އިނގިރޭސި ޕްރިމިއަރލީގުގައި ރޭ މެންޗެސްޓަރ ޔުނައިޓެޑާއި އެވަޓަން ބައްދަލުކުރި މެޗު 1-0 އިން މެންޗެސްޓަރ ޔުނައިޓެޑު ކާމިޔާބު ކޮށްފިއެވެ.
މާއެދެވޭ ތަފާތު ކުޅުމެއް ދެޓީމުންކުރެ ޓީމަކުންވެސް ނުދެއްކުނު މިމެޗުގައި ޔުނައިޓެޑުން ޖެހި ހަމައެކަނި ލަނޑު ޖަހައިދިނީ އެޓީމުގެ ސްލޮވީނިއާ ފޯވާޑު ބެންޖަމިން ސެސްކޯއެވެ. އެވަޓަންގެ ހިލްޑިކިންސަން ސްޓޭޑިއަމްގައި ކުޅެވުނު މިމެޗުގައި، ސެސޯ ކުޅެން ނެރުނީ މެޗުގެ 58 ވަނަ މިނެޓުގައެވެ. އޭނާ ލަނޑުޖަހާފައިވަނީ ޔުނައިޓެޑުގެ ޕެނަލްޓީ އޭރީއާ ކައިރިން ކުންޔާއަށް ލިބުނު ބޯޅައެއް ކަނާތު އަރިމަތީގައި ހުރި އެމްބޫމާއަށް ދިނުމުން ހުސްކޮށްލާފައި އެވަޓަން ޕެނަލްޓީއޭރިއާ ތެރެއަށް ޖައްސާލި ޕާސް ހަމަޖެހިލާފައި ގޯލު ތެރެއަށް ފޮނުވާލައިގެންނެވެ.
މިއީ ކައިރިކައިރީގައި ސެސްކޯ ބެންޗުން ކުޅެން އެރި ހަވަނަ މެޗެވެ. ނަމަވެސް ބެންޗުން އަރައި އޭގެ ތެރެއިން 3 މެޗެއްގެ ނަތީޖާ ބަދަލު ކޮށްލުމުގެ މުހިންމު ދައުރެއްވަނީ އަދާކޮށްފައެވެ.
މި ނަތީޖާއާއެކު، ޔުނައިޓެޑުވަނީ ހަތަރުވަނައަށް އަނެއްކާވެސް ޖެހިލާފައެވެ. އެއީ ފަހަތުން ވިއްދާފައި އޮތް ޗެލްސީއާއި ލިވަޕޫލަށްވުރެ އިތުރަށް 3 ޕޮއިންޓް ހޯދައިގެންނެވެ. އެހެންކަމުން ރޭގެ މޮޅަކީ ލީގުގެ ގަދަ ހަތަރަކަށް އަރައި ޗެމްޕިއަންސްލީގަށް ކޮލިފައިވުމަށް ކުރާ މަސައްކަތަށް ވަރަށް މުހިންމު ތިން ޕޮއިންޓެވެ.