މެންޗެސްޓަރ ޔުނައިޓެޑަށް ކުޅެމުން އަންނަ އާޖެންޓީނާ ޑިފެންޑަރ ލިސަންޑްރޯ މާޓިނޭޒަށް އަނިޔާވެ، ދެހަފްތާއަށް ކުޅުމާ ދުރަށް ދާން ޖެހިއްޖެއެވެ.
މިރޭ އެވަޓަންއާ ދެކޮޅަށް ނުކުންނަން ވަގުތު ކުޑަތަންވެފައިވަނިކޮށް ޓީމު ލިސްޓަށް ގެނައި ބަދަލު އާންމުކުރިއިރު މާޓިނޭޒު ސްކޮޑުގައިވެސް ހިމަނާފައެއްނުވެއެވެ. މިކަން މެންޗެސްޓަރ ޔުނައިޓެޑުންވެސްވަނީ މީސްމީޑިއާގައި ކަށަވަރުކޮށްދީފައެވެ. ޔުނައިޓެޑުގެ ރަސްމީ ފޭސްބުކް ޕޭޖުން ޖެހި ޕޯސްޓެއްގައިވާ ގޮތުން މާޓިނޭޒުގެ ފައިގެ މަސްގަނޑަށް ލިބުނު އަނިޔާއަކާ ގުޅިގެން މިރޭ މެޗުގައި އޭނާ ހިމަނާފައެއްނުވެއެވެ. ގޯލް.ކޮމްގައިވާ ގޮތުން އޭނާއަށް ލިބުނު އަނިޔާއިން ރަނގަޅުވުމަށް ދެހަފްތާއެއްހާ ދުވަސް ނަގާނެކަމަށް ބެލެވެއެވެ.
ގަދަ ހަތަރަކަށް އެރުމަށް މުހިންމު މެޗަކަށް ޔުނައިޓެޑު ނުކުންނައިރު، މާޓިނޭޒްގެ ބަދަލުގައި ޓީމުގައި ހިމަނާފައިވަނީ ޒުވާން ޑިފެންޑަރ ލެނީ ޔޯރޯއެވެ.
މާޓިނޭޒު ނެތި ޔުނައިޓެޑު މިރޭގެ މެޗާއެކު އަންނަ އާދިއްތަ ދުވަހު ކްރިސްޓަލް ޕެލަސްއާ ދެކޮޅަށް ކުޅޭ މެޗުވެސް ކުޅެން ޖެހުމަކީ މި ދަނޑިވަޅުގައި އެޓީމަށް ލިބިގެންދާނެ ބޮޑު ގެއްލުމެކެވެ.