މި ހިނގާ ފެބްރުއަރީ މަހުގެ ފުރަތަމަ ބާވީސް ދުވަހުގެ ތެރޭގައި ރާއްޖެއަށް ދެ ލައްކައަށްވުރެ ގިނަ ޓޫރިސްޓުން ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީން ބުނެފިއެވެ.
އެ މިނިސްޓްރީގެ ތަފާސްހިސާބުތައް ދައްކާގޮތުން، މި މަހުގެ ބާވީސް ވަނަ ދުވަހުގެ ނިޔަލަށް ދެލައްކަ ނުވަސަތޭކަ ހަތްދިހަ އެކެއް ޓޫރިސްޓުން ރާއްޖެ އައިސްފައިވެއެވެ. މިއީ މިދިޔަ އަހަރުގެ އެ މުއްދަތުގައި ރާއްޖެއަށް ޒިޔާރަތްކުރި އެއްލައްކަ ހަތްދިހަ ހަތަރު ހާސް ތިންސަތޭކަ ފަސްދޮޅަސް ޓޫރިސްޓުންނާ އަޅާބަލާއިރު ބޮޑު ކުރިއެރުމެކެވެ. އަހަރުގެ މިހާތަނަށް ޖުމްލަ ހަތަރުލައްކަ އަށާވީސް ހާސް އެއްސަތޭކަ ފަސްދޮޅަސް ނުވަ ޓޫރިސްޓުން ރާއްޖެ އައިސްފައިވާއިރު، މީގެ ތެރޭގައި ކްރޫޒް ލައިނާގައި އައި އެއްހާސް ފަސްދޮޅަސް ފަސް ފަސިންޖަރުންވެސް ހިމެނެއެވެ.
ރާއްޖެއަށް މިހާރު އެންމެ ގިނައިން ޓޫރިސްޓުން އަންނަ ގައުމަކީ ޗައިނާއެވެ. އެ ގައުމުން މިހާތަނަށް ފަސްދޮޅަސް ނުވަ ހާސް ހަ ޓޫރިސްޓުން އައިސްފައިވާއިރު، ދެވަނައިގައި އޮތް ރަޝިޔާއިން ސާޅީސް ހަތް ހާސް ނުވަސަތޭކަ ނުވަދިހަ ހަތަރު ޓޫރިސްޓުން އަދި ތިންވަނައިގައި އޮތް އިޓަލީން ސާޅީސް އެއް ހާސް ހަތްސަތޭކަ ހަތްދިހަ ފަސް ޓޫރިސްޓުން ޒިޔާރަތްކޮށްފައިވެއެވެ.
ޓޫރިސްޓުން ރާއްޖެއަށް އެތެރެވާ އެއާޕޯޓުތަކަށް ބަލާއިރު، އެންމެ ގިނަ މީހުން އައިސްފައިވަނީ ވެލާނާ އިންޓަނޭޝަނަލް އެއާޕޯޓުންނެވެ. އެ އެއާޕޯޓުން ހަތަރުލައްކަ ހަތާވީސް ހާސް އެއްސަތޭކަ ހަތަރު ޓޫރިސްޓުން އެތެރެވެފައިވާއިރު، މާފަރު އިންޓަނޭޝަނަލް އެއާޕޯޓާއި ގަން އިންޓަނޭޝަނަލް އެއާޕޯޓުން ކޮންމެ އެއާޕޯޓަކުން އެއްހާސް ފަސްސަތޭކަ ސާޅީސް ހަތަރު ޓޫރިސްޓުން އެތެރެވެފައިވެއެވެ.
މިވަގުތު ރާއްޖޭގައި ޓޫރިސްޓުންނަށް ހިދުމަތް ދިނުމަށް ސަތޭކަ އަށްޑިހަ ރިސޯޓާއި، ނުވަސަތޭކަ ސޯޅަ ގެސްޓްހައުސްގެ އިތުރުން ސަތޭކަ ހަތްދިހަ ސަފާރީ އާއި ސޯޅަ ހޮޓެލް ދަނީ އޮޕަރޭޓް ކުރަމުންނެވެ.