މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މި މަހުގެ 19 ވީ ބުރާސްފަތި ދުވަހު އެންމެ ގިނައިން ކްލިއާކޮށްފައިވަނީ ކުކުޅު ބިސް ކަމަށް އެ ކުންފުނީގެ ތަފާސްހިސާބުތަކުން ދައްކައިފިއެވެ.
އެމްޕީއެލްގެ ތަފާސްހިސާބުތަކުން ދައްކާގޮތުގައި، މި ރަމަޟާން މަހުގެ ދެވަނަ ދުވަހުގެ ތެރޭގައި ކޮންޓެއިނަރާއި ވަކިވަކި ކޮންސައިންމަންޓް ހިމެނޭހެން މުޅިއެކު 3،260 ޓަނުގެ މުދާ ރާއްޖެ އެތެރެކޮށް، ކްލިއާކޮށްފައިވެއެވެ. އެއީ، 167 ކޮންސައިންމަންޓްގެ މުދަލެވެ.
އެ ކުންފުނިން ބުނީ، މިދިޔަ ބުރާސްފަތި ދުވަހު ކްލިއާކުރި ޕެރިޝަބަލް މުދަލު (އަވަހަށް ހަލާކުވާ ޒާތުގެ ކާބޯތަކެތީގެ ބާވަތް) ތަކުގެ ތެރެއިން އެންމެ ގިނަ އަދަދަކަށް ރާއްޖެ އެތެރެކޮށް، ކްލިއާކޮށްފައިވަނީ ކުކުޅު ބިސް ކަމަށެވެ. އެގޮތުން، ރޯދަ މަހުގެ ދެވަނަ ދުވަހު 3،658 ކޭސް ބިސް ވަނީ ކްލިއާކޮށްފައެވެ.
މިދިޔަ ބުރާސްފަތި ދުވަހު އެންމެ ގިނައިން އެތެރެކޮށް، ކްލިއާކޮށްފައިވާ ޕެރިޝަބަލް މުދަލުގެ އަދަދު:
3،658 ޕެކޭޖް ބިސް
2،165 ޕެކޭޖް ފިޔާ
1،224 ޕެކޭޖް ޓޮމާޓޯ
926 ޕެކޭޖް އަލުވި
792 ޕެކޭޖް އަލަނާސި
600 ޕެކޭޖް ކަރާ
556 ޕެކޭޖް ކެބެޖް
224 ޕެކޭޖް ދޮންކެޔޮ
170 ޕެކޭޖް މެލަން
122 ޕެކޭޖް ބަރަބޯ
ކޮންމެ އަހަރެއްގެ ރަމަޟާން މަހާ ދިމާކޮށް އެތެރެކޮށްފައިވާ ކާބޯތަކެތީގެ ބާވަތްތައް ވީހާވެސް އަވަހަށް ވިޔަފާރިވެރިންނަށް ކްލިއަރކުރެވޭނެ މަގު ފަހިކޮށްދިނުމަށް އެމްޕީއެލްގެ އޮޕަރޭޝަންސް ޓީމުތަކުން އަންނަނީ ކެނޑިނޭޅި ބުރަ މަސައްކަތްތަކެއް ކުރަމުންނެވެ.
އެގޮތުން، އަވަހަށް ހަލާކުވާ ޒާތުގެ ކާބޯތަކެތީގެ ބާވަތްތައް ކުރިއަށް އޮތް ރަމަޟާން މަހުގެ ތެރޭގައި ވީހާވެސް އަވަހަށް ވިޔަފާރިވެރިންނަށް ކްލިއަރކުރެވޭނެ މަގު ފަހިކޮށްދިނުމުގެ ގޮތުން، 3،000 އަކަފޫޓުގެ ހިޔާ ކުރެވިފައިވާ ޝެޑެއް ވަނީ މިހާރު ހަދައިފައެވެ. އެމްޕީއެލް އިން ބުނީ، މި ޝެޑް ހެދުމުން، އަވަހަށް ހަލާކުވާ ޒާތުގެ ކާބޯތަކެތި އަވަހަށް ބާލައި، ބެހެއްޓުމަށް އިތުރު ޖާގައެއް ލިބި، މިފަދަ ހަލުވި ކަމާއެކު ކްލިއަރކުރުމަށް މަގުފަހިވެގެންދާނެ ކަމަށެވެ.