އަމިއްލަ ދޮންދަރިއަށް ޖިންސީ ގޯނާކުރި ކުށުގައި މީހެއްގެ މައްޗަށް އިއްވާފައިވާ 15 އަހަރުގެ ޖަލު ހުކުމް ހައި ކޯޓުން ދަމަހައްޓައިފިއެވެ. މި މައްސަލާގައި ދައުލަތުން ދައުވާކުރީ 12 އަހަރުގެ ކުއްޖަކަށް އެކި ދުވަސް މަތިން ޖިންސީ ގޯނާކޮށްފައިވާތީއެވެ. ދަށު ކޯޓުން މި މައްސަލާގައި ކުރިން ނިންމާފައިވަނީ، ކުޑަކުއްޖަކު އިތުބާރުކުރަން ޖެހޭ މަގާމެއްގައި ހުރި މީހަކު އެ ކުއްޖާއާ އެކު ޖިންސީ އަމަލެއް ހިންގުމުގެ ކުށް ސާބިތުވާ ކަމަށެވެ.
މި މައްސަލާގައި ހެކީގެ ގޮތުގައި އެ މީހާގެ މޯބައިލް ފޯނުގެ ފޮރެންސިކް ރިޕޯޓާއި، ކުއްޖާގެ ނަފްސާނީ ރިޕޯޓުގެ އިތުރުން، ކުއްޖާ ދީފައިވާ ބަޔާންތަކަށް ކޯޓުން ވަނީ ރިއާޔަތްކޮށްފައެވެ. ހައި ކޯޓުގައި މި މައްސަލަ އިސްތިއުނާފު ކުރަމުން އެ މީހާ ބުނީ، މިއީ ކުއްޖާގެ ބައްޕައާ އޭނާއާ ދެމެދު އޮތް ޒާތީ ހަސަދައެއްގެ ސަބަބުން އުފައްދާފައިވާ ވާހަކައެއް ކަމަށެވެ. ނަމަވެސް ހައި ކޯޓުގެ ހުކުމުގައި ބުނީ، ކުއްޖާ މި ވާހަކަ އެންމެ ފުރަތަމަ ކިޔައިދިނީ އެ ކުއްޖާގެ އެއްބަފާ ދައްތައަށް ކަމަށާއި، ބައްޕައަށް ކިޔައިދިނީ އޭގެ ފަހުން ކަމަށެވެ.
އެހެންކަމުން މިއީ ޒާތީ މައްސަލައެއްގެ ސަބަބުން ދައްކާ ވާހަކައެއް ނޫން ކަމަށް ކަނޑައަޅައި، ދަށު ކޯޓުގެ ހުކުމް ރަނގަޅު ކަމަށް ހައި ކޯޓުން ވަނީ ނިންމާފައެވެ. ރާއްޖޭގައި ކުޑަކުދިންނަށް ކުރާ ޖިންސީ ގޯނާގެ މައްސަލަތަކުގައި ކޯޓުތަކުން އަންނަނީ ހަރުކަށި ހުކުމްތައް އިއްވަމުންނެވެ. މިފަދަ މައްސަލަތަކުގައި ކުޑަކުދިންގެ ރައްކާތެރިކަމަށް އިސްކަންދިނުމަކީ ދައުލަތުގެ މުހިންމު ސިޔާސަތެކެވެ.