މިވަގުތު އާސެނަލްގެ އެންމެ މުހިންމު އެއްކުޅުންތެރިޔާ ބުކަޔޯ ސަކާ ކޮންޓްރެކްޓް އާ ކޮށްފިއެވެ.
އާސެނަލްއަށް މިހާތަނަށް 296 މެޗު ކުޅެ، 77 ލަނޑު ޖަހައިދީފައިވާ ސަކާ ކުރިން ހަދާފައިވާ ކޮންޓްރެކްޓް ހަމަވާން އޮތީ 2027 ގެ ނިޔަލަށެވެ. ނަމަވެސް އައު ކޮންޓްރެކްޓާއެކު 2031 ގެ ނިޔަލަށް މުއްދަތު އިތުރުކުރެވިގެންދިޔައިރު، އޭނާ ވެގެން ގޮސްފައިވަނީ އާސެނަލްގެ އެންމެ މުސާރަ ބޮޑު ކުޅުންތެރިޔާއަށެވެ.
މިވަގުތު ލަނޑެއް ނުޖެހި ގިނަ ދުވަސްތަކެއް ވެފައިވާ ސަކާގެ ފޯމާމެދު ބައެއް ފަރާތްތަކުން ސުވާލު އުފައްދަމުން ދިޔަނަމަވެސް، އޭނާއަކީ މިކޭލް އާޓީޓާ ކޯޗުކަމާ ހަވާލުވިފަހުން އެޓީމަށް އެންމެ ގިނަ ވަގުތު ކުޅެދީފައިވާ ކުޅުންތެރިޔާއަށެވެ. އެންމެފަހުން ސަކާ އާސެނަލްއަށް ލަނޑެއް ޖަހައިދީފައިވަނީ މިދިޔަ ޑިސެމްބަރ މަހު ބްރެންފަޑު ކައިރިން 2-0 އިން މޮޅުވި މެޗުގައެވެ.
އާސެނަލްގެ ޔޫތު އެކަޑަމީއިން އުފެދުނު ސަކާ އާސެނަލްގެ ސީނިއަރ ޓީމުގައިވެސް އަންނަނީ ތަފާތު މޮޅު ކުޅުމެއް ދައްކަމުންނެވެ. އެގޮތުން އާސެނަލް ލީގު ތަށި ހޯދުމާ ވަރަށް ގާތަށް 24/2023 ސީޒަނުގައި ގެންދިޔުމުގައި އޭނާގެ ހިއްސާ ބޮޑެވެ. އެސީޒަނުގައި އެންމެ ދެ ޕޮއިންޓުގެ ތަފާތަކުން އާސެނަލް ލީގުގެ ދެވަނައަށް ދިޔަ ނަމަވެސް، ސަކާވަނީ 20 ލަނޑު ޖަހައި 16 ލަނޑު ޖެހުމަށް މަގުފަހިކޮށްދީފައެވެ.
ސަކާ މިއަހަރުގެ ސީޒަނުގައި އާސެނަލްއާއެކު އޮތީ ރަނގަޅު ހިސާބެއްގައެވެ. ލީގުގެ އެއްވަނާގައި އޮތްއިރު، ކަރަބައޯކަޕްގެ ފައިނަލަށްވަނީ ދަތުރުކޮށްފައެވެ. އަދި އެފްއޭކަޕްގެ ފަސްވަނަ ބުރަށް ޓީމު ދަތުރުކޮށްފައިވާއިރު، ޗެމްޕިއަންސްލީގުގެ ގަދަ 16 ގައިވެސް ޓީމު ވާދަކުރެއެވެ.