މިހާރު ކުރިޔަށްދާ ޕްރެޒިޑެންޓްސްކަޕްގެ ފައިނަލުގައި މިރޭ މާޒިޔާ ސްޕޯޓްސް އެންޑް ރެކްރިއޭޝަން ކުލަބާއި އޮޑި ސްޕޯޓްސް ކުލަބު ނުކުންނާނެއެވެ.
ފައިނަލު މެޗު ކުޅެވޭނީ މިރޭ 10 ޖަހާއިރު ގަލޮޅު ދަނޑުގައެވެ.
މުބާރާތުގެ ފައިނަލަށް މާޒިޔާ ސްޕޯޓްސް ކުލަބު ދަތުރުކުރީ ސެމީ ފައިނަލުގައި ވާދަވެރި ނިއުރޭޑިއަންޓް ސްޕޯޓްސް ކުލަބު ބަލިކޮށްގެންނެވެ. އެމެޗުގެ ފުރިހަމަ ވަގުތު ހަމަވިއިރު 2-2 އިން އެއްވަރުވެފައި އޮތުމުން ނަތީޖާ ނެރުނީ ޕެނަލްޓީ ޖަހައިގެންނެވެ. ޕެނަލްޓީއިން މާޒިޔާ މެޗު ކާމިޔާބުކުރީ 5-6 ގެ ނަތީޖާއަކުންނެވެ.
އޮޑި ސްޕޯޓްސް ކުލަބު ފައިނަލަށް ދަތުރުކުރީ ސެމީ ފައިނަލުގައި ބުރު ސްޕޯޓްސްގެ މައްޗަށް ކުރި ހޯދައިގެންނެވެ. އެ މެޗު އޮޑި ކާމިޔާބުކުރީ 2-0 ގެ ނަތީޖާއިންނެވެ.
މިއީ އޮޑި ސްޕޯޓްސް ކުލަބުގެ ތާރީޚުގައިވެސް ފުރަތަމަ ޑިވިޒަނުގައި ކުޅޭ ފުރަތަމަ އަހަރެވެ. މިއަހަރު އެޓީމުން އަންނަނީ ރަނގަޅު ކުޅުމެއް ދައްކަމުންނެވެ. އެގޮތުން އެފްއޭއެމް ލީގު ކަޕުގެ ފައިނަލުގައި ވާދަކުރިއިރު އެފަހަރުވެސް ހުރަހަކަށްވީ މާޒިޔާއެވެ. ދިރާގު ދިވެހިލީގުގައިވެސް އޮޑި ދެވަނަ އަށް ނިންމާލަން ޖެހުނުއިރު ލީގު ހޯދީ މާޒިޔާއެވެ. އެހެންކަމުން މިރޭގެ ކުރިމަތިލުން ވެގެންދާނީ މާޒިޔާ މައްޗަށް ކުރި ހޯދުމަށް އޮޑި ކުރަމުން އަންނަ މަސައްކަތަށް އިތުރު ބޮޅަކަށެވެ.
ޕްރެޒިޑެންޓްސްކަޕަކީ ދިވެހި ފުޓްބޯޅައިގެ އެންމެ ޝަރަފުވެރި އަދި އެންމެ ގިނަ ދުވަސްވީ މުބާރާތެވެ. އަދި މިއީ ދިވެހި ފުޓްބޯޅަ ކަލަންޑަރުގައި ހިމެނޭ އެންމެ ފަހު މުބާރާތްވެސްމެއެވެ.