ޗެމްޕިއަންސްލީގުގައި ރެއާލްމެޑްރިޑާއި ބެންފީކާ ބައްދަލުކުރި މެޗުގައި ރެއާލްގެ ވިނިޝިއަސް ޖޫނިއަރއާ ނަސްލީގޮތުން ދިމާކޮށްލި މައްސަލާގައި ވިނިޝިއަސްކޮޅަށް މައްސަލަ ނިމިއްޖެނަމަ، ޔޫރަޕުގެ މުބާރާތްތަކުން 10 މެޗުގެ ސަސްޕެންޝަނެއް ބެންފީކާގެ ޖިއަންލޫކާ ޕްރެސިޓިއާނީއަށް އައިސްދާނެކަމަށް ޚަބަރުތައް ބުނެފިއެވެ.
ޗެމްޕިންސްލީގުގެ ނޮކައުޓް ސްޓޭޖުގެ ފުރަތަމަ ލެގުގައި ރެއާލްއާއި ބެންފީކާ ބައްދަލުކުރި މެޗުގައި ހިނގާދިޔަ މި ހާދިސާގެ ސަބަބުން 10 މިނެޓު ވަންދެން މެޗުގެ ކުޅުން މެދު ކަނޑާލަންޖެހުނެވެ. ވީޑިއޯތަކުން ފެންނަ ގޮތުގައި ބެންފީކާގެ ކުޅުންތެރިޔާ ކައިރީގައި ވިނިޝިއަސް ހުއްޓާ ޖާރޒީއިން އަނގަ ފޮރުވޭގޮތަށް ހަދާލުމަށްފަހު ކޮންމެވެސް އެއްޗެއް ބުނެއެވެ. އެއާއެކު ވިނިޝިއަސް ގޮސް ރެފްރީ ފްރަންކޮއިސް ލެޓެކްޒިއަރ ކައިރީ އެ މައްސަލަ ޖައްސައެވެ. އަދި އެ މައްސަލަ ބެލުމަށް ކުޅުން މެދުކަނޑާލީ ވިނިޝިއަސްއާއެކު ރެއާލްގެ ކުޅުންތެރިން ދަނޑުން ފޭބުމުންނެވެ.
މި މައްސަލާގައި ބެންފީކާއިންވަނީ އެޓީމުގެ ކުޅުންތެރިޔާގެ ދިފާޢުގައި ވާހަކަ ދައްކާފައެވެ. އެކްސްގައި ބެންފީކާއިން ބަޔާންކޮށްފައިވާ ގޮތުގައި، މަންޒަރު ފެންނަ ގޮތުން ކުޅުންތެރިން ތިބި ދުރުމިނަށް ބަލާއިރު، ރެއާލްގެ ކުޅުންތެރިންނަށް އިވުނު ކަމަށް ބުނާ އެއްވެސް އެއްޗެއް އިވޭނެކަމަށް ގަބޫލު ނުކުރެވޭކަމަށެވެ. އަދި ބެންފީކާއަކީ އަބަދުވެސް ކުޅުންތެރިންގެ އަހުލާގާއި، އިދިކޮޅަށް ކުޅޭ ޓީމުތަކަށް ދޭންޖެހޭ އިހްތިރާމްދީ އަދި ހެދިފައިވާ ގަވާއިދުތަކަށް ބޯ ލަނބާ ޓީމެއްކަމަށްވެސް ހާމަކޮށްފައިވެއެވެ.
ބެންފީކާގެ ކޯޗު ހޯސޭ މޮރީނިއޯ މެޗަށްފަހު ވާހަކަ ދައްކަމުން ބުނެފައިވާ ގޮތުގައި އޭނާއަށް ދެ ކުޅުންތެރިންގެ ވާހަކަވެސް އަޑު އެހިކަމަށާއި ދެކުޅުންތެރިން ބުނަނީ ދެގޮތަކަށްކަމަށެވެ. އަދި ވިނިޝިއަސް ލަނޑުޖެހުމަށްފަހު އުފާފާޅުކުރިއިރު އެއްވެސް އިހުތިރާމެއް ނުކުރި ކަމަށާއި، ބެންފީކާއަކީ ތަފާތުކުރުންތަކަށް ޖާގަދޭ ޓީމެއް ނޫންކަން ބެންފީކާގެ ލެޖެންޑް އުސެބިއާގެ ކުޅިވަރު ހަޔާތަށް ބަލާލުމުންވެސް އެނގޭނެކަމަށެވެ.
ޗެމްޕިއަންސްލީގުގައި ރެއާލްއާއި ބެންފީކާ ބައްދަލުކުރި މެޗު 1-0 އިން ކާމިޔާބުކުރީ ރެއާލްއެވެ. މެޗުގެ ހަމައެކަނި ލަނޑު އެޓީމަށް ކާމިޔާބު ކޮށްދިނީ ވިނިޝިއަސް ޖޫނިއާއެވެ.