މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ފޯރުކޮށްދެމުން އަންނަ ސީ ޓު އެއާ ކާގޯގެ ހިދުމަތް މެދުވެރިކޮށް، ނިމިދިޔަ ޖެނުއަރީ މަހުގެ ތެރޭގައި އެކަނިވެސް ސާދަ ސަތޭކަ ނުވަ ޓަނަށް ވުރެ ގިނަ މުދާ ރާއްޖެއިން ބޭރަށް ފޮނުވައިފިއެވެ. އެ ކުންފުނިން ބުނި ގޮތުގައި މި މުދާ ވަނީ ދުނިޔޭގެ ސައްބީސް ގައުމަކަށް ފޮނުވާފައެވެ.
މިއީ އޭގެ ކުރީ މަހާ އަޅާބަލާއިރު ވަރަށް ބޮޑު ކުރިއެރުމެކެވެ. އެގޮތުން މިދިޔަ އަހަރުގެ ޑިސެމްބަރު މަހު ފަސް އެއާލައިނެއް މެދުވެރިކޮށް ސައްބީސް ގައުމަކަށް ފޮނުވާފައިވަނީ ސަތޭކަ ސާޅީސް ޓަނަށް ވުރެ ގިނަ މުދަލެވެ. އެހެންކަމުން ޖެނުއަރީ މަހު އުފުލި މުދަލުގެ ނިސްބަތް ވަނީ އެތައް ގުނައެއް އިތުރުވެފައެވެ.
ކަނޑުމަގުންނާއި ވައިގެ މަގުން މުދާ އުފުލުން ގުޅުވާލައިގެން ދޭ މި ހާއްސަ ހިދުމަތް އެމްޕީއެލް އިން ރާއްޖޭގައި ފަށާފައިވަނީ ދެހާސް ސައުވީސް ވަނަ އަހަރުގެ މެއި މަހުގެ ފަނަރަ ވަނަ ދުވަހުއެވެ. މި ހިދުމަތަށް ލިބެމުން އަންނަ ބޮޑު ކުރިއެރުމަކީ އިންޓަނޭޝަނަލް ވިޔަފާރީގެ މައިދާނުގައި ރާއްޖޭގެ ދައުރު ފުޅާވަމުން އަންނަ ކަމުގެ އަލިގަދަ ހެއްކެއް ކަމަށް އެ ކުންފުނިން ބުންޏެވެ. އަދި މީގެ ސަބަބުން ރާއްޖޭގެ އިގުތިސާދަށް އޭގެ އެދެވޭ ފައިދާތައް އަންނަނީ ކުރަމުންނެވެ.
މުދާ އުފުލާ މިންވަރު މިހާ ބޮޑަށް އިތުރުވެގެން ގޮސްފައިވަނީ ވެލާނާ އިންޓަނޭޝަނަލް އެއާޕޯޓުގައި އަލަށް ތަރައްގީކޮށް ހުޅުވި ކާގޯ ޓާމިނަލްގެ ސަބަބުންނެވެ. މިދިޔަ އަހަރުގެ ކުރީކޮޅު ބޭނުންކުރަން ފެށި މި ޓާމިނަލަކީ އަހަރަކު އެއް ލައްކަ ވިހި ހާސް ޓަނުގެ މުދާ ބެލެހެއްޓުމުގެ ގާބިލުކަން ލިބިފައިވާ ތަނެކެވެ. މި ޓާމިނަލް ހުޅުވި ފަހުން ރާއްޖެއިން ބޭރުކުރާ އަދި އެތެރެކުރާ މުދަލުގެ ނިސްބަތް ވަނީ ވަރަށް ބޮޑަށް އިތުރުވެފައެވެ.