ރާއްޖޭގެ އެންމެ ފަޚުރުވެރި ފުޓްބޯޅަ މުބާރާތް ޕްރެޒިޑެންޓްސްކަޕްގެ ޗެމްޕިއަންކަން އޮޑި ސްޕޯޓްސް ކުލަބު ހޯދައިފިއެވެ.
އޮޑި ސްޕޯޓްސް ކުލަބުން މުބާރާތުގެ ޗެމްޕިއަންކަން ހޯދީ ފައިނަލުގައި މިވަގުތު ދިވެހި ފުޓްބޯޅައިގެ ރަސްކަން ކުރަމުން އަންނަ މާޒިޔާ ސްޕޯޓްސް އެންޑް ރެކްރިއޭޝަން ކުލަބުގެ މައްޗަށް ކުރި ހޯދައިގެންނެވެ. މެޗުގެ ފުރިހަމަ ވަގުތު ހަމަވިއިރު ލަނޑެއް ނުޖެހި އެއްވަރުވުމުން ނަތީޖާ ނެރުނީ ޕެނަލްޓީ ޖަހައިގެންނެވެ. ޕެނަލްޓީއިން 5-6 ގެ ނަތީޖާއިން އޮޑި މޮޅުވެ މުބާރާތުގެ ޗެމްޕިއަންކަން ހޯދިއިރު، މިއީ އަލަށް ފުރަތަމަ ޑިވިޒަނަށް ޕްރޮމޯޓުވި އޮޑި ސްޕޯޓްސް ކުލަބަށް ދިވެހި ފުޓްބޯޅައިގެ އެންމެ މަތީ ފަންތީގެ ފުރަތަމަ ތައްޓެވެ. އަދި ދިވެހި ފުޓްބޯޅައިގެ ތާރީޚުގައިވެސް އަލަށް ފުރަތަމަ ޑިވިޒަނަށް ޕްރޮމޯޓުވި ޓީމެއް މި ތަށި ކާމިޔާބުކުރި ފުރަތަމަ ފަހަރެވެ. އޮޑިއަށް މެޗު ކާމިޔާބުވި ޕެނަލްޓީ ޖަހައިދިނީ މެޗުގައި މޮޅު ކުޅުމެއް ދެއްކި، އަދި މި ސީޒަނުގައި އެޓީމުގެ މުހިންމު ދައުރެއް އަދާކުރި އައިހަމްއެވެ.
ފައިނަލް މެޗުގެ މޮޅު ކުޅުންތެރިއަކަށް ހޮވުނީ އޮޑި ސްޕޯޓްސް ކުލަބުގެ ޖާޒީ ނަމްބަރ 22 މުހައްމަދު ޝަފީއުއެވެ. އަދި އެންމެ ގިނަ ގޯލު ޖެހި ކުޅުންތެރިޔާގެ މަގާމާއި މުބާރާތުގެ އެންމެ މޮޅު ކުޅުންތެރިޔާގެ މަގާމަށް ހޮވުނީ އޮޑި ސްޕޯޓްސް ކުލަބުގެ ޖާޒީ ނަމްބަރ 11 އަހުޒާމް ރަޝީދުއެވެ.
މުބާރާތުގެ ފައިނަލަށް އޮޑި ސްޕޯޓްސް ކުލަބު ދަތުރުކުރީ ސެމީ ފައިނަލުގައި ބުރު ސްޕޯޓްސް ކުލަބު ކައިރިން 2-0 އިން މޮޅުވެގެންނެވެ. އަދި މާޒިޔާ ފައިނަލަށް ދަތުރުކުރީ ވާދަވެރި ނިއުރޭޑިއަންޓާ ވާދަކޮށް 2-2 އިން އެއްވަރުވެ ޕެނަލްޓީ އިން ކުރި ހޯދައިގެންނެވެ.
މުބާރާތުގެ ޗެމްޕިއަން ޓީމަށް މެޑަލް އަދި ތަށި ހަވާލު ކުރެއްވީ މެޗުގެ ޝަރަފުވެރި މެހެމާން ރާއްޖޭގެ ރައީސް ޑރ. މުހައްމަދު މުއިއްޒުއެވެ.