އިނގިރޭސި ޕްރިމިއަރލީގުގައި ޓޮޓެންހަމް ހޮސްޕަރ ވާދަކުރަން ފެށީންސުރެ އެންމެ ދަށް އެއް ސީޒަނަށް މި ސީޒަންވާނެއެވެ. ފަހަކަށް އައިސް ޓީމު ނެރެމުންދާ ދަށް ނަތީޖާތަކާއެކު، ޚާއްސަކޮށް އެންމެފަހުން ނޯތު ލަންޑަން ޑާބީ މެޗުން ވާދަވެރި އާސެނަލް ކައިރިން ހިތްދަތިގޮތަކަށް ވީ ބައްޔާއެކު ޓޮޓެންހަމް ރެލިގޭޓުވެދާނެކަމުގެ އަޑުތައް މިވަނީ ގަދަވެފައެވެ. އެހެން އެގޮތަށް ވެއްޖެނަމަ، ވެގެންދާނީ ކުލަބުގެ ތާރީޚުގައިވެސް ޕްރިމިއަރ ލީގުން ރެލިގޭޓުވާ ފުރަތަމަ ފަހަރަށެވެ.
ޗެމްޕިއަންސްލީގުގެ ރަނގަޅު ހިސާބެއްގައި ޓީމު އޮތަސް، އެޓީމު ޕްރިމިއަރ ލީގުގައި އެންމެފަހުން ކުޅުނު 9 މެޗުން އެއްވެސް ޕޮއިންޓެއް ނުލިބުމަކީ ޓީމަށް މިހާރު ދިމާވެފައިވާ އެންމެ ބޮޑު އެއް މައްސަލައެވެ. ލީގުގައި ބާކީ އޮތީ 11 މެޗެވެ. އެ މެޗުތަކަށް ބަލާއިރު ގިނައީ ލީގުގައި މިވަގުތު ރަނގަޅު ފޯމެއްގައި ކުޅެމުން އަންނަ ޓީމުތަކެވެ. ފުލަމް، ކްރިސްޓަލް ޕެލަސް، ލިވަޕޫލް، ނޮޓިންހަމް ފޮރެސްޓް، ސަންޑަލޭންޑް، ބްރައިޓަން، ވުލްވްސް، އެޝްޓަންވިލާ، ލީޑްސް، ޗެލްސީ އަދި އެވަޓަންގެ މެޗުތައް ބާކީ ހުރިއިރު، މީގެ ތެރެއިން ޓޮޓެންހަމްއަށް ހޯދޭނީ ކިތައް ޕޮއިންޓުތޯ އެއީ ހަމަ ކުރެވޭ ސުވާލެކެވެ. ސަބަބަކީ ރަނގަޅަށް ޓީމު ކުޅެފައިވެސް ފަހަކަށް އައިސް ނަތީޖާ ނުނެރެވޭތީއެވެ.
ޓީމުގެ ހާލަތާމެދު މިހާރުގެ ކޯޗު އިގަ ޓޫޑޯ ސްކައި ސްޕޯޓްސްއަށް ބުނެފައިވާ ގޮތުގައި، ޓީމަކީ ބަލި ޓީމެއް ނޫންކަމަށާއި، އެހެންނަމަވެސް ޓީމުގައި ގޯސް ވަރަށް ގިނަ ކަންކަން މާޒީގައި ވެފައި އެބަ ހުރިކަމަށާއި، ކުޅުންތެރިންގެ ތޫނުފިލިކަން މެޗު ފެށިގެން ނިމެންދެން ހުންނަން ޖެހޭކަމަށެވެ.
ޓޮޓެންހަމްގެ ކުރީގެ ކެޕްޓަން އަދި ސްކައި ސްޕޯޓްސްގެ ކުޅިވަރު މާހިރެއްގެ ގޮތުގައި މިހާރު މަސައްކަތްކުރަމުން އަންނަ ހެރީ ރެޑްނެޕް ބުނީ ޓީމަކީ ވަކިވަކި ކުޅުންތެރިންގެ ޓީމެއްކަމަށާއި ޓީމެއްގެ ގޮތުގައި ނުފެންނަކަމަށެވެ. އަދި މިހާރުން ފެށިގެންވެސް އިތުރަށް ސަމާލު ނުވެއްޖެނަމަ، އެހެން ލީގެއްގައި އެޓީމު ކުޅުން މާ ދުރު ނޫންކަމަށްވެސް ބުނެފައިވެއެވެ.
މެންޗެސްޓަރ ޔުނައިޓެޑުގެ ކުރީގެ ކެޕްޓަން އަދި ސްކައިސްޕޯޓްސްގައި މަސައްކަތް ކުރަމުން އަންނަ ގެރީ ނެވިލް ބުނެފައިވާ ގޮތުގައި ޓޮޓެންހަމް އަސްލު ފެންވަރު ނުފެނި ސީޒަންތަކެއް ހިނގައްޖެކަމަށާއި، މިހާ ދަށްކޮށް ޓީމު ކުޅޭ މިއީ ދެވަނަ ސީޒަންކަމަށެވެ. އަދި އެޓީމު ރެލިގޭޓު ވެދާނެކަމަށް އޭނާ ގަބޫލު ނުކުރާކަމަށާއި، އެހެން ލީގެއްގައި އެޓީމު ކުޅެން ޖެހިދާނެކަމަށް ވިސްނުމަކީވެސް އާދަޔާ ޚިލާފުކަމެއްކަމުގައެވެ.
ގެރީ ނެވިލްގެ މި ވިސްނުމާ އޮޕްޓާގެ ސްޕަ ކޮމްޕިއުޓަރުގެ ހިސާބުވެސް ދާދި އެއްގޮތެވެ. ސްޕަ ކޮމްޕިއުޓަރ އެނަލައިޒް ކުރާ ގޮތުގައި ޓޮޓެންހަމް ރެލިގޭޓުވުމުގެ އޮތީ 4.4 އިންސައްތަ ފުރުޞަތެކެވެ.
މިވަގުތު ޓޮޓެންހަމް އޮތީ ތާވަލުގެ 16 ވަނާގައެވެ. އެއީ ރެލިގޭޝަނާ ހަނގުރާމަ ކުރަމުން އަންނަ ވެސްޓްހަމްއަށްވުރެ 4 ޕޮއިންޓަށްވުރެ އިތުރަށް ލިބިގެންނެވެ.