ޔޫރޯ ފުޓްބޯޅަ މުބާރާތުގައި ރޭ ކުޅުނު މެޗުގައި ބަދަލު ކުޅުންތެރިންގެ ގޮތުގަައި ކުޅެން ނިކުތް ފެޑެރީކޯ ޗިއޭސާ އާއި މަޓެއޯ ޕެސީނާ އިތުރުވަގުތުގެ 15 މިނެޓުގެ ދެ ހާފުގައި ވައްދާލި ލަނޑުތަކާއެކު އޮސްޓްރިއާ އަތުން 2-1 އިން މޮޅުވެ އިޓަލީ އިން އެ މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.

މިއީ އިޓަލީ އިން ޖެހިޖެހިގެން މޮޅުވި 12 ވަނަ މެޗެވެ. އެ ޓީމު އެންމެ ފަހުން ކުޅުނު 31 މެޗުން ވެސް ބަލިވެފައިނުވާއިރު، މިއީ ވެސް ރެކޯޑެކެވެ. މީގެއިތުރުން، ރޭގެ މެޗަކީ ޔޫރޯގެ ތާރީޚުގައި އޮސްޓްރިއާ އިން ނޮކްއައުޓް ބުރުގައި ވާދަކުރި ފުރަތަމަ ފަހަރެވެ. އަދި މިއީ 1954 ވަނަ އަހަރުގެ ފީފާ ވޯލްޑް ކަޕްގެ ފަހުން އެ ޓީމުން ބޮޑު މުބާރާތެއްގެ ނޮކްއައުޓް ބުރުގައި ކުޅުނު ފުރަތަމަ މެޗެވެ.

އިޓަލީން ރޭގެ މެޗަށް ނިކުތީ އެ ޓީމުގެ ކެޕްޓަން ޖިއޯޖިއޯ ކިއެލީނީގެ ބަދަލުގައި ފްރެންސެސްކޯ އަޗެރްބީ އާއި މި މުބާރާތުގެ ގްރޫޕް ސްޓޭޖުގައި އެ ޓީމު ކުޅުނު ފުރަތަމަ ދެ މެޗުގައި މޮޅު ކުޅުމެއްދެއްކި މެނުއެލް ލޮކަޓެއްލީގެ ބަދަލުގައި މާކޯ ވެރާޓީ އަށް ފުރަތަމަ އެގާރައިން ފުރުޞަތު ދީގެންނެވެ.

ލަންޑަންގެ ވެމްބްލީ ސްޓޭޑިއަމްގައި ރޭ ކުޅުނު މި މެޗު ފެށިގެން އިޓަލީ އިން ޑޮމިނޭޓްކުރަމުންދިޔައިރު އެ ޓީމުން ތަނަވަސްކުރި ފުރަތަމަ ފުރުޞަތުގައި ލިއޮނާޑޯ ސްޕިނަޒޯލާ ދިން ބޯޅައަކުން ނިކޯލޯ ބަރެއްލާ ފޮނުވާލި ބޯޅަ އޮސްޓްރިއާގެ ކީޕަރު ޑެނިއެލް ބަކްމަން މަތަކުރިއެވެ. އޮސްޓްރިއާ އިން ކައުންޓަ އެޓޭކްތަކުގައި އިޓަލީގެ ޑިފެންސަށް ބާރުބޮޑުކުރަމުންދިޔައިރު އެ ޓީމުގެ މާކޯ އާނައުޓޮވިޗް ފޮނުވާލި ބޯޅަ ދިޔައީ ގޯލަށް ވުރެ މާ މަތިންނެވެ. ފުރަތަމަ ހާފުގައި އިޓަލީ އަށް ލިބުނު އެންމެ ރަނގަޅު ފުރުޞަތުގައި ޗީރޯ އިމޯބިލޭ ފޮނުވާލި ބޯޅަ އަމާޒުވީ ގޯލްގެ ހުރަސްދަނޑިއަށެވެ.

އިޓަލީގެ މަޓެއޯ ޕެސީނާ ގޯލަށް އަމާޒުކޮށް ބޯޅަ ފޮނުވާލަނީ. --ފޮޓޯ: ޓުވިޓާ

ދެވަނަ ހާފުގައި އިޓަލީ އަށް މާއެދެވޭ ކުޅުމެއް ދެއްކިފައިނުވާއިރު އޮސްޓްރިއާ އިން ވަނީ ލަނޑެއްޖެހުމާ ގާތަށް ދެ ފަހަރު ޖެހިލާފައެވެ. އެ ޓީމުގެ މިޑްފީލްޑަރު މާސެލް ސަބިޓްޒާ ފޮނުވާލި ބޯޅަ އިޓަލީގެ ކުޅުންތެރިއެއްގެ ގައިގަ ޖެހިފައި ގޯލްގެ ދަނޑިކައިރިން ބޭރަށް ދިޔައިރު، އޭގެފަހުން އާނައުޓޮވިޗް ކާމިޔާބުކުރި ގޯލް ރެފްރީ ގަބޫލުނުކުރީ ވީއޭއާރް އިން ބެލުމަށްފަހު އޮފްސައިޑް ކަމަށް ނިންމާފައެވެ.

