ޔުއެފާ ޗެމްޕިއަންސްލީގުގެ ގަދަ 16 އިން ޖާގަ ހޯދި ނިއުކާސަލް ޔުނައިޓެޑު، ދެން އޮތް ބުރުގައި ކޮންމެ ޓީމަކާ ޖެހުނަސް ފަރުވާލެއް ނެތްކަމަށް ބުނެފިއެވެ.
އެޓީމުގެ އަރިމައްޗަށް ކުޅޭ ޖެކޮބް މާފީ ގާތުގައި ގަދަ 16 ގައި ބޭނުމީ ބާސެލޯނާ އާއި ޗެލްސީ ތެރެއިން ކޮން ޓީމެއްތޯ އަހާލުމުން ބުނީ، މިހާރުގެ ޓީމުގެ ހާލަތު އޮތް ގޮތުން ކޮންމެ ޓީމެއްވެސް ވަރިހަމަކަމަށާއި ކޮންމެ ޓީމެއް އަޔަސް ތަފާތު ދެއްކޭނެކަމަށެވެ. މިކަމަށް އިތުރަށް ބާރުދެމުން އެޓީމުގެ ކޯޗު އެޑީ ހޯވް ވެސް ބުނީ އެމީހުން ކަނޑައެޅި ޓާގެޓަށް މިހާރު އާދެވުނު ނަމަވެސް، މިހިސާބުން އަދި ނިންމާލަން ބޭނުން ނުވާކަމަށެވެ. އަދި ކޮންމެ މެޗަކުންވެސް ރަނގަޅުކޮށް ކޮންމެ ބަޔަކާވެސް ވާދަކުރެވޭނެކަމަށާއި، ކޮންމެ ބަޔަކާ ވާދަކުރަން ޖެހުނަސް އެ ހިތްވަރު ޓީމުގައި އެބަހުރިކަމަށެވެ.
ނިއުކާސަލް ޔުނައިޓެޑް މުބާރާތުގެ ގަދަ 16 އަށް ދަތުރުކުރީ ރޭ ކަރަބާޚްއާ ބައްދަލުކުރި ދެވަނަލެގުގެ މެޗު 3-2 އިން ކާމިޔާބުކޮށް އެގްރިގޭޓުން 9-3 ގެ ބޮޑު ތަފާތަކުން ކުރި ހޯދައިގެންނެވެ.