ޗެމްޕިއަންސްލީގުގެ ގަދަބާރެއްގެ ގޮތުގައި ބެލެވޭ އަދި ކުރިން އެ މުބާރާތް ކާމިޔާބުކޮށްފައިވާ އިޓަލީގެ އިންޓަރމިލާން ކަޓުވާލުމަށްފަހު ނޯވޭގެ ބޯޑާ/ގްލިމްޓް މުބާރާތުގެ ގަދަ 16 އަށް ދަތުރުކޮށްފިއެވެ.
ރޭ ކުޅެވުނު ދެވަނަ ލެގުގެ މެޗުގެ އިންޓަރ މިލާންގެ އަމިއްލަ ދަނޑުގައި ބޯޑާ މޮޅުވީ 3-2 ގެ ނަތީޖާއިންނެވެ. މިއާއެކު ދެލެގުގެ ނަތީޖާ 5-2 އިން ކާމިޔާބުކޮށް އެކުލަބުގެ ތާރީޚުގައިވެސް ޗެމްޕިއަންސްލީގުގެ ގަދަ 16 އަށް ފުރަތަމަ ފަހަރަށް ވަނީ ދަތުރުކޮށްފައެވެ. ރޭގެ މެޗަށް ނުކުތްއިރުވެސް 3-1 ގެ ނަތީޖާއަކުން ކުރީގައި އޮތް ނަމަވެސް، ޗެމްޕިއަންސްލީގު 3 ފަހަރަށް ކާމިޔާބުކޮށްފައިވާ އިންޓަރ މިލާންއާ ދެކޮޅަށް ނުކުތީ ވަރަށް ވިސްނައިގެން ރޭވުންތެރިކަމާއެކުއެވެ. އޭގެ ނަތީޖާއަކީ އިންޓަރ އަށް މެޗު ތެރެއަށް ރަނގަޅަށް ވަދެވެންވާއިރަށް ބޯޑާއިން ދެ ލަނޑުގެ ލީޑެއް ނެގުމެވެ. އިންޓަރ މިލާނުން ކުރަންޖެހޭ މަސައްކަތް ދެގުނަ އިތުރު ކުރީއެވެ. އެކަމުގެ ރައްދު އިންޓަރ އަށް އަމިއްލަ ދަނޑުގައިވެސް ދެވޭގޮތްނުވިއެވެ.
ބޯޑާ ގްލިމްޓް ގަދަ 16 ގައި ވާދަކުރަން ޖެހޭނީ މެންޗެސްޓަރ ސިޓީ ނުވަތަ ސްޕޯޓިންއާއެވެ.
ގުރޫޕް ސްޓޭޖުގައިވެސް ބޯޑާ އިންވަނީ ހައިރާންކުރަނިވި ނަތީޖާތަކެއް ނެރެފައެވެ. އެގޮތުން މެންޗެސްޓަރ ސިޓީއާއި އެޓްލެޓިކޯ މެޑްރިޑް ބަލިކޮށް އެޓީމުތައްވަނީ ސިއްސުވާލާފައެވެ.