މެންޗެސްޓަރ ޔުނައިޓެޑުގެ ޑިފެންޑަރު ހެރީ މެގުއާގެ ކޮންޓްރެކްޓް ޔުނައިޓެޑުން އައުކޮށްފާނެކަމުގެ އިޝާރާތެއް އެޓީމުގެ ވަގުތީ ކޯޗު މައިކަލް ކެރިކް ދީފިއެވެ.
މި ސީޒަނަށްފަހު މެގުއާގެ ކޮންޓްރެކްޓް ނިމޭއިރު، ފްރީ އެޖެންޓެއްގެ ގޮތުގައި ކުލަބު ދޫކޮށްލުމަށްވުރެ އޭނާގެ ކޮންޓްރެކްޓް އައު ކުރާނެކަމަށް ޚަބަރުތައްދަނީ ފެތުރެމުންނެވެ. އާދިއްތަ ދުވަހު ކްރިސްޓަލް ޕެލަސްއާ ދެކޮޅަށް ޔުނައިޓެޑު ކުޅެން ހަމަޖެހިފައިވާ މެޗުގެ ކުރިން، މެގުއާގެ ކުރިމަގާ ބެހޭގޮތުން ނޫސްވެރިއަކު ކުރި ސުވާލަކަށް ޖަވާބު ދެމުން ކެރިކް ބުނީ މެގުއާއަކީ މޮޅު ކުޅުންތެރިއެއްކަމަށާއި، ޓީމުގައި އޭނާ ދައްކަމުން އަންނަ ކުޅުމާމެދު ހިތްހަމަޖެހޭކަމަށެވެ. އަދި އޭނާގެ ފަރާތުން އަދިވެސް ކުލަބަށް ވަރަށް ގިނަކަންކަން ވާނެކަމަށް އުއްމީދުކުރާކަމަށާއި، ޒުވާން ކުޅުންތެރިންނަށް ފުރުޞަތު ދޭންޖެހޭކަމަށް ގަބޫލުކުރާ ފަދައިން، ޓީމުގައި ތަޖުރިބާކާރު ކުޅުންތެރިންވެސް ތިބެންޖެހޭނެކަމަށެވެ. އަދި ސީޒަނަށްފަހު ކެސެމީރޯ ކުލަބު ދޫކޮށްލާއިރު އެއީވެސް ވިސްނަންޖެހޭކަމެއްކަމަށެވެ.
އެންމެ އަގުބޮޑު ޑިފެންޑަރުގެ ގޮތުގައި މެންޗެސްޓަރ ޔުނައިޓެޑަށް ބަދަލުވި ހެރީ މެގުއާ މީގެ ކުރިންވަނީ ކުލަބުގެ ކެޕްޓަންކަންވެސް ކޮށްފައެވެ. އަދި ރުބެން އަމޮރިމްގެ ކޯޗުކަމުގައި ކުޅުން ދަށްވުމުގެ ސަބަބުން ކުލަބުގެ ސަޕޯޓަރުންގެ ވަރަށްބޮޑު ފާޑުކިޔުމެއްވެސް މެގުއާއާ ކުރިމަތިވިއެވެ. ނަމަވެސް ކެރިކް ކޯޗުކަމާ ހަވާލުވިފަހުން އަނެއްކާވެސް އޭނާގެ އަސްލު ކުޅުން އަންނަނީ ދައްކަމުންނެވެ. އަދި ޔުނައިޓެޑުގެ ޑިފެންސްލައިނުގައި އެންމެ މުހިންމު ދަޢުރެއް އަދާކުރަމުން އަންނަނީވެސް ހެރީ މެގުއާއެވެ.