އިންޑިޔާގެ ކޮލްކަތާގެ ކުޑަކުއްޖެއްގެ ނޭވައިހޮޅިން މޮހޮރެއް ނަގައިފިއެވެ. މި މޮހޮރުގެ ދިގު މިނުގައި 7 ސެންޓިމީޓަރު ހުއްޓެވެ. މި މޮހޮރަކީ ދަބަރުވެސް ޖަހާފައިވާ މޮހޮރެއްކަމަށް ރިޕޯޓުތަކުން ބުނެއެވެ.
މުސްތަކިން އަލީ ނަމަކަށް ކިޔާ މި ކުއްޖާގެ އުމުރަކީ އެންމެ ދެ އަހަރެވެ. އެކުއްޖާގެ ބެލެނިވެރިންނާއި ހަވާލާދީ ރިޕޯޓުތައް ބުނާގޮތުގައި އެ ކުއްޖާ އުޅުނީ ގެވަޅު ތެރޭގައި ކުޅެން ކަމަށާއި، އޭނާ އާއި އެއްފުރާގެ އެހެންކުދިންތަކެއްވެސް އޭނާ އާއި އެކު ކުޅެން އުޅުނުކަމަށެވެ. އެއީ އާދައިގެ މަތިން ކޮންމެ ދުވަހަކުވެސް އޭނާ ކުރާކަމަށް ވާތީ އެދުވަހު ވަކި ހާއްސަ ސަމާލުކަމެއް ނުދޭކަމަށް އޭނާގެ ބެލެނިވެރިން ވަނީ ބުނެފައެވެ.
ކޮވިޑުހާލަތު އިންޑިޔާގައި ބޮޑުވެފައިވާ މި ދަނޑިވަޅުގައި އެ ހާދިސާ ހިނގުމުން، ޑަކްޓަރަށް ދައްކަން ވަރަށް އުނދަގޫވި ކަމަށް އެކުއްޖާގެ އާއިލާއިން ބުނެއެވެ. އެކުއްޖާއަށް ފަރުވާ ދީފައިވަނީ އެސް.އެސް.ކޭ.އެމް ހޮސްޕިޓަލުންނެވެ.
އެ ހޮސްޕިޓަލުގައި ހެދި ޓެސްޓުތަކުން، މޮހޮރު ތާށިވެފައި އިންތަން ވަނީ ހޯދާފައެވެ. އެ މޮހޮރު ތާށިވެފައި އިނީ ނޭވައިހޮޅި، ފުއްޕާމެއާއި ގުޅޭ ހިސާބުން ދެކަފިވެފަ އިންނަ ތަނުން ކަނާތް ފަޅީގައެވެ. އެ ހޮސްޕިޓަލުގެ ޑަކްޓަރުންނާއި ހަވާލާދީ ރިޕޯޓުތައް ބުނާގިތުގައި އެ މޮހޮރު އިނީ ބަޅުކޮށް ކަމަށެވެ. އެހެން ކަމުން އެ މޮހޮރު ނެގުމަށް ވަރަށް އުނދަގޫވިއެވެ. ނަމަވެސް އެ މޮހޮރު ނަގާ އޭނާއަށް ވަނީ ފަރުވާ ދީފައެވެ.
މިހާރު އަލީގެ ހާލު ރަނގަޅުކަމަށާއި، ނަމަވެސް އިތުރަށް ބަލަންޖެހޭ ކަންކަން ބަލަމުން ދާކަމަށް ހޮސްޕިޓަލުން ވަނީ ބުނެފައެވެ. ކުޑަކުދިން ކުޅެން އުޅުމުގެ ތެރޭގައި މިފަދަ ހިތާމަވެރި އެތައް ހާދިސާތަކެއް ދުނިޔޭގެ އެކި ކަންކޮޅުތަކުގައި ވަނީ ހިނގާފައެވެ.