ޗެމްޕިއަންސްލީގުގައި މިދިޔަ ހަފްތާގައި ރެއާލް މެޑްރިޑާއި ބެންފީކާ ކުޅުނު މެޗުގައި ރެއާލްގެ ވިނިޝިއަސް ޖޫނިއަރ އަށް ނަސްލީގޮތުން ދިމާކޮށްލި ބެންފީކާގެ ޖިއަންލޫކާ ޕްރެސްޓިއަންނިއަށް ވަގުތީ ގޮތުން އެއްމެޗަށް ސަސްޕެންޑް ކޮށްފިއެވެ.
އެ މެޗުގައި ހިނގާދިޔަ ކަންކަން ބެލުމުގެ ކަންކަން މުޅިން ނުނިމޭތީ، ވަގުތީ ގޮތުން ޔޫއެފާއިން ނިންމީ އެއް މެޗަށް ޕްރެސްޓިއަންނި ސަސްޕެންޑް ކުރާށެވެ. އެހެންކަމުން ބުދަ ދުވަހު ރެއާލް ދަނޑުގައި ކުޅުމަށް ހަމަޖެހިފައިވާ ދެވަނަ ލެގުގައި ޕްރެސްޓިއަންނިއަށް ނުކުޅެވޭނެއެވެ.
މިގޮތަށް ނިންމުމަށްފަހު ޔުއެފާއިން އިތުރަށް ހާމަކޮށްފައިވާ ގޮތުގައި، މައްސަލަ އިތުރަށް ބެލުމަށްފަހު އިތުރު އަދަބެއް އައުމަކީ އެކަށީގެންވާކަމެއްކަމަށެވެ. ކުރިން ބެލެވިފައި އޮތްގޮތުން އެންމެ މަދުވެގެން 10 މެޗުގެ ސަސްޕެންސަނެއް އެ ކުޅުންތެރިޔާއަށް އަންނާނެއެވެ.
ރެއާލްއާ ބެންފީކާ ބައްދަލުކުރި މެޗުގައި ޕްރެސްޓިއަންނި ވިނިޝިއަސްއާ ނަސްލީ ގޮތުން ދިމާކުރުމުގެ ގޮތުން އެއްޗެއް ބުނިކަމަށްބުނެ ރެފްރީ ގާތު ވިނިޝިއަސް މައްސަލަ ޖެއްސުމުގެ ސަބަބުން މެޗު 10 ވަރަކަށް މިނެޓަށް މެދު ކަނޑާލަން ޖެހުނެވެ. އަދި ރެއާލް ކުޅުންތެރިންނާ އޮފިޝަލުން ދަނޑުން ފޭބިއެވެ. ނަމަވެސް މެޗަށްފަހު ޕްރެސްޓިއަންނިވެސް އަދި އެޓީމުގެ ކޯޗު ހޯޒޭ މޮރީނިއޯވެސްވަނީ ވިނިޝިއަސްގެ އެ ތުހުމަތުތައް ދޮގުކޮށްފައެވެ.
ނަސްލީ ގޮތުން ބުލީކުރުމުގެ ވަރަށް ގިނަ މައްސަލަތައް މިފަހަކަށް އައިސް ވިނީއަށްވަނީ ދިމާވެފައެވެ. ޔުއެފާއިންވެސް އަދި ފީފާއިންވެސް އަންގާ ގޮތުގައި އެފަދަ ދިމާކުރުންތަކަކަށް އެއްވެސް ވަރަކަށް ޖާގައެއް ނުދެވޭނެއެވެ. އަދި އެ ޢަމަލު ހިންގާ ފަރާތްތަކަށް ހަރުކަށި އަދަބު ދެވޭނެކަމަށް އެ އިދާރާތަކުން އަބަދުވެސް ބުނަމުންދެއެވެ.