އިނގިރޭސި ޕްރިމިއަރލީގުގައި ތާވަލުގެ ފުލުގައި އޮތް ވުލްވްސްއަތުން އެސްޓަންވިލާ ބަލިވެ، ތާވަލުގެ ތިންވަނައަށް ޖެހިލުމަށް މެންޗެސްޓަރ ޔުނައިޓެޑަށް ފުރުޞަތު ފަހިވެއްޖެއެވެ.
ރޭ ވުލްވްސްގެ އަމިއްލަ ދަނޑުގައި ކުޅުނު މިމެޗު އެޓީމުން ކާމިޔާބުކުރީ 2-0 ގެ ނަތީޖާއިންނެވެ. ލަނޑުތައް ޖަހައިދިނީ ޖައޯ ގޯމޭޒްއާއި ރޮޑްރިގޯ ގޯމޭޒެވެ. މުޅި މެޗުގައި ރަނގަޅު ކުޅުމެއް ފެނިގެންދިޔައީ ވުލްވްސްގެ ފަރާތުންނެވެ. ފުރަތަމަ ހާފު އެއްވެސް ޓީމަކަށް ލަނޑެއް ނުޖެހި ނިމުނުއިރު، ލަނޑުތައް ފެނިގެންދިޔައީ ދެވަނަ ހާފުގައެވެ.
މި ނަތީޖާއާއެކު، ތާވަލުގެ ތިންވަނާގައި އޮތް އެސްޓަންވިލާއަށް މިވަނީ ލީގު ހޯދުމުގެ ފުރުޞަތު ބަންދުވެފައެވެ. އަދި އެޓީމާ ޖެހިގެން ފުލުގައި ވިއްދާފައި އޮތް މެންޗެސްޓަރ ޔުނައިޓެޑު އާދިއްތަ ދުވަހު ކްރިސްޓަލް ޕެލަސް ކައިރިން މޮޅުވެއްޖެނަމަ، ތާވަލުގެ ތިންވަނައަށް ޔުނައިޓެޑު ޖެހިލައި، އެސްޓަންވިލާ ހަތަރުވަނައަށް ވެއްޓިގެންދާނެއެވެ.
ފަހަކަށް އައިސް އެސްޓަންވިލާ ދައްކަމުންދާ ދަށްކުޅުމުގެ ސަބަބުން އެޓީމު އެންމެ ފަހުން ކުޅުނު 10 މެޗު ތެރެއިން މޮޅުވެފައިވަނީ އެންމެ 3 މެޗުންނެވެ. ޕްރިމިއަރ ލީގުގެ ގަދަ ހަތަރަކަށް އެރުމަށް ޗެލްސީ، މެންޗެސްޓަރ ޔުނައިޓެޑު އަދި ލިވަޕޫލުން ގަދަފައި ވިއްދާފައި ތިބިއިރު، މިއީ އެސްޓަންވިލާއިން ގަދަ ހަތަރެއްގެ ޖާގައެއް ހޯދުމަށް ކުރާ މަސައްކަތަށް އިތުރު ގޮންޖެހުމަކަށްވެގެންދާނެއެވެ.
ރޭގެ ނަތީޖާއަށްފަހު، އެސްޓަންވިލާގެ ކޯޗު އުނެއި އެމެރީ ބުނެފައިވަނީ ސެޕްޓެމްބަރ މަހު އޭނާގެ އަމާޒަކަށްވީ ލީގުގައި ޓީމު ބޭއްވުމަށްކަމަށާއި، ނެރެމުންއައި ރަނގަޅު ނަތީޖާތަކާއެކު ޑިސެމްބަރ މަހު ޓީމު ގަދަ ފަސްޓީމު ތެރޭގައި ހިމެނި ޗެމްޕިއަންސްލީގުގެ ޖާގައަކަށް ޓީމު ވާދަކުރިކަމަށާއި، މަހެއް ކުރިން ޓީމު ލީގުތައްޓަށްވެސް ވާދަކުރެވިދާނެކަމުގެ ގަބޫލުކުރުމެއް އައި ކަމަށެވެ. ނަމަވެސް މިހާރު ލީގު ހޯދުމުގެ ފުރުޞަތެއް ނެތްކަމަށާއި ދެން އޮތީ ޗެމްޕިއަންސްލީގަށް ދެވޭނެ މަގެއް ހޯދުންކަމަށްވެސް އޭނާ ބުންޏެވެ.