ޗެމްޕިއަންސްލީގުގެ ނޮކައުޓް ސްޓޭޖުގައި ރޭ ބޯޑާ ގްލިމްޓް އާއި އިންޓަރ މިލާން ބައްދަލުކުރި މެޗު އިންޓަ ސިއްސުވާލުމަށްފަހު ބޯޑާ ގްލިމްޓް ކާމިޔާބުކޮށްފިއެވެ.
ނޯވޭއަށް ނިސްބަތްވާ ބޯޑާގެ ދަނޑުގައި ކުޅެވުނު މިމެޗު އިންޓަގެ މައްޗަށް ކުރި ހޯދީ 3-1 ގެ ނަތީޖާއަކުންނެވެ. ނޯވޭގެ ފުޓުބޯޅަ ސީޒަން ނިމިފައިވާތީ ބޯޑާ މިވަގުތު ވާދަވެރި މެޗުތަކެއް ނުކުޅެއެވެ. ނަމަވެސް މިދިޔަ މަހު ހަމަ އެހާލަތުގައި ޓީމު އޮއްވާވަނީ އެޓްލެޓިކޯ މެޑްރިޑާއި މެންޗެސްޓަރ ސިޓީވެސް ބަލިކޮށްފައެވެ. އެހެންކަމުން ބޯޑާ ނެރެމުން އަންނަ އާދަޔާ ޚިލާފު ނަތީޖާތަކަށް މިވަނީ ބޮޅެއް އިތުރުވެފައެވެ.
ރޭގެ މެޗުގައި ބޯޑާއިން ލީގު ނެގީ ފުރަތަމަ ވިހި ވަނަ މިނެޓު ތެރޭގައެވެ. އެޓީމުގެ ފޯވާޑު ހޮގް ފަހަތަށް ޖައްސާލި ބޯޅަ ގޯލުގެ ތެރެއަށް ފޮނުވާލީ ފެޓްއެވެ. ނަމަވެސް އޭގެ ދިހަ މިނެޓު ފަހުން އިންޓަގެ އެސްޕޮސިޓޯ ލަނޑެއް ޖަހައި ނަތީޖާ ހަމަހަމަކުރިއެވެ. ދެވަނަ ހާފު ފަށައިގެންވެސް ރަނގަޅަށް ކުޅެމުންދިޔަ ބޯޑާއިން މެޗުގެ ލީޑު ދެވަނަ ފަހަރަށް ނެގީ 61 ވަނަ މިނެޓުގައި ކެސްޕަރ ހޮގް ދިން ޕާހަކުން ޖެންޒް ހޯގްއެވެ. ތިންވަނަ ލަނޑު ޖަހައިދިނީ ކުރިން ދެލަނޑުވެސް ޖަހަން މަގުފަހިކޮށްދިން ކެސްޕަރ ހޮގްއެވެ.
ސީރިއޭގެ ޕޮއިންޓް ޓޭބަލުގެ އެއްވަނާގައި 8 ޕޮއިންޓުގެ ފަރަގަކާއެކު އިންޓަ އޮތް ނަމަވެސް ރޭގެ މެޗުގައި ބޯޑާ ކައިރިން މާ އެދެވޭ ކުޅުމެއް ކުޅެވިފައެއްނުވެއެވެ.
މި ދެޓީމުގެ ދެވަނަ ލެގުގެ ކުޅުން އޮންނާނީ 25 ފެބުރުވަރީ ވާ ބުދަ ދުވަހުއެވެ.