ކުޅުންތެރިން ގެންގުޅުމުގައި އެކި ކޯޗުން ގެންގުޅެނީ އެކި އުކުޅުތަކެވެ. ޓީމުތަކުގައި ޕްރެކްޓިސްތަކަށާއި އެހެނިހެން އިވެންޓްތަކަށް ކުޅުންތެރިން ހާޟިރުނުވާ މައްސަލައަކީ އަބަދުވެސް ބޮޑު މައްސަލައެކެވެ. ކޯޗުންނާއި ޓީމުގެ މެނޭޖުމަންޓުން އަބަދުވެސް އެންމެ ބޮޑު ބޮލުގެ ރިހުމަކަށްވެފައިވާ މައްސަލައެވެ. މިކަމުގައި ސްޕެއިންގެ ގަދަބާރު ބާސެލޯނާއިން މިހާރުގެ ކޯޗު ހަންސީ ފްލިކް އަމަލުކުރާގޮތް އެޓީމުގެ ޒުވާން ދެ ކުޅުންތެރިންކަމަށްވާ ފެރަން ޓޯރޭސްއާއި ޕެޑްރީވަނީ މީޑިއާއަށް ތިލަކޮށްފައެވެ.
ސްޕެއިންގެ މަޝްހޫރު ޓީވީ ޝޯއެއްކަމަށްވާ އެލް ހޯމިގޭރާގައި އެ ދެކުޅުންތެރިން ހާމަކުރި ގޮތުގައި، ބާސެލޯނާ ކުޅުންތެރިއަކު ގަޑިއަށް ހާޟިރުނުވެވި 10 މިނެޓު ވެއްޖެނަމަ، ސާޅީސްހާސް ޔޫރޯއިން ޖޫރިމަނާކުރާކަމަށްވެއެވެ. ޕެޑްރީ ބުނިގޮތުގައި ކުޅުންތެރިއަކު ލަސްވެއްޖެނަމަ، މޫނަކަށް ކަނދުރާއަކަށް އަދި ބޮޑު ކުޑަމިނަށް ނުބަލާ އެ ކުޅުންތެރިއަކު ޖޫރިމަނާ ކުރާކަމަށެވެ. އެއީ ޒިންމާދާރުކަމާއެކު އެޓީމުގެ ކޯޗު އަމަލުކުރަމުން އަންނަ ކަމެއްކަމަށެވެ. މިވާހަކައަށް ފެރަން ޓޯރޭސް ބާރުދެމުން ބުނެފައިވަނީ މެޗު ކުޅޭ ދުވަހު ދިހަ މިނެޓަށް ލަސްވެއްޖެނަމަ ސާޅީސްހާސް ޖޫރިމަނާ ކުރާނެކަމަށާއި ވިހި މިނެޓަށް ލަސްވެއްޖެނަމަ ޖޫރިމަނާ ކުރާނެ އަދަދެއްވެސް ނޭނގޭ ކަމަށެވެ.
ހަންސި ފްލިކަކީ މިފަދަ ވަރަށް ގިނަ އުކުޅުތައް މީގެ ކުރިންވެސް ބޭނުންކޮށްފައިވާ ކޯޗެކެވެ. މީގެ ކުރިން ހޫލްސް ކުންޑޭ މެޗުގެ ކުރިން އޮންނަ ބައްދަލުވުމަށް ލަހުން ހާޟިރުވެގެން ތިން ފަހަރެއްގެ މަތިން ބެންޗަށް ބަދަލުކުރިއެވެ. ނަމަވެސް، އެކަހަލަ އަދަބެއް ދިނުމަށްވުރެ ކުޅުންތެރިންނަށް މާލީގޮތުން އަސަރެއް އަންނާނެ އަދަބެއް ދިނުމުން ހެޔޮ ބަދަލެއް އަންނަކަމަށް ފްލިކަށް ގަބޫލުކުރެވި ޖޫރިމަނާ ކުރަން ފެށީއެވެ.
ކުޅުންތެރިންނަށް އަޅާ މިފަދަ ފިޔަވަޅުތަކާ ބެހޭ ގޮތުން ވާހަކަ ދައްކަމުން މިފަހުން ހަންސި ފްލިކް ބުނެފައިވަނީ ގަޑިއަށް ހާޟިރުނުވުމަކީ އެހެން މީހުންނަށް އިހްތިރާމް ނުކުރުމުގެ އަމަލެއްކަމަށެވެ. އެއީ އޭނާއަށް އިހްތިރާމް ނުކުރުން އެކަންޏެއް ނޫންކަމަށާއި އެކަމުން އަންގައިދެނީ އެހެން ކުޅުންތެރިންނަށާއި ކުލަބަށާއި ކުލަބުގެ ސަޕޯޓަރުންނަށް އެއްވެސް އިހްތިރާމެއް ނުކުރާކަން ކަމަށެވެ. ގަޑިއަށް ހާޟިރުވުމަކީ އުނދަގޫކަމެއް ނޫންކަމަށާއި އެ އާދަ ކުޅުންތެރިންގެ ކިބައިގައި ހުންނަން ޖެހޭނެކަމަށްވެސް ކޯޗު ފާހަގަކޮށްފައިވެއެވެ.