ބާސެލޯނާގެ އެންމެ މުހިންމު އެއް ކުޅުންތެރިޔާ ލަމީން ޔަމާލް ހޯދުމަށް ފްރާންސްގެ ޕީއެސްޖީ 250 މިލިއަން ޔޫރޯ ހުށަހެޅިކަމަށް ބާސެލޯނާގެ ކުރީގެ ރައީސް ޖުއާން ލަޕޯޓާ ހާމަކޮށްފިއެވެ.
ބާސެލޯނާގެ ކުރީގެ ރައީސް ލަޕޯޓާ މިމޭރުމުން ވާހަކަ ދައްކާފައިވަނީ އޭނާގެ އައު ފޮތް "ދިސް އިޒް ހައު ވީސޭވްޑް ބާސާ" ނެރުމުގެ ހަފްލާގައި ވާހަކަ ދައްކަމުންނެވެ. އޭނާ އިތުރަށް ބުނި ގޮތުގައި، ޔަމާލް ގަތުމަށް 250 މިލިއަން ޔޫރޯ ހުށަހެޅުމުންވެސް ބޭރުކޮށްލިންކަމަށާއި، އުމުރުން 17 އަހަރުގެ ޔަމާލްއަށް އެހާ ބޮޑު އަދަދެއް ހުށަހެޅުމުންވެސް އެކަން ގަބޫލު ނުކުރުމުން ބައެއް މީހުން ބާސާގެ މެނޭޖްމަންޓަކީ މޮޔައިންކަމަށް ދުށްކަމަށެވެ.
އުމުރުން އެންމެ 17 އަހަރުގައި ޔަމާލްގެ މޮޅު ކުޅުމާއެކު ސްޕެއިންއިން ޔޫރޯ ކާމިޔާބުކުރުމާއެކު ޕީއެސްޖީ އިން ޔަމާލް ހޯދުމަށް އަވަސްވެގަތެވެ. އެއީ އެޓީމުގެ މައި ތަނބުގެ ގޮތުގައި ބެލެވުނު ކިލިއަން އެމްބާޕޭ ރެއާލްއަށް ބަދަލުވުމުގެ ސަބަބުން ކުލަބަށް ދިމާވި ގޮންޖެހުންތަކާއެކުގައެވެ. އެ ހުށަހެޅުން ގަބޫލުކުރިނަމަ، ޔަމާލް ވެގެންދާނީ ދުނިޔޭގެ އެންމެ އަގުބޮޑު ކުޅުންތެރިޔާއަށެވެ. އެއީ 2017 ވަނަ އަހަރު ޕީއެސްޖީ އިން ނޭމާ ގަތުމަށް ހޭދަކުރި 222 މިލިއަން ޔޫރޯއަށްވުރެ ބޮޑު އަދަދެކެވެ. ބާސާއަށް ކުރިމަތިވެފައިވާ މާލީ އަޑިގުޑަންގަނޑާއެކުވެސް، ބާސާއިން ނިންމީ ޔަމާލް ކުލަބުގައި މަޑުކުރުވާށެވެ. އެ އަގަށް ޔަމާލް ދޫކޮށްލިނަމަ، ބާސާއަށް އެދުވަސްވަރު ދިމާވެފައިވާ މާލީ ހުރިހާ ހުރަހަކުން ސަލާމަތްވެ އިތުރަށް ކަންކަމަށް ޚަރަދުވެސް ކުރެވޭނެކަމަށްވިޔަސް، ލަޕޯޓާގެ ޓީމުން ނިންމީ ޔަމާލްއަކީ އަތްނުލެވޭނޭ ކުލަބުގެ ވަރުގަދަ ރައުސުލްމާލެއްގެ ގޮތުގައި ހެދުމަށެވެ.
ޔަމާލްގެ ހުނަރުވެރިކަން އެންމެ ބޮޑަށް ފާހަގަވާން ފެށީ ކުރީގެ ކޯޗު ޒަވީގެ ފަހު ސީޒަނުގައެވެ. އޭގެ ފަހުން އޭނާ އަންނަނީ ހަންސި ފްލިކްގެ ކޯޗުކަމުގައިވެސް މުހިންމު ދައުރެއް އަދާކުރަމުންނެވެ. މާލީގޮތުން ދިމާވި ގޮންޖެހުންތަކުން ބާސާ އަރައިގަނެ ސްޕެއިން ފުޓްބޯޅައިގެ ރަސްކަމަށް އެރުމަށް ކުރި ދަތުރުގެ މުހިންމު ދައުރެއް ޔަމާލްވަނީ އަދާކޮށްފައެވެ. އެކަމުގެ ހެއްކަކީ މިދިޔަ ސީޒަނުގައި ސްޕެއިންގެ ބޮޑު ތިން ތަށި ބާސާ ހޯދުމާއެކު އޭނާވަނީ ބެލޮންޑޯގެ ދެވަނަ ހޯދާފައެވެ.