އޭގެ ނަތީޖާއެއްގެ ގޮތުން، ދެވަނަ ހާފުގެ ފަހުކޮޅު އިޓަލީގެ ކޯޗު ރޮބާޓޯ މަންޗިނީ ގެނައި ބަދަލުތަކާއެކު އެ ޓީމުން ވަނީ އިތުރުވަގުތުގެ 15 މިނެޓުގެ ފުރަތަމަ ހާފުގެ ކުރީކޮޅު ލީޑްނަގާފައެވެ. އިތުރުވަގުތުގެ ފުރަތަމަ ހާފުގެ ކުޅުން ފެށިތާ ފަސްވަނަ މިނެޓުގައި އިޓަލީ އަށް މިލަނޑުޖަހައިދިނީ ބަދަލު ކުޅުނުްތެރިއެއްގެ ގޮތުގައި ކުޅެން ނިކުތް ޔުވެންޓަސްގެ ވިންގާ ޗިއޭސާ އެވެ. މިއީ ސްޕިނަޒޯލާ ނަގައިދިން ބޯޅަ ބޮލުން ކޮންޓްރޯލް ކޮށްލުމަށްފަހު އޮސްޓްރިއާގެ ކުޅުންތެރިއަކު ކައިރިން ނައްޓާލުމަށް ފަހު ޗިއޭސާ ވަރަށް ހަނި އޭންގަލަކުން ގޯލުގެ ދުރު ކަނަށް ބޯޅަ އަމާޒުކޮށްލައިގެން ކާމިޔާބުކުރި ރީތި ގޯލެކެވެ.

މި މެޗުގައި އިޓަލީ އިން ޖެހި ދެވަނަ ލަނޑު، އިތުރުވަގުތުގެ 15 މިނެޓުގެ ފުރަތަމަ ހާފުގެ އެންމެ ފަހު މިނެޓުގައި ކާމިޔާބުކޮށްދިނީ ޕެސީނާ އެވެ. މިއީ މެޗުގެ ފަހު ހާފުގައި ކުޅެން ނިކުތް އަންދްރެއާ ބެލޮއްޓީ ދިން ބޯޅައަކުން ޕެސީނާ ކާމިޔާބުކުރި ގޯލެކެވެ. މިއީ މި މުބާރާތުގައި އޭނާ ޖެހި ދެވަނަ ލަނޑެވެ. އިތުރުވަގުތުގެ ދެވަނަ ހާފުގައި އޮސްޓްރިއާ އިން ލަނޑެއްޖެހުމަށް ކުރި މަސައްކަތްތައް ހުއްޓުވުމުގައި އިޓަލީގެ ޒުވާން ކީޕަރު ޖިއަންލުއިޖީ ޑޮންނަރުއްމާ މޮޅު ސޭވްތަކެއް ކޮށްފައިވީނަމަވެސް، މެޗުގެ 114 ވަނަ މިނެޓުގައި ލުއީސް ޝައުބް ނަގައިދިން ކޯނަރަކުން ސާސާ ކަލައިޗިޗް ވެއްޓިގެންފައި ބޮލުން ގޯލްގެ ތެރެއަށް ވައްދާލި ބޯޅަ ހުއްޓުވުމަށް ޑޮންނަރުއްމާ އަށް މާބޮޑު ކަމެއް ނުކުރެވުނެވެ.

އިޓަލީގެ އިތުރުން މިހާތަނަށްއައިއިރު މި މުބާރާތުގެ ކުއާޓާ ފައިނަލުން ޖާގަ ހޯދާފައިވަނީ ޑެންމާކުން ނެވެ. އެ ޓީމުން ވަނީ ރޭ ކުޅުނު ފުރަތަމަ މެޗުގައި 4-0ގެ ތަފާތު ބޮޑު ނަތީޖާއަކުން ވޭލްސް ބަލިކޮށްފައެވެ. މި މުބާރާތުގެ ކުއާޓާ ފައިނަލްގައި އިޓަލީ ނިކުންނާނީ މިރޭ ކުޅެވޭ ދެވަނަ ބުރުގެ މެޗުގައި ޕޯޗުގަލް އާއި ބެލްޖިއަމް ކުޅެގެން މޮޅުވާ ޓީމަކާ ދެކޮޅަށެވެ.