މޭޖާ ލީގު ސޮކާގައި ވާދަކުރާ އޮރްލޭންޑޯ ސިޓީއިން ފްރާންސް އަދި އެޓްލެޓިކޯ މެޑްރިޑްގެ އެޓޭކިން މިޑްފީލްޑަރ އެންޓޯނިއޯ ގްރިޒްމަން ހޯދުމުގެ މަސައްކަތް ފަށައިފިއެވެ.
މިވަގުތު އެޓްލެޓިކޯގައި ރަނގަޅު ކުޅުމެއް ދައްކަމުން އަންނަ ގްރިޒްމަންގެ އޮރްލޭންޑޯއަށް ގެންދަން އުޅޭކަމަށް ދި އެތުލެޓިކް ނޫހާ ހަވާލާދީ ގޯލް.ކޮމްގައި ލިޔެފައިވެއެވެ. ކުރިންވެސް މޭޖާ ލީގު ސޮކާއަށް ދިޔުމަށް ޝައުގުވެރިކަން ފާޅުކޮށްފައިވާ ގްރިޒްމަން ހޯދުމަށް ކުރަންޖެހޭ މަސައްކަތްތައް އޮރްލޭންޑޯ ސިޓީއިން މި ޓްރާންސްފަރ ބާޒާރު ނިމުމުގެ ކުރިން ނިންމުމަށް ދަނީ މަސައްކަތް ކުރަމުންނެވެ. ޓްރާންސްފަރގެ މުއްދަތު ހަމަވާނީ 26 މާރިޗު 2026 ގައެވެ.
ފްރާންސް ގައުމީ ޓީމުގެ ކުރީގެ ކެޕްޓަން ގްރިޒްމަން މި ސީޒަނުގައި މިހާތަނަށް ޖަހާފައިވަނީ 6 ގޯލެވެ. ކެރިއަރ ނިމުމަކާ ދިމާލަށް މިސްރާބު ޖަހާފައިވާ ގްރިޒްމަންއާއެކު އެޓްލެޓިކޯ ލީގުގައިވެސް ރަނގަޅު ވާދައެއް ކުރަމުން އަންނައިރު، ކޮޕަ ޑެލްރޭ ފައިނަލަށް ދިޔުމުގެ އުއްމީދުވެސް ވަނީ ބޮޑު ކޮށްފައެވެ.
އުމުރުން 34 އަހަރުގެ ގްރިޒްމަންގެ ސޮއި ހޯދުމަށް މެސީގެ އިންޓަރ މިއާމީއިންވެސް ބޭނުންވާކަމަށް ރިޕޯޓުތައް ބުނެއެވެ. ނަމަވެސް، މިރޭހުގެ ކުރީގައި މިވަގުތު އުޅެނީ އޮރްލޭންޑޯ ސިޓީއެވެ. އެޓީމުގެ ސްޕޯޓިންގ ޑިރެކްޓަރ ރިކާޑޯ ޕެރެއިރާ މިފަހުންވަނީ ސްޕެއިންނަށް ގިނަ ދަތުރުތަކެއް ކޮށްފައެވެ. ބޭނުމަކީ ގްރިޒްމަން އެޓީމަށް ގެނައުމަށް ވާންޖެހޭ ތައްޔާރީތައްވުމާއި އެއްބަސްވުމަކަށް އައުމަށްކަމަށް ރިޕޯޓުތައް ބުނެއެވެ.