އދ.ގެ އިންސާނީ ހައްގުތަކާ ބެހޭ ކައުންސިލްގެ 2028 އިން 2030 އަށް ހިނގާ ދައުރުގެ މެންބަރުކަމަށް ރާއްޖެއިން ވާދަކުރަން ނިންމައިފިއެވެ. މިކަން ރަސްމީކޮށް އިއުލާންކުރެއްވީ އެ ކައުންސިލްގެ ބައްދަލުވުމުގައި ވާހަކަދައްކަވަމުން ފޮރިން މިނިސްޓަރު ޑރ. އަބްދުﷲ ހަލީލް އެވެ. މިއީ އދ. ގެ ސަލާމަތީ މަޖިލިސް ފިޔަވައި އެހެން ގައުމުތަކުގެ މެދުގައި އެންމެ ވާދަވެރިކަން ބޮޑު ކައުންސިލްގެ މެންބަރުކަމަށް ރާއްޖެއިން ކުރިމަތިލާ ހަތަރުވަނަ ފަހަރެވެ.
ރާއްޖެއިން މީގެ ކުރިން ތިން ފަހަރެއްގެ މަތިން މި ކައުންސިލްގެ މެންބަރުކަން އަދާކޮށްފައިވެއެވެ. އެގޮތުން 2011 އިން 2016 އަށް ދެ ދައުރު ފުރިހަމަކޮށްފައިވާއިރު، އެންމެ ފަހުން 2023 އިން ފެށިގެން މިހާރު ވެސް ރާއްޖެއިން ދަނީ ކައުންސިލްގައި ހަރަކާތްތެރިވަމުންނެވެ. މީގެ އިތުރުން ރާއްޖެއިން ވަނީ މި ކައުންސިލްގެ ނައިބު ރައީސްކަން ވެސް ކުރިން އަދާކޮށްފައެވެ. މިނިސްޓަރު ވިދާޅުވީ އިންސާނީ ހައްގުތައް ހިމާޔަތްކުރުމުގައި ރާއްޖެއިން އަބަދުވެސް ސާބިތުކަމާއެކު ދެމިއޮންނާނެ ކަމަށެވެ.
ފޮރިން މިނިސްޓްރީން ބުނި ގޮތުގައި މި ކައުންސިލަށް ރާއްޖެއިން ވާދަކުރަނީ އިންޓަނޭޝަނަލް މައިދާނުގައި ރާއްޖޭގެ ދައުރު ވަރުގަދަކުރުމަށެވެ. އަދި މިއީ އިންސާނީ ހައްގުތަކަށް ރާއްޖޭގެ ސަރުކާރުން ދޭ އިސްކަމާއި އަހަންމިއްޔަތު ހާމަކޮށްދޭ ކަމެއް ކަމަށް ވެސް އެ މިނިސްޓްރީން ބުންޏެވެ. އިންސާނީ ހައްގުތަކާއި މިނިވަންކަން ރައްކާތެރިކުރުމަކީ މި ކައުންސިލްގެ އެންމެ މައިގަނޑު މަސްއޫލިއްޔަތެވެ. މި އިންތިހާބުގައި ކާމިޔާބު ހޯދުމަށް ރާއްޖެއިން މިހާރު ވަނީ ކެމްޕޭންގެ މަސައްކަތްތައް ފަށާފައެވެ.