ރާއްޖޭގެ ސަރަހައްދުގެ ވައި ނުސާފުވެ، ތަގައްޔަރުވުމުގެ ސަބަބުން ކުރާ އަސަރުތައް ކުޑަކުރުމަށްޓަކައި ދިގު މުއްދަތުގެ ހައްލުތައް ހޯދުމަށް ސަރަހައްދީ އަދި އިންޓަނޭޝަނަލް ބައިވެރިންނާ އެކު މަޝްވަރާކުރަމުންދާނެ ކަމަށް ފޮރިން މިނިސްޓްރީން ބުނެފިއެވެ. އިރުވައި މޫސުމުގެ ވަޔާއެކު އިންޑިއާ އިން އަންނަ ވައިގެ ތަގައްޔަރުކަމުގެ އަސަރު ކޮންމެ އަހަރަކުވެސް ރާއްޖެއަށް ފޯރާއިރު، މިއީ އާންމު ސިއްހަތަށާއި ތިމާވެއްޓަށް އޮތް ބޮޑު ގޮންޖެހުމެއްގެ ގޮތުގައި ސަރުކާރުން ވަނީ ފާހަގަކޮށްފައެވެ.
ފޮރިން މިނިސްޓްރީން ނެރުނު ބަޔާނެއްގައި ބުނީ، ބޯޑަރު ހުރަސްކޮށް އަންނަ މިފަދަ ދުންފިނީގެ ސަބަބުން ރާއްޖޭގެ އާންމު ދުޅަހެޔޮކަމަށާއި، ޓޫރިޒަމަށް ބަރޯސާވެފައިވާ އިގްތިސާދަށް ނޭދެވޭ އަސަރުތަކެއް ކުރާނެ ކަމަށެވެ. މިއީ މުޅި ދެކުނު އޭޝިއާ ސަރަހައްދުގެ ޖައްވީ ހާލަތާ ގުޅިފައިވާ ކަމަކަށް ވުމުން، ސައިންޓިފިކް ގޮތުން ގުޅިގެން މަސައްކަތްކޮށް، މައުލޫމާތު ބަދަލުކުރުމުގެ ޒަރީއާއިން މި މައްސަލައަށް ހައްލު ހޯދަން މަސައްކަތް ކުރާނެ ކަމަށްވެސް އެ އޮފީހުން ބުންޏެވެ.
މޫސުމާ ބެހޭ އޮފީހުން ލަފާކުރާ ގޮތުގައި ކުރިއަށް އޮތް ފަސް ދުވަހުވެސް ރާއްޖޭގެ ހުރިހާ ސަރަހައްދަކަށް ދުންފިނީގެ އަސަރު ކުރާނެއެވެ. ހާއްސަކޮށް އުތުރުގެ ރަށްތަކަށް ދުރު ފެންނަ މިންވަރު ދެ ކިލޯމީޓަރަށް ވުރެ ދަށްވެފައިވާ ކަމަށްވެސް މެޓް އޮފީހުން ވަނީ ހާމަކޮށްފައެވެ. ސަރުކާރުން ބުނީ ތަރައްގީވަމުން އަންނަ ކުދި ޖަޒީރާ ގައުމެއްގެ ހައިސިއްޔަތުން ތިމާވެށި ރައްކާތެރިކުރުމަށް ރާއްޖެއިން އަބަދުވެސް އިންޓަނޭޝަނަލް މައިދާނުގައި ވަކާލާތު ކުރާނެ ކަމަށެވެ.