކަމެއް ލިބުނު ސަބަބަށް ވެސް ބަލާލާނަމެވެ. މީސްމީޑިޔާގެ ގިނަ ޕްލެޓް ފޯރމްތަކަކީ ލިޔެގެން ބޭނުންކުރާ ގޮތަށް ފަރުމާ ކުރެވިފައިވާ ޕްލެޓްފޯމްތަކެވެ. ގިނަ ބަޔަކަށް މިއީ ފަސޭހަ ކަމަށް ނުވެއެވެ. ދެން ވީޑިއޯ އަދި އޯޑިއޯ ކޯލް ކުރެވޭ ޒޫމް ފަދަ ޕްލެޓް ފޯމްތަކުގައި ވެސް ރެސްޓްރިކްޝަން ތައް ގިނައެވެ. ހަމަ އެކަނި އޯޑިޔޯ ބޭނުން ކުރެވެން ހުރުމުން އުޅަނދު ފަހަރު ދުއްވާ މީހުނާއި، އެހެންކަމެއްގައި އަވަދިނެތި އުޅޭ މީހުނަށްވެސް މިއީ ބޭނުންކޮށްލަން ވަރަށް ފަސޭހަ އެޕްލިކޭޝަންއަކަށް ވަނީ ވެފައެވެ.

ކްލަބްހައުސްގެ ކޮންމެ ރޫމްއަކަށް ވެސް ވަދެ އެތަނެއްގައި ދައްކާ ވާހަކަ އަޑުއަހާ ނުވަތަ އެވާހަކައިގައި ބައިވެރި ވުމަކީ ވަރަށް ފަސޭހަކަމެކެވެ. މީގެ އެއް މިސާލަކީ، މި ފަހުން އިސްރާއިލާއި ފަލަސްތީނުގެ ދެމެދު ހަމަލާތައް ބަދަލު ކުރެވުނު ފަހުން "މީޓް ޕަލަސްތީނިއަންސް އެންޑް އިޒްރާއިލީސް" ގެނަމުގައި ހެދުނު ބަހުސް ކޮޓަރިއަކަށް ހަފްތާއެއްގެ ތެރޭގައި ދުނިޔޭގެ އެކި ހިސާބުގެ 450،000 އަށް ވުރެ ގިނަ މީހުން ވަދެފައިވާ ކަމެވެ.

ރާއްޖޭގައިވެސް ކްލަބްހައުސްގެ މަޤްބޫލުކަން އަންނަނީ ވަރަށް ބޮޑަށް އިތުރު ވަމުންނެވެ. އެހެން ޕްލެޓްފޯމްތަކާއި ޚިލާފަށް ކްލަބްހައުސް ފާހަގަ ކުރެވެނީ ހަޑިހުތުރު ބަހުން ރައްދު ދިނުމުގެ ބަދަލުގައި އުފެއްދުންތެރި ޚިޔާލާއި ބިނާކުރަނިވި ފާޑުކިޔުން ތަކަށް ޚާއްސަ ތަނެއްގެ ގޮތުގައެވެ. މުޖުތަމަޢުއާއި ގުޅުން ހުރި ވަރަށް މުހިންމު މައުޟޫތަކަށް މިތަނުގައި ކޮންމެ ދުވަހަކުމެ ވާހަކަ ދެކެވި ބަހުސް ކުރެވުން ދެއެވެ. މީގެތެރެއިން އެންމެ ފާހަގަ ކުރެވޭ ބަހުސްތަކަކީ ވެކްސިން ޖެހުމާއި މެދު ޚިޔާލު ތަފާތު ވެފައިވާ މައްސަލައާއި އަންހެނުން ކުދިން ޚިތާނުކުރުމުގެ މައްސަލައިގެ ބަހުސްތަކެވެ.

މީގެ އިތުރުން މުނިފޫހި ފިލުވުމުގެ އެކި ޕްރޮގްރާމް ތަކާއި ޚަބަރު ގަޑިތައް ވެސް ބައެއް މީޑިޔާތަކުން ކްލަބްހައުސްގައި ގެނެސްދެއެވެ. އެގޮތުން ތީރު މީޑިޔާގެ ފަރާތުން ގެނެސްދޭ މިފަދަ ޕްރޮގްރާމްތައް އަޑުއެހުމާއި ބައިވެރިވުމަށް ތިރީގައިވާ ލިންކުން ތީރުމީޑިޔާ ފޮލޯ ކުރައްވާށެވެ.

https://www.clubhouse.com/club/theeru-media