ރޮހިންޔާ ރެފިއުޖީންނާއެކު ރޯދަ ވީއްލުމެއްގައި ބައިވެރިވެ އެހީތެރިކަން ފޯރުކޮށްދިނުމަށް ޖަރުމަނާއި ރެއާލްމެޑްރިޑްގެ ކުރީގެ މަޝްހޫރު ފުޓްބޯޅަ ކުޅުންތެރިޔާ މެސުޓް އޮޒިލް ބަންގްލަދޭސްއަށް ޒިޔާރަތްކޮށްފިއެވެ.
ޑެއިލީ އޮބްޒާވާ ވެބްސައިޓުގައިވާ ގޮތުން، އޮޒިލް ބަންގްލަދޭޝްގެ ވެރިރަށް ޑާކާއަށް ދިޔައީ މިއަދުގެ ވަގުތެއްގައެވެ. ރޯދަމަހާ ގުޅުވައިގެން ރޮހިންޔާ މުސްލިމުންނަށް އެހީވުމަށާއި ތުރުކީން ވެދެމުން އަންނަ އިންސާނީ އެހީތައް އިތުރަށް ހަރުދަނާ ކުރުމުގެ ބޭނުމުގައި އޮޒިލް ކުރަމުން އަންނަ މި ދަތުރުގައި އޭނާއާއެކު ތުރުކީގެ ރައީސް ތޮއްޔިބު އުރުދުޢާންގެ ދަރިކަލުން ބިލާލް އުރުދުޢާންވެސް ބައިވެރިވެ ވަޑައިގަންނައެވެ. މިއަދު އޮޒިލްވަނީ ޔުނިވާސިޓީ އޮފް ޑާކާއިން އިސްނަގައިގެން ކުރިޔަށް ގެންދާ ޓާކިޝް ކޯޕަރޭޝަން އެންޑް ކޯޑިނޭޝަން އެޖެންސީ (ޓިކާ) އިފްތިތާހް ކޮށްދީފައެވެ. އެ އެޖެންސީއަކީ ޝަހީދު މޯޓުޒާ މެޑިކަލް ސެންޓަރުގެ ސިއްހީ ކަންކަން އިތުރަށް ހަރުދަނާ ކުރުމުގެ ބޭނުމުގައި އުފެއްދި އެޖެންސީއެކެވެ.
އޮޒިލްގެ މިދަތުރުގައި މިއަދުވަނީ ބަންގްލަދޭޝްގެ ކޮކްސް ބާޒާރުގައި ދިރިއުޅެމުން އަންނަ ރޮހިންޔާ މުސްލިމުންނަށް ޒިޔާރަތްކޮށްފައެވެ. އަދި އެތަނުގައި ދިރިއުޅެމުންދާ އެތައްހާސް މުސްލިމު ރެފިއުޖީންގެ ހާލު ބެލުމާއި އެމީހުންނާއެކު ރޯދަ ވީއްލުމުގައި ބައިވެރިވެ ތުރުކީއިން ފަންޑުކޮށްގެން ތަރައްގީ ކޮށްފައިވާ ސުކޫލުތަކަށް ޒިޔާރަތްކުރާ ގޮތަށްވަނީ ހަމަޖެހިފައެވެ.
މިޔަންމާގައި ޒަމާނުންސުރެ ހިނގަމުން އަންނަ ހަމަނުޖެހުންތަކާއި ނަސްލު ނައްތާލުމުގެ ހަރަކާތްތަކާއިގުޅިގެން އެގައުމުން ގިނަ އަދަދެއްގެ މުސްލިމުން އެކި ދުވަސްވަރު ބަންގްލަދޭޝްއަށްވަނީ ހިޖުރަކޮށްފައެވެ. އޭގެ ތެރެއިން އެންމެ ގިނަ ބަޔަކު ރެފިއުޖީންގެ ގޮތުގައި ބަންގްލަދޭޝްގައި ހިމާޔަތް ހޯދުމަށް ހިޖުރަކޮށްފައިވަނީ 2017 ވަނަ އަހަރުއެވެ. އޭގެ ފަހުން ތުރުކީއިން އަންނަނީ އެ މުސްލިމުންނަށް އެހީތެރިކަން ފޯރުކޮށްދެމުންނެވެ.
އޮޒިލް ފާހަގަކުރެވިފައިވަނީ މިފަދަ އިންސާނިއްޔަތާ ގުޅުންހުރި ކަންކަމުގައި ޚާއްޞަކޮށް މުސްލިމުންނަށް އެހީތެރިކަން ފޯރުކޮށްދިނުމުގައި އެއްވެސް ފަސްޖެހުމެއްނެތި ބަސްބުނެ އަމަލުންވެސް ދައްކަމުން އަންނަ ފަރާތެއްގެ ގޮތުގައެވެ.