ދުޅަހެޔޮ ސިއްހަތެއްގައި ހުރުމަށްޓަކައި ކެއިންބުއިމުގެ އާދަތަކަށް ބަދަލުުގެނައުމަކީ މުހިންމު ކަމެކެވެ. މިގޮތުން ދާދިފަހުން ޖަރުމަނުގެ ޔުނިވަރސިޓީ އޮފް ބޯން އިން ކުރި އާ ދިރާސާއަކުން ވަނީ ހައިރާންކުރުވަނިި ނަތީޖާއެއް ދައްކާފައެވެ. އެއީ އެންމެ ދެ ދުވަހު ހަމައެކަނި އޯޓްމީލް ބޭނުންކޮށްގެން ހަށިގަނޑަށް ލިބޭ ސިއްހީ ފައިދާތަކެވެ.
މި ދިރާސާގައި ބައިވެރިކޮށްފައިވަނީ މެޓަބޮލިކް ސިންޑްރޯމް ނުވަތަ ހަކުރު ބައްޔާއި، ލޭގެ ޕްރެޝަރު މަތިވުމާއި، ބަރުދަން އިތުރުވުމުގެ މައްސަލަތައް ހުންނަ މީހުންނެވެ. މި މީހުން ދެ ދުވަހުގެ މުއްދަތަށް، ކެލޮރީ މަދުކޮށް ހަމައެކަނި އޯޓްމީލް ހިމެނޭ ޕްލޭނަކަށް އަމަލުކުރިއެވެ. މި ކުޑަ ދުވަސްކޮޅުގެ ނަތީޖާއަކަށްވީ، ހަށިގަނޑަށް ނުރައްކާތެރި "ބޭޑް ކޮލެސްޓްރޯލް" ނުވަތަ އެލް.ޑީ.އެލް %10 ދަށްވުމެވެ.
މީގެ އިތުރުން، މި ދިރާސާއިން ފާހަގަވި އަނެއް ކަމަކީ ބައިވެރިންގެ ހަށިގަނޑުގެ ބަރުދަނަށް އައި ހެޔޮ ބަދަލާއި، ލޭގެ ޕްރެޝަރު ދަށްވުމެވެ. މިއީ ހިތުގެ ބަލިތަކުން ރައްކާތެރިވުމަށް އެހީތެރިވެދޭނެ މުހިންމު ބަދަލުތަކެކެވެ.
އެންމެ ހައިރާންކުރުވަނިި ކަމަކީ، މި ދެ ދުވަހުގެ ކެއުމުގެ ސަބަބުން ކޮލެސްޓްރޯލަށް ލިބުނު ކުރިއެރުން، ހަ ހަފުތާ ފަހުން ބެލިއިރުވެސް ހަށިގަނޑުން ފެންނަން ހުރުމެވެ. މިއީ ކުރު މުއްދަތެއްގެ ކެއުމުގެ ބަދަލަކުން ދިގު މުއްދަތުގެ ފައިދާއެއް ލިބިދާނެކަމުގެ ހެއްކެކެވެ.
ޖުމްލަގޮތެއްގައި ބަލާއިރު، އޯޓްމީލްއަކީ ފައިބަރާއި މުހިންމު މާއްދާތަކުން މުއްސަނދި އެއްޗަކަށްވާއިރު، މިއީ އަޅުގަނޑުމެންގެ ކެއުމުގައި ހިމެނުން ވަރަށް މުހިންމު ބާވަތެކެވެ. ޚާއްޞަކޮށް ކޮލެސްޓްރޯލާއި ލޭގެ ޕްރެޝަރު ކޮންޓްރޯލްކުރަން ބޭނުންވާ މީހުންނަށް މިއީ ގުދުރަތީ އަދި ފަސޭހަ މަގަކަށް ވެގެންދާނެއެވެ.
ހަވާލާ: ސައިންސް ޑެއިލީ 2026