ބޮކްސް އޮފީހުގައި ބޮޑު ކާމިޔާބީއެއް ހޯދަމުން އަންނަ ބޮލީވުޑް ފިލްމު ދުރަންދަރް ގެ ސެޓުގައި ހިނގި ވަރަށް އަސަރުގަދަ ކަމެއް ފިލްމުގެ ތަރި އާރް މާދަވަން ހާމަކޮށްފިއެވެ. އަދިތްޔާ ދަރް ޑައިރެކްޓުކޮށް، ރަންވީރު ސިންގް ލީޑު ރޯލުން ފެނިގެންދާ މި ފިލްމުގެ ސެޓުގައި، މަޝްހޫރު ދެ ތަރިން ކަމަށްވާ އަކްޝޭ ކަންނާ އާއި އަރުޖުން ރާމްޕާލް އަށް ވަރަށް ބޮޑަށް ރޮވުނު ކަމަށް މާދަވަން ބުންޏެވެ. އޭނާ ބުނި ގޮތުގައި މި ދެ ތަރިންނަށް ރޮވުނީ ދެހާސް އަށެއްގައި މުމްބާއީއަށް ދިން ނިރުބަވެރި ހަމަލާގެ މަންޒަރެއް ނެގުމަށްފަހުގައެވެ.
ސޯނިއާ ޝެނޯއި އަށް ދިން އިންޓަވިއުއެއްގައި މާދަވަން ބުނީ، އެ މަންޒަރުގައި އަކްޝޭ އާއި އަރުޖުން ކުޅުނީ ހަމަލާއަށް އުފާފާޅުކުރާ ޕާކިސްތާނުގެ ދެ މީހެއްގެ ރޯލު ކަމަށެވެ. އަކްޝޭ ރެހެމާން ޑަކައިތުގެ ރޯލު ކުޅުނުއިރު އަރުޖުން ކުޅުނީ މޭޖާ އިގްބާލްގެ ރޯލެވެ. މަންޒަރު ނަގައި ނިމުމާއެކު ދެ ތަރިންނަށް ބާރަށް ރޮވުނު ކަމަށާއި، އެއީ އެތައް ސަތޭކަ ބައެއްގެ ފުރާނަ ދިޔަ ހިތާމަވެރި ހާދިސާގެ އަސަރު އެ މީހުންނަށް ކުރި ވަރުން ކަމަށް މާދަވަން ކިޔައިދިނެވެ. މިކަމާ ގުޅިގެން ސެޓުގައި ތިބި އެހެން މީހުންނަށް ވެސް ވަރަށް ފުން އަސަރުތަކެއް ކުރިއެވެ.
މި ހާދިސާއާ ގުޅޭގޮތުން ވާހަކަ ދައްކަމުން މާދަވަން ބުނީ، އެއީ ބަލިކަށިކަމެއް ނޫން ކަމަށާއި އެއީ ހަމަލާގައި ގެއްލުންވި މީހުންނަށް ތަރިން ކުރާ އިހުތިރާމް ކަމަށެވެ. "އެ މަންޒަރު ނިމުމާއެކު އެ މީހުންނަށް ވަރަށް ބޮޑަށް ރޮވިއްޖެ. އެ ހިސާބުން އަހަންނަށް އެނގިއްޖެ މިއީ ވަރަށް ހާއްސަ ފިލްމެއްކަން،" މާދަވަން ބުންޏެވެ.
ތާރީހީ ހާދިސާތަކެއްގެ މައްޗަށް ބިނާކޮށް ހަދާފައިވާ މި ފިލްމަށް އާންމުންގެ ބޮޑު ތަރުހީބެއް ލިބެމުން އަންނައިރު، ފިލްމުގައި ދައްކުވައިދޭ އަސަރުގަދަ މަންޒަރުތަކަށް ގިނަ ބަޔަކު އަންނަނީ ތައުރީފު ކުރަމުންނެވެ.