ކުރިޔަށްއޮތް ވިންޓަރ ޕެރަލިމްޕިކްސްގައި ރަޝިޔާގެ ދިދައިގެ ދަށުން އެގައުމު ތަމްސީލުކުރާނަމަ، އެމުބާރާތުގެ ހުޅުވާ ރަސްމިއްޔާތުގައި ޔުކްރޭނުގެ އޮފިޝަލުން ބައިވެރިނުވާނެކަމަށް އެގައުމުން ހާމަކޮށްފިއެވެ.
މިއަންނަ މަހު ބާއްވަން ހަމަޖެހިފައިވާ މިލާނޯ ކޯޓިނާ ވިންޓަރ ޕެރަލިމްޕިކްސްގައި ރަޝިޔާއާއި ބެލަރޫސްގެ ކުޅުންތެރިން ވާދަކުރާނެކަން ހާމަކުރުމުން، އެގޮތަށް އެކަން އޮތްނަމަ، އެމުބާރާތުގައި ޔުކްރޭނުގެ ކުޅުންތެރިން ވާދަކުރިނަމަވެސް، ޔުކްރޭނުގެ އޮފިޝަލުން މުބާރާތް ހުޅުވާ ރަސްމިއްޔާތުގައި ބައިވެރިނުވާނެކަމަށް އެގައުމުގެ އޮފިޝަލުންވަނީ ހާމަކޮށްފައެވެ. އެމުބާރާތުގައި ރަޝިޔާއާއި ބެލަރޫސްއިން އެކުޖުމްލަ 10 އެތުލީޓުން ބައިވެރިވާނެކަމަށް އިންޓަނޭޝަނަލް ޕެރަލިމްޕިކް ކޮމިޓީއިން މިދިޔަ އަންގާރަ ދުވަހު ވަނީ ހާމަކޮށްފައެވެ.
މި މުބާރާތުގައި ރަޝިޔާއަށް ގޯލްޑް މެޑަލްއެއް ލިބިއްޖެނަމަ ވެގެންދާނީ، ރަޝިޔާއިން ޔުކްރޭނަށް އަތްގަދަކުރަން ފެށިފަހުން އެފަދަ ބޮޑު ކުޅިވަރު ރަސްމިއްޔާތެއްގައި ރަޝިޔާގެ ގައުމީ ސަލާމް އިވިގެންދާނޭ ފުރަތަމަ ފަހަރަށެވެ.
2014 ވަނަ އަހަރުގެ ޕެރަލިމްޕިކްސްގެ މުބާރާތުގައި އެގައުމުން ވާދަކުރިފަހުން އެ މުބާރާތުގައި ވާދަކުރާ މިއީ ފުރަތަމަ ފަހަރެވެ